Haryanvi Bible
2 इतिहास 16
अराम कै गैल आसाप का समझौता
आसा के राज्य के छत्तीसवें साल म्ह इस्राएल के राजा बाशा नै यहूदा पै चढ़ाई करी अर रामाह नगर ताहीं ज्यांतै मजबूत करया, के यहूदा के राजा आसा कै धोरै कोए आण-जाण ना पावै। फेर आसा नै यहोवा के भवन अर राजभवन के भण्डारां म्ह तै चाँदी-सोन्ना लिकाड़ दमिश्क1 के बासिंदे अराम के राजा बेन्हदद कै धोरै दूत भेजकै न्यू कह्या, “जिस तरियां मेरे तेरे पिता के बीच उस्से तरियां मेरे अर तेरे बीच भी करार करया जावै; देख मै तेरै धोरै चाँदी-सोन्ना भेज्जू सूं, ज्यांतै आ, इस्राएल के राजा बाशा कै गैल के अपणे करार नै तोड़दे, ताके वो मेरे तै दूर हो।” बेन्हदद नै राजा आसा की या बात मानकै, अपणे दलां के प्रधानां तै इस्राएली नगरां पै चढ़ाई करवा कै इय्योन, दान, आबेल्मैम2 अर नप्ताली गोत्र के सारे भण्डार आळे नगरां ताहीं जीत लिया। या सुणकै बाशा नै रामाह ताहीं मजबूत करणा छोड़ दिया, अर अपणा वो काम बन्द करा दिया। फेर राजा आसा नै पूरे यहूदा देश ताहीं गैल लिया अर रामाह के पत्थरां अर लाकड़ी ताहीं, जिनतै बाशा काम करै था, ठा लेग्या, अर उनतै उसनै गेबा, अर मिस्पा के नगर ताहीं मजबूत करया।
हनानी का सन्देस
उस बखत हनानी दर्शी यहूदा के राजा आसा कै धोरै जाकै कहण लाग्या, “तन्नै जो अपणे परमेसवर यहोवा पै भरोस्सा न्ही राख्या बल्के अराम के राजा ए पै भरोस्सा राख्या सै, इस कारण अराम के राजा की सेना तेरे हाथ तै बचगी सै। के कूशियाँ अर लूबियाँ की सेना बड़ी ना थी, अर के उस म्ह भोत-से रथ, अर सवार ना थे? फेर भी तन्नै यहोवा पै भरोस्सा राख्या था, इस कारण उसनै उन ताहीं तेरे हाथ म्ह कर दिया। देख, यहोवा की नजर सारी धरती पै ज्यांतै फिरदी रहवै सै के जिनका मन उसकी और बेकसूर रहवै सै, उनकी मदद म्ह वो अपणी सामर्थ्य दिखावै। तन्नै यो काम बेकूफी तै करया सै, ज्यांतै इब तै तू लड़ाईयाँ म्ह फँस्या रहवैगा3।” फेर आसा दर्शी पै छो म्ह होया अर उस ताहीं काठ म्ह जड़वा दिया, क्यूँके वो उसकी इसी बात कै कारण उसपै छो म्ह था। अर उसे बखत तै आसा प्रजा के कुछ माणसां पै अत्याचार भी करण लाग्या।
आसा की मौत
शरु तै लेकै अन्त ताहीं आसा के काम यहूदा अर इस्राएल के राजयां के वृत्तान्त म्ह लिखे सैं। अपणे राज्य के उनताळीसवें साल म्ह आसा कै पैर का रोग होया, अर वो रोग घणा बढ़ ग्या, फेर भी उसनै रोगी होकै यहोवा की न्ही वैद्यां ए की शरण ली।4 अन्त म्ह आसा अपणे राज्य के इकताळीसवें साल म्ह मरकै अपणे पुरखां कै गैल जा मिल्या। फेर उसनै उसे की कब्र म्ह जो उसनै दाऊदपुर म्ह खुदवा ली थी, माट्टी दी गई; अर वो सुगन्ध-द्रव्यां अर गंधी के काम के न्यारे-न्यारे ढाळ के मसाल्यां तै भरे होए एक बिछोणे पै लिटा दिया गया, अर भोत सा सुगन्ध-द्रव्य उसकै खात्तर जळाया गया5।
Source notes (5)
- Footnote दमिश्क सीरिया की राजधानी थी
- Footnote आबेल्मैम यो एक इसा नगर था जो उत्तर तै आक्रमण करणीये के खात्तर सबतै उजागर था।
- Footnote इब तै तू लड़ाईयाँ म्ह फँस्या रहवैगा आसा के शरुआत्ती बिश्वास का प्रतिफळ शान्ति थी (2 इतिहास 4:5; 2 इतिहास. 15:5) परन्तु इब उसके बिश्वास की कमी का नतिज्जा युद्ध अर अशान्ति का दण्ड होवैगा।
- Footnote फेर भी उसनै रोगी होकै यहोवा की न्ही वैद्यां ए की शरण ली। बाशा के साथ युद्ध के समय ही न्ही बीमारी की हालत म्ह भी आसा नै माणस की मदद पर बेकार म्ह निर्भरता दर्शाई थी।
- Footnote 1 राजा 15:24
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.