Haryanvi Bible
1 शमूएल 7
फेर किर्यत्यारीम के माणसां नै जाकै यहोवा के सन्दूक ताहीं उठाया, अर अबीनादाब के घर म्ह जो टीले पै बण्या था राख्या, अर यहोवा के सन्दूक की रक्षा करण खात्तर अबीनादाब के बेट्टे एलीआजर ताहीं पवित्र ठहराया करया।
शमूएल नबी अर न्याय के काम
किर्यत्यारीम म्ह सन्दूक ताहीं धरे होए घणे दिन होए, यानिके बीस साल बीतगे, अर इस्राएल का सारा घराना बिलाप करदा होया यहोवा के पाच्छै चाल्लण लाग्या। फेर शमूएल नै इस्राएल के सारे घराने तै कह्या, “जै थम अपणे पूरे मन तै यहोवा की और फिरे हो, तो पराए देवता अर अश्तोरेत देवियाँ ताहीं अपणे बीच म्ह तै दूर करो, अर यहोवा की और अपणा मन लगाकै केवल उसी की उपासना करो, फेर वो थमनै पलिश्तियाँ के हाथ तै छुड़ावैगा।” फेर इस्राएलियाँ नै बाल देवत्यां अर अश्तोरेत देवियाँ ताहीं दूर करया, अर सिर्फ यहोवा ए की उपासना करण लाग्गे।
फेर शमूएल नै कह्या, “सारे इस्राएलियाँ ताहीं मिस्पा नगर म्ह कठ्ठा करो, अर मै थारे खात्तर यहोवा तै प्रार्थना करुँगा।” फेर वे मिस्पा म्ह कठ्ठे होए, अर पाणी भरकै यहोवा के स्याम्ही उण्डेल दिया, अर उस दिन उपवास करया, अर ओड़ै कहण लाग्गे, “हमनै यहोवा के बिरुध्द पाप करया सै।” अर शमूएल नै मिस्पा म्ह इस्राएलियाँ का न्याय करया। जिब पलिश्तियाँ नै सुण्या के इस्राएली मिस्पा म्ह कठ्ठे होए सैं, फेर उनके सरदारां नै इस्राएलियाँ पै चढ़ाई करी। या सुणकै इस्राएली पलिश्तियाँ तै भयभीत होए। अर इस्राएलियाँ नै शमूएल तै कह्या, “म्हारे खात्तर म्हारे परमेसवर यहोवा की दुहाई देणा ना छोड़, जिसतै वो म्हारे ताहीं पलिश्तियाँ के हाथ तै बचावै।” फेर शमूएल नै एक दूध पीन्दा मेम्ना1 ले सर्वांग होमबलि करकै यहोवा ताहीं चढ़ाया; अर शमूएल नै इस्राएलियाँ खात्तर यहोवा की दुहाई दी, अर यहोवा नै उसकी सुण ली। अर जिस बखत शमूएल होमबलि ताहीं चढ़ा रह्या था उस बखत पलिश्ती इस्राएलियाँ के गैल युद्ध करण खात्तर धोरै आ ग्ये, फेर उसे दिन यहोवा नै पलिश्तियाँ के उप्पर बाद्दळ ताहीं बड़े कड़क के गैल गरजाकै उन ताहीं घबरा दिया; अर वे इस्राएलियाँ तै हारगे। फेर इस्राएली आदमियाँ नै मिस्पा तै लिकड़कै पलिश्तियाँ ताहीं खदेड़ा, अर उननै बेतकर नगर के नीच्चै ताहीं मारदे चले गए।
फेर शमूएल नै एक पत्थर लेकै मिस्पा अर शेन नगर के बीच म्ह खड्या करया, अर या कहकै उसका नाम एबेनेजेर2 धरया, “उरै ताहीं यहोवा नै म्हारी मदद करी सै।” फेर पलिश्ती दबगे, अर इस्राएलियाँ के देश म्ह फेर न्ही आए, अर शमूएल के जीवन भर यहोवा का हाथ पलिश्तियाँ के बिरुध्द बण्या रह्या। अर एक्रोन अर गत ताहीं जितने नगर पलिश्तियाँ नै इस्राएलियाँ के हाथ तै छीन लिए थे, वे फेर इस्राएलियाँ के वश म्ह आ गए; अर उनका देश भी इस्राएलियाँ नै पलिश्तियाँ के हाथ तै छुड़ाया। अर इस्राएलियाँ अर एमोरियां के बीच भी संधि होगी।
अर शमूएल जीवन भर इस्राएलियाँ का न्याय करदा रहया। वो हर साल बेतेल अर गिलगाल अर मिस्पा म्ह घूम-घूमकै उन सारी जगहां म्ह इस्राएलियाँ का न्याय करै था। फेर वो रामाह नगर म्ह जित्त उसका घर था बोहड़ आया, अर ओड़ै भी इस्राएलियाँ का न्याय करै था, अर ओड़ै उसनै यहोवा के खात्तर एक वेदी बणाई।
Source notes (2)
- Footnote दूध पीन्दा मेम्ना शमूएल नै बलि खात्तर दूध पियाण आळा मेम्ना लिया यो दर्शावै सै के वो मूसा की व्यवस्था का पालन करण लाग रहया था ( लैव्य. 22:27)।
- Footnote एबेनेजेर : मदद की चट्टान
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.