Haryanvi Bible
2 इतिहास 36
यहोआहाज का राज्य
योशिय्याह की मौत के बाद, यहूदा के माणसां नै योशिय्याह के बेट्टे यहोआहाज ताहीं लेकै उसके पिता की जगहां पै यरुशलेम म्ह राजा बणाया। जिब यहोआहाज राज करण लाग्या, जिब वो तेईस साल का था, अर तीन महिन्ने ताहीं यरुशलेम म्ह राज करदा रह्या। फेर मिस्र के राजा नै उस ताहीं यरुशलेम म्ह राजगद्दी तै तार दिया, अर देश पै सौ किक्कार चाँदी अर किक्कार भर सोन्ना1 जुर्माना म्ह दण्ड लगाया। फेर मिस्र के राजा नै उसके भाई एलयाकीम ताहीं यहूदा अर यरुशलेम का राजा बणाया अर उसका नाम बदलकै यहोयाकीम धरया; पर नको उसके भाई यहोआहाज नै मिस्र म्ह ले गया।
यहोयाकीम का राज्य
जिब यहोयाकीम राज करण लाग्या, जिब पच्चीस साल का था, अर ग्यारह साल ताहीं यरुशलेम म्ह राज करदा रह्या। उसनै वो काम करया, जो उसके परमेसवर यहोवा की नजर म्ह बुरा सै। उसपै बाबेल के राजा नबूकदनेस्सर नै चढ़ाई करी, अर बाबेल ले जाण खात्तर उस ताहीं पीतळ की बेड़ी पिराह दी। फेर नबूकदनेस्सर नै यहोवा के भवन के कुछ बरतन बाबेल ले जाकै, अपणे मन्दर म्ह जो बाबेल म्ह था, धर दिए। यहोयाकीम के और काम अर उसनै जो-जो घिनोणे काम2 करे, अर उस म्ह जो-जो बुराई पाई गई, वो इस्राएल अर यहूदा के राजयां के इतिहास की किताब म्ह लिक्खी सैं; अर उसका बेट्टा यहोयाकीन उसकी जगहां पै राज करण लाग्या।
यहोयाकीन का राज्य
जिब यहोयाकीन राज करण लाग्या, जिब वो आठ साल का था, अर तीन महिन्ने अर दस दिन ताहीं यरुशलेम म्ह राज करदा रह्या। उसनै वो करया, जो परमेसवर यहोवा की नजर म्ह बुरा सै। नये साल के लागदे ए नबूकदनेस्सर नै माणसां ताहीं भेजकै, उस ताहीं अर यहोवा के भवन के मनभावणे बरतनां ताहीं बाबेल म्ह मँगवा लिया, अर उसके भाई सिदकिय्याह ताहीं यहूदा अर यरुशलेम पै राजा ठहराया।
सिदकिय्याह का राज्य
जिब सिदकिय्याह राज करण लाग्या, जिब वो इक्कीस साल का था, अर यरुशलेम म्ह ग्यारह साल ताहीं राज्य करदा रह्या। उसनै वोए करया, जो उसके परमेसवर यहोवा की नजर म्ह बुरा सै। फेर भी यिर्मयाह नबी यहोवा की और तै बात कहवै था, तोभी वो उसकै स्याम्ही दीन ना होया। फेर नबूकदनेस्सर जिसनै उस ताहीं परमेसवर की कसम खुआई थी, उसतै उसनै बलवा करया, अर उसनै हठ करया अर अपणा मन कठोर करया, के वो इस्राएल के परमेसवर यहोवा की और ना मुड़ै।
यरुशलेम का पतन
सारे प्रधान याजकां नै अर माणसां नै भी गैर जातियाँ के जिसे घिनोणे काम करकै घणा बड़ा बिश्वासघात करया, अर यहोवा के भवन नै जो उसनै यरुशलेम म्ह पवित्र करया था, अशुद्ध कर दिया3।
उनकै पूर्वजां के परमेसवर यहोवा नै बड़ा यत्न करकै अपणे दूत्तां तै उनके धोरै कुह्वा भेज्या, क्यूँके वो अपणी प्रजा अर अपणे धाम पै तरस खावै था; पर वे परमेसवर के दूत्तां नै मजाक म्ह उड़ान्दे, उसके वचनां नै तुच्छ जाणदे, अर उसके नबियाँ की हाँस्सी करै थे। आखर यहोवा अपणी प्रजा पै इसा झुँझळा उठ्या, के बचण का कोए उपाय ना रह्या4।
फेर उसनै उनपै कसदियाँ के राजा तै चढ़ाई करवाई, अर इसनै उनके जवान्ना नै उनके पवित्र भवन ए म्ह तलवार तै मार दिया; अर के जवान, के कुँवारी, के बूढ़े, के पक्के बाल आळे, किसे पै भी दया ना करी; यहोवा नै सारया ताहीं उसके हाथ म्ह कर दिया। के छोट्टे, के बड़े, परमेसवर के भवन के सारे बरतन अर यहोवा के भवन, अर राजा, अर उसके हाकिमां के खजाने, इन सारया ताहीं नबूकदनेस्सर बाबेल म्ह लेग्या। नबूकदनेस्सर की सेना नै परमेसवर का भवन फूँक दिया, अर यरुशलेम की शहरपनाह ताहीं तोड़ दिया, अर आग लगाकै उसके सारे भवनां ताहीं जळाया, अर उस म्ह का सारा बेसकिमती सामान नाश कर दिया। जो तलवार तै बचगे, उन ताहीं वो बाबेल म्ह लेग्या, अर फारस के राज्य के हावी होण ताहीं वे उसके अर उसके बेट्यां-पोत्यां कै अधीन रहे। यो सारा ज्यांतै होया के यहोवा का जो वचन यिर्मयाह के मुँह तै लिकड़या5 था, वो पूरा हो, के देश अपणे आराम की जगहां म्ह सुख भोगदा रहवै। ज्यांतै जिब ताहीं वो सुन्ना पड़या रह्या जिब तक यानिके सत्तर साल के पूरे होण ताहीं उसनै आराम मिल्या।
राजा कुस्रू के शासनकाल म्ह यहूदियाँ की वापसी
फारस के राजा कुस्रू के राज के पैहले साल म्ह यहोवा नै उसके मन ताहीं उभारया के जो वचन यिर्मयाह नबी के मुँह तै लिकड़या था, वो पूरा हो।6 ज्यांतै उसनै अपणे सारे राज्य म्ह यो प्रचार करवाया, अर इस ऊमीद तै चिट्ठी लिखवाई: “फारस का राजा कुस्रू कहवै सै, ‘सुर्ग के परमेसवर यहोवा नै धरती भर का राज्य मेरे ताहीं दिया सै, अर उसे नै मेरे तै हुकम दिया सै के यरुशलेम जो यहूदा म्ह सै उस म्ह मेरा एक भवन बणवा; ज्यांतै हे उसकी प्रजा के सारे माणसों, थारे म्ह तै जो कोए चावै, उसका परमेसवर यहोवा उसके गैल रहवै, वो ओड़ै चल्या जावै।’”
Source notes (6)
- Footnote सोन्ना 3.4 टन चाँदी अर 34 किलो सोन्ना
- Footnote घिनोणे काम इसा प्रतीत होवै सै की यहोयाकीम नै अपणे पिता जरिये नाश की गई मूर्तिपूजा दोबारा शरुआत कर दी थी।
- Footnote यहोवा के भवन नै जो उसनै यरुशलेम म्ह पवित्र करया था, अशुद्ध कर दिया सिदकिय्याह के राज्यकाल के अन्त समय म्ह मूर्तिपूजा सम्बन्धित विभिन्न धार्मिक कृत्य मन्दर के पवित्र परिसर म्ह दाखल हो चुके थे।
- Footnote प्रेरितों 13:41
- Footnote यिर्मयाह के मुँह तै लिकड़या यिर्मयाह 25:11; 29:10
- Footnote वो पूरा हो। यिर्मयाह 29:10
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.