Haryanvi Bible
व्यवस्थाविवरण 7
प्रभु की चुणी होई प्रजा
“फेर जिब तेरा परमेसवर यहोवा तन्नै उस देश म्ह जिसकै हकदार तू होण पै सै पोहचावै, अर तेरै स्याम्ही तै हित्ती, गिर्गाशी, एमोरी, कनानी, परिज्जी, हिब्बी, अर यबूसी नाम की, घणीए जात्तां ताहीं यानिके थारै तै बड़ी अर सामर्थी सात्तु जात्तां ताहीं लिकाड़ दे, अर तेरा परमेसवर यहोवा उननै तेरै जरिये हरा दे, अर तू उनपै जीत पा ले; फेर उननै आच्छी ढाळ तै नाश कर दिए; उनतै ना करार करिये, अर ना उन माणसां पै दया करिये। अर ना उनतै ब्याह शादी करिये, ना तो अपणी छोरी उनकै बेट्टे तै ब्याहिये, अर ना उनकी बेट्टियाँ नै अपणे बेट्टे तै ब्याहिये। क्यूँके वे तेरे बेट्याँ नै मेरै पाच्छै चाल्लण तै बहकावैगी, अर दुसरे देवत्यां की आराधना करवावैगी; अर इस कारण यहोवा का छो थारै पै भड़क उठ्ठैगा, अर वो तेरा तावळी सत्यानाश कर देवैगा। उन माणसां तै इसा बरताव करिये, के उनकी वेदियाँ ताहीं गेर दिये, उनकी लाठां नै तोड़ गेरिये, उनकी अशेरा नाम की मूरतां नै काट-काटकै गेर दिये, अर उनकी खुदी होई मूरतां ताहीं आग म्ह जळा दिये। क्यूँके तू अपणे परमेसवर यहोवा की पवित्र प्रजा सै; यहोवा नै धरती भर के सारे देशां के माणसां म्ह तै तेरै ताहीं छाँट लिया सै के तू उसकी प्रजा अर उसका खुद का हिस्सा ठहरै। यहोवा नै जो थारै तै प्यार करकै थारै ताहीं चुण लिया, इसका कारण या कोनी था के थम गिणती म्ह अर सारे देशां के माणसां तै घणे थे, बल्के थम तो सारे देशां के माणसां की गिणती म्ह थोड़े थे; यहोवा नै जो थारै ताहीं बलवन्त हाथ कै जरिये गुलाम्मी के घर म्ह तै, अर मिस्र देश कै राजा फिरौन कै हाथ तै छुड़ाकै लिकाड़ ल्याया, इसका योए कारण सै के वो थारै तै प्यार करै सै, अर उस कसम नै भी पूरी करणा चाहवै सै जो उसनै थारै पूर्वजां तै खाई थी। इस करकै जाण ले के तेरा परमेसवर यहोवा ए परमेसवर सै, वो भरोसेमन्द परमेसवर सै; जो उसतै प्यार राक्खै सै अर उसका हुकम मान्नैं सै उनकै गेल्या वो हजार पीढ़ी ताहीं अपणे करार का पालन करदा, अर उनपै करुणा करदा रहवै सै; अर जो उसतै बैर राक्खै सै, वो उनकै देखदे उनतै बदला लेकै नाश करदे सै; अपणे बैरी कै बारै म्ह वो देर न्ही करैगा, उसकै देखदे ए उसतै बदला लेवैगा। इस करकै इन हुकमां, विधियाँ, अर नियमां नै, जो मै आज तन्नै चिताँऊ सूं, मानण म्ह चौकसी करिये।”
आज्ञाकारिता की आशीष
“अर थम जो इन नियमां नै सुणकै मान्नोगे अर इन पै चाल्लोगे, तो तेरा परमेसवर यहोवा भी उस करुणामय करार का पालन करैगा जिस ताहीं उसनै तेरे पूर्वजां तै कसम खाकै करया था; अर वो तेरै तै प्यार राक्खैगा, अर तन्नै आशीष देवैगा, अर गिणती म्ह बढ़ावैगा; अर जो देश उसनै तेरे पूर्वजां तै कसम खाकै तन्नै देण नै कह्या सै उस म्ह वो तेरी सन्तान पै, अर अन्न, नये दाखमधु, अर जैतून का तेल आदि, धरती की उपज पै आशीष दिया करैगा, अर तेरी गां-बळध अर भेड़-बकरियाँ की बढ़ोतरी करैगा। तू सारे देशां के माणसां तै घणा धन्य होवैगा; तेरै बिचाळै ना आदमी ना जनान्नी बेबस होवैगी, अर तेरे डान्गरां म्ह भी इसा कोए न्ही होवैगा। अर यहोवा तेरै तै सारी ढाळ की बीमारी दूर करैगा; अर मिस्र देश की बुरी-बुरी व्याधियाँ जिननै तू जाणै सै उन म्ह तै किसे नै भी तेरै लागण न्ही देवैगा, ये सारे तेरे बैरियाँ कै ए लाग्गैगीं। अर देश-देश के जितने माणसां ताहीं तेरा परमेसवर यहोवा तेरै वश म्ह कर देगा, तू उन सारया नै सत्यानाश करिये; उनपै तरस की निगांह ना करिये, अर ना उनकै देवत्यां की आराधना करिये, न्ही तो तू फंदे म्ह फँस ज्यागा।”
“जै तू अपणे मन म्ह सोच्चै, के वे जात जो मेरै तै घणी सै; तो मै उननै किस तरियां देश तै लिकाड़ सकूँगा? फेर भी उनतै ना डरिये, जो कुछ तेरे परमेसवर यहोवा नै फिरौन तै अर सारे मिस्र देश तै करया उसनै ठीक ढाळ याद राखिये। जो बड़े-बड़े मुसीबत के काम तन्नै अपणी आँखां तै देक्खे, अर जिन चिन्ह, अर चमत्कारां, अर जिस बलवन्त हाथ, अर बढाई होई बांह कै जरिये तेरा परमेसवर यहोवा तन्नै लिकाड़ ल्याया, उनकै मुताबिक तेरा परमेसवर यहोवा उन सारे माणसां तै भी जिनतै तू डरै सै करैगा। इसतै घणा तेरा परमेसवर यहोवा उनकै बिचाळै बर्रों भी भेज्जैगा, उरै ताहीं के उन म्ह तै जो बचकै लुह्क जावैंगे वे भी तेरै स्याम्ही तै नाश हो ज्यागें। उनतै भय न्ही खाइये; क्यूँके तेरा परमेसवर यहोवा तेरै बिचाळै सै, अर वो महान अर भययोग्य परमेसवर सै। तेरा परमेसवर यहोवा उन जात्तां ताहीं तेरै आग्गै तै सहज-सहज लिकाड़ देवैगा; तो तू एकदम तै उनका अन्त न्ही कर सकैगा, ना तो जंगळी-पशु बढ़कै तेरा नुकसान करैगें। फेर भी तेरा परमेसवर यहोवा उननै तेरै तै हरवा देवैगा, अर जिब ताहीं वे सत्यानाश ना हो जावै जिब ताहीं उननै घणे परेशान करदा रहवैगा। अर वो उनकै राजाओं नै तेरै हाथ म्ह करैगा, अर तू उनका भी नाम धरती पै तै मिटा देवैगा; उन म्ह तै कोए भी तेरै स्याम्ही खड्या न्ही रह सकैगा, अर अन्त म्ह तू उननै सत्यानाश कर देवैगा। उनके देवत्यां की खुदी होई मूर्ति थम आग म्ह जळा दिये; जो चाँदी या सोन्ना उनपै मढ़यां हो उसका लालच करकै न्ही ले लिये, ना तो तू उसकै कारण फंदे म्ह फँसैगा; क्यूँके इसी चीज थारे परमेसवर यहोवा की निगांह म्ह घृणित सै। अर कोए घृणित चीज अपणे घर म्ह ना ल्याईये, न्ही तो तू भी उसकै जिसा नाश हो जाण की चीज ठहरैगा; उसनै सत्यानाश की चीज जाणकै उसतै घृणा करिये अर उस ताहीं कदे भी ना चाहिये; क्यूँके वो अशुद्ध चीज सै।”
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.