Haryanvi Bible
व्यवस्थाविवरण 16
फसह अर अखमीरी रोट्टी का त्यौहार
“अबीब महिन्ने नै याद करकै अपणे परमेसवर यहोवा कै खात्तर फसह का त्यौहार मानिये; क्यूँके अबीब महिन्ने म्ह तेरा परमेसवर यहोवा रात नै तेरै ताहीं मिस्र देश तै लिकाड़ ल्याया। इस करकै जो जगहां यहोवा अपणे नाम का निवास ठहराण नै छाँट लेवैगा, ओड़ैए अपणे परमेसवर यहोवा कै खात्तर भेड़-बकरियाँ अर गां-बळध फसह करकै बलि करिये। उसकै गैल कोए खमीरी चीज ना खाइये; सात दिन ताहीं अखमीरी रोट्टी जो दुख की रोट्टी सै खाया करिये; क्यूँके तू मिस्र देश तै जल्दबाजी करकै लिकड़या था; इस्से तरियां तै तेरै ताहीं मिस्र देश तै लिकड़ण का दिन जिन्दगी भर याद रहवैगा। सात दिन ताहीं तेरे सारे देश म्ह तेरै धोरै कदे खमीर देखण म्ह भी न्ही आवै; अर जो पशु तन्नै पैहल्ड़े दिन की साँझ नै बलि करै उसकै माँस म्ह तै कुछ सबेरै ताहीं न्ही रहण पावै। फसह म्ह अपणे किसे फाटक कै भित्तर, जिस ताहीं तेरा परमेसवर यहोवा तन्नै दे बलि ना करिये। जो जगहां तेरा परमेसवर यहोवा अपणे नाम का निवास करण कै खात्तर छाँट ले सिर्फ ओड़ैए, साल के उस्से बखत जिस म्ह तू मिस्र देश तै लिकड़या था, यानिके सूरज डूब्बण पै साँझ के बखत म्ह फसह का पशुबलि करिये। फेर उसका माँस उस्से जगहां म्ह जिस ताहीं तेरा परमेसवर यहोवा छाँट ले भुन कै खाइये; फेर सबेरै नै उठकै अपणे-अपणे डेरे म्ह बोहड़ जाईये। छः दिन ताहीं अखमीरी रोट्टी खाया करिये; अर सातमै दिन तेरे परमेसवर यहोवा कै खात्तर बड़ी सभा हो; उस दिन किसे ढाळ का काम-काज ना करया जावै।”
लामणी का त्यौहार
“फेर जिब तू खेत म्ह दराती लाण लाग्गै, जिब तै शरु करकै सात सप्ताह गिणिये। फेर अपणे परमेसवर यहोवा की आशीष कै मुताबिक उसकै खात्तर स्वेच्छाबलि देकै सप्ताहां का त्यौहार मानिये; अर उस जगहां म्ह जो तेरा परमेसवर यहोवा अपणे नाम का निवास करण नै छाँट ले अपणे-अपणे बेट्टे-बेटियाँ, दास-दासियाँ समेत तन्नै अर तेरे फाटकां कै भित्तर जो लेवी हों, अर जो-जो परदेशी, अर अनाथ, अर बिधवां तेरे बिचाळै हों, वे सारे के सारे अपणे परमेसवर यहोवा कै स्याम्ही आनन्द करैं। अर याद राखिये के तू भी मिस्र देश म्ह गुलाम था; ज्यांतै इन विधियाँ कै मान्नण म्ह चौकसी करिये।”
झोपड़ियां का त्यौहार
“तू जिब अपणे खलिहाण अर दाखमधु कै कुण्ड म्ह तै सारा कुछ कठ्ठा कर ले, फेर झोपड़ियां का त्यौहार सात दिन तक मान्दे रहिये; अर अपणे इस त्यौहार म्ह अपणे-अपणे बेट्टे बेट्टियाँ, दास-दासियाँ समेत तू अर जो लेवी, अर परदेशी, अर अनाथ, अर बिधवां तेरै फाटकां कै भित्तर हों वे भी आनन्द मनावै। जो जगहां यहोवा छाँट ले उस म्ह तू अपणे परमेसवर यहोवा कै खात्तर सात दिन ताहीं त्यौहार मान्दे रहिये; क्यूँके तेरा परमेसवर यहोवा तेरी सारी बढ़दी म्ह अर तेरे सारे काम्मां म्ह तन्नै आशीष देवैगा; तू आनन्द ए करदा रहिये। साल म्ह तीन बार, यानिके अखमीरी रोट्टी के त्यौहार, अर सप्ताहां कै त्यौहार, अर झोपड़ियां कै त्यौहार, इन तीन्नु त्यौहारां म्ह थारै सारे आदमी अपणे परमेसवर यहोवा कै स्याम्ही उस जगहां म्ह जो वो छाँट लेवैगा जावैं। अर देक्खो, खाल्ली हाथ यहोवा कै स्याम्ही कोए न्ही जावै; सारे आदमी अपणी-अपणी आमदणी, अर उस आशीष कै मुताबिक जो तेरे परमेसवर यहोवा नै तेरै ताहीं दी हो, दिया करैं।”
लोगां कै खात्तर न्यायियाँ की नियुक्ति
“तू अपणे एक-एक गोत्र म्ह तै, अपणे सारे फाटकां कै भित्तर जिननै तेरा परमेसवर यहोवा तन्नै देवै सै न्यायी अर सरदार ठहरा लिये, जो माणसां का न्याय धार्मिकता तै करया करैं। थम न्याय ना बिगाड़ियो; तू ना तो पक्षपात करिये; अर ना घूस लिये, क्यूँके घूस अकलमंद की आँखां नै आँधी करदे सै, अर धर्मियाँ की बात पलट दे सै। जो किमे न्यायपूर्ण सै उस्से का पिच्छा करदा रहिये, जिसतै तू जिन्दा रहवै, अर जो देश तेरा परमेसवर यहोवा तन्नै देवै सै उसका अधिकारी बण्या रहवै।”
वर्जित पूजा
“तू अपणे परमेसवर यहोवा की जो वेदी बणावैगा उसकै धोरै किसे ढाळ की लाकड़ी की बणी होई अशेरा की मूर्ति ना खड़या करिये। अर ना कोए खम्बा खड़या करिये, क्यूँके उसतै तेरा परमेसवर यहोवा नफरत करै सै।”
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.