2 इतिहास 5

पवित्र सन्दूक का मन्दर म्ह ल्याया जाणा

1इस तरियां सुलैमान नै यहोवा के भवन खात्तर जो-जो काम करवाया वो सारा पूरा होग्या। फेर सुलैमान नै अपणे पिता दाऊद के पवित्र करे होए सोन्‍ने, चाँदी अर सारे बरतनां नै भित्तर पोहचाकै परमेसवर के भवन के भण्डारां म्ह धरवा दिया1। 2फेर सुलैमान नै इस्राएल के पुरनियां ताहीं अर गोत्रां के सारे खास आदमी, जो इस्राएलियाँ के पितरां के कुण्बे के प्रधान थे, उन ताहीं भी यरुशलेम म्ह इस मकसद तै कठ्ठा करया के वे यहोवा की वाचा का सन्दूक दाऊदपुर तै यानिके सिय्योन तै उप्पर ले आवै। 3सारे इस्राएली माणस सातवें महिन्‍ने के त्यौहार कै बखत राजा कै धोरै कठ्ठे होए2। 4जिब इस्राएल के सारे अगुवें आए, फेर लेवियाँ नै वाचा के सन्दूक ताहीं ठा लिया। 5अर लेवीय याजक सन्दूक अर मिलापआळे तम्बू अर जितने पवित्र बरतन उस तम्बू म्ह थे उन सारया नै उप्पर लेगे। 6अर राजा सुलैमान अर सारी इस्राएली मण्डळी के माणस जो उसके धोरै कठ्ठे होए थे, उन ताहीं सन्दूक कै स्याम्ही इतणे भेड़ अर बळध बलि करे, जिनकी गिणती अर हिसाब भोत होण कै कारण ना हो सकै था। 7फेर याजकां नै यहोवा की वाचा का सन्दूक उसकी जगहां म्ह, यानिके भवन की भीत्तरी कोठड़ी म्ह जो परमपवित्र स्थान सै, पोहचाकै, करूबां के पंखां कै तळै धर दिया।3 8सन्दूक के जगहां कै उप्पर करूब पंख फैलाए होए थे, जिसतै वे उप्पर तै सन्दूक अर उसके डण्ड्याँ नै ढके थे। 9डण्डे तो इतणे लाम्बे थे, के उनके सिरे सन्दूक तै लिकड़े होए भीत्तरी कोठड़ी के स्याम्ही दिखाई पड़ै थे, पर बाहर तै वे दिखाई ना पड़ै थे। वे आज कै दिन ताहीं ओड़ैए सैं। 10सन्दूक म्ह पत्थर की उन दो पटियाँ नै छोड़ किमे ना था, जिन ताहीं मूसा नै होरेब पहाड़ म्ह उसके भित्तर उस बखत धरया, जिब यहोवा नै इस्राएलियाँ के मिस्र तै लिकड़ण कै बाद उनकै गैल करार करया था।

परमेसवर की महिमा

11जिब याजक पवित्रस्‍थान तै लिकड़े (जितने याजक उपस्थित थे, उन सारया नै अपणे-आप ताहीं पवित्र करया था, अर अलग-अलग दलां म्ह होकै सेवा न्ही करया करै थे; 12अर जितने लेवीय गायक थे, वे सारे के सारे यानिके बेट्टे अर भाईयाँ समेत आसाप, हेमान अर यदूतून सण के कपड़े पहरे झाँझ, सारंगियाँ अर वीणा लिये होए, वेदी के पूर्व की ओड़ खड़े थे, अर उनकै गैल एक सौ बीस याजक तुरही बजावै थे।) 13अर जिब तुरही बजाण आळे अर गाणआळे एक स्वर तै यहोवा की स्तुति अर धन्यवाद करण लाग्गे, अर तुरही, झाँझ अर बाजे बजान्दे होए यहोवा की या स्तुति ऊँच्‍चे शब्द तै करण लाग्गे के, “वो भला सै अर उसकी करुणा सदा की सै,” फेर यहोवा के भवन म्ह बाद्दळ छाग्या4, 14अर बाद्दळ के कारण याजक सेवा-पाणी करण नै खड़े ना रह सके, क्यूँके यहोवा का तेज परमेसवर के भवन म्ह भरग्या था5।