Haryanvi Bible
व्यवस्थाविवरण 6
खास हुकम
“ये वे हुकम, अर वे विधियाँ अर नियम सैं जो थमनै सिखाण का थारे परमेसवर यहोवा नै हुकम दिया सै, के थम उननै उस देश म्ह मान्नो जिसकै हकदार होण ताहीं यरदन के पार जाण पै सो; अर तू अर तेरा बेट्टा अर तेरा पोत्ता परमेसवर यहोवा का भय मान्दे होए उसकी उन सारी विधियाँ अर हुकमां पै, जो मै थमनै सुणाऊँ सूं, अपणी जिन्दगी भर चाल्दे रहो, जिसतै तू घणे दिन ताहीं बण्या रहवै। हे इस्राएल, सुण, अर न्यूए करण की चौकसी करिये; ज्यांतै के तेरा भला हो, अर तेरे पितरां के परमेसवर यहोवा कै वचन कै मुताबिक उस देश म्ह जड़ै दूध अर शहद की धारा बहवै सै थम घणे हो जाओ।”
“हे इस्राएल, सुण, यहोवा म्हारा परमेसवर सै, यहोवा एक ए सै; तू अपणे परमेसवर यहोवा तै अपणे सारे मन, अर सारे प्राण, अर सारी शक्ति कै गेल्या प्यार राखिये।; अर ये हुकम जो मै आज तन्नै सुणाऊँ सूं वे तेरै मन म्ह बणे रहवै अर तू इननै अपणे बाळकां ताहीं समझाकै सिखाया करिये, अर घर म्ह बैठदे, राह पै चाल्दे, लेटदे, उठदे, इनका जिक्र करया करिये। अर इननै अपणे हाथ पै निशान के रूप म्ह बाँधिये, अर ये तेरी आँखां कै बिचाळै टीक्के का काम देवैं। अर इननै अपणे-अपणे घरां कै चौखट की बाजुआं अर अपणे फाटकां पै लिखणा।”
हुकम उलंघण कै खिलाफ चेतावनी
“जिब तेरा परमेसवर यहोवा तन्नै उस देश म्ह भेज्जै जिसकै बारै म्ह उसनै अब्राहम, इसहाक, अर याकूब नाम के, तेरे पूर्वजां तै तन्नै देण की कसम खाई, अर जिब वो तन्नै बड़े-बड़े अर आच्छे नगर, जो तन्नै न्ही बणाए, अर आच्छी-आच्छी चिज्जां तै भरे होए घर, जो तन्नै न्ही भरे, अर खुदे होए कुएँ, जो तन्नै न्ही खोद्दे, अर अंगूर के बाग अर जैतून कै दरखत, जो तन्नै न्ही लगाये, ये सारी चीज जिब वो दे, अर तू खाकै छिक्क जावै, फेर चौक्कस रहिये, कदे इसा ना हो के तू यहोवा नै भूल ज्या, जो तन्नै गुलाम्मी कै घर यानिके मिस्र देश तै लिकाड़ ल्याया सै। अपणे परमेसवर यहोवा का भय मानिये; उस्से की सेवा करिये, अर उस्से कै नाम की कसम खाइये। थम पराए देवत्यां कै, यानिके अपणे चौगरदेकै देशां के माणसां के देवत्यां कै पाच्छै ना हो लियो; क्यूँके तेरा परमेसवर यहोवा जो तेरै बिचाळै सै वो जळण राक्खण आळा परमेसवर सै; कदे इसा ना हो के तेरे परमेसवर यहोवा का छो तेरै पै भड़कै, अर वो तन्नै धरती पै तै नाश करदे।”
“थम अपणे परमेसवर यहोवा की परीक्षा ना लियो, जिस तरियां के थमनै मस्सा म्ह उसकी परीक्षा करी थी। अपणे परमेसवर यहोवा कै हुकम, चेतावनियाँ, अर विधियाँ नै, जो उसनै तेरै ताहीं दिये सैं, सावधानी तै मानिये। अर जो काम यहोवा की निगांह म्ह ठीक अर सुहावणा सै वोए करया करिये, जिसतै के तेरा भला हो, अर जिस उत्तम देश कै बारै म्ह यहोवा नै तेरै पूर्वजां तै कसम खाई उस म्ह तू दाखल होकै उसका हकदार हो जावै, के तेरे सारे बैरी तेरै स्याम्ही तै दूर कर दिए जावै, जिसा के यहोवा नै कह्या था।”
“फेर आग्गै तै जिब तेरी सन्तान तेरै तै पूच्छै, ‘ये चेतावनी अर विधि अर नियम, जिनकै मानण का हुकम म्हारै परमेसवर यहोवा नै थारै ताहीं दिया सै, इनकी के जरूरत सै?’ फेर अपणी सन्तान तै कहिये, जिब हम मिस्र देश म्ह फिरौन कै गुलाम थे, फेर यहोवा बलवन्त हाथ तै म्हारै ताहीं मिस्र देश म्ह तै काढ ले आया; अर यहोवा नै म्हारै देखदे मिस्र देश म्ह फिरौन अर उसके सारे कुण्बे पै दुख देण आळे बड़े-बड़े निशान अर चमत्कार दिखाए; अर हमनै वो ओड़ै तै लिकाड़ ल्याया, ज्यांतै के हमनै इस देश म्ह पोंहचाकै, जिसकै बारै म्ह उसनै म्हारे पूर्वजां तै कसम खाई थी, इस देश नै म्हारै ताहीं सौंप दे। अर यहोवा नै म्हारै ताहीं ये सारी विधियाँ पालन करण का हुकम दिया, ज्यांतै हम अपणे परमेसवर यहोवा का भय मान्ना, अर इस तरियां सदा म्हारा भला हो, अर वो म्हारै ताहीं जिन्दा राक्खै, जिसा के आज कै दिन सै। अर जै हम अपणे परमेसवर यहोवा की निगांह म्ह उसके हुकम कै मुताबिक इन सारे नियमां कै मानण म्ह चौकसी करां, तो या म्हारै खात्तर धार्मिकता ठहरैगी।”
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.