Haryanvi Bible
1 शमूएल 4
पवित्र सन्दूक की बँधुआई अर बोहड़ाया जाणा
अर शमूएल का वचन सारे इस्राएल देश के धोरै पोहच्या। अर इस्राएली माणस पलिश्तियाँ तै युद्ध करण ताहीं लिकड़े; अर उननै तो एबेनेजेर के आस्सै-पास्सै छावणी डाली, अर पलिश्तियाँ नै अपेक म्ह छावणी डाली। तब पलिश्तियाँ नै इस्राएल देश के बिरुध्द पाँति बाँधी, अर जिब घमासान युद्ध होण लाग्या फेर इस्राएली पलिश्तियाँ तै हारगे, अर उननै कोए च्यार हजार इस्राएली सेना के माणसां ताहीं मैदान म्ह ए मार गेरया। जिब वे माणस छावणी म्ह लौट आए, फेर इस्राएल के अगुवे माणस कहण लाग्गे, “यहोवा नै आज म्हारे ताहीं पलिश्तियाँ तै क्यूँ हरवा दिया? आओ, हम यहोवा की वाचा का सन्दूक शीलो तै माँग ले आवां, के वो म्हारे बीच म्ह आकै हमनै दुश्मनां के हाथ तै बचावै।” फेर उन माणसां नै शीलो शहर म्ह भेजकै ओड़ै तै करूबां के उप्पर विराजण आळे सेनाओं के यहोवा का वाचा का सन्दूक मँगवा लिया; अर परमेसवर की वाचा के सन्दूक के साथ एली के दोन्नु बेट्टे, होप्नी अर पीनहास भी ओड़ै थे।
जिब यहोवा के वाचा का सन्दूक छावणी म्ह पोहच्या, फेर सारे इस्राएली इतणे बल तै ललकार उठे, के धरती गूँज उठ्ठी। इस ललकार का शब्द सुणकै पलिश्तियाँ नै पूच्छया, “इब्रियाँ की छावणी म्ह इसी बड़ी ललकार का के कारण सै?” फेर उननै जाण लिया, के यहोवा का सन्दूक छावणी म्ह आया सै। फेर पलिश्ती डरकै कहण लाग्गे, “उस छावणी म्ह परमेसवर आ ग्या सै।” फेर उननै कह्या, “हाय! म्हारे पै इसी बात पैहले न्ही होई। हाय! इसे महाप्रतापी देवत्यां के हाथ तै हमनै कौण बचावैगा? ये तो वोए देवता सैं जिसनै मिस्रियाँ पै जंगळ म्ह सारी ढाळ की विपत्ति डाली थी। हे पलिश्तियाँ, थम हिम्मत ना हारो, अर पुरुषार्थ जगाओ, कदे इसा न हो के जिस तरियां इब्री लोग थारे अधीन होगे उसे तरियां थम भी उनके अधीन हो जाओ; पुरुषार्थ करकै युद्ध लड़ो।”
फेर पलिश्ती लड़ाई के मैदान म्ह टूट पड़े, अर इस्राएली हार कै अपणे-अपणे डेरे कान्ही भाजण लाग्गे; अर इसा घमासान संहार होया, के तीस हजार इस्राएली मारे गये। अर परमेसवर का सन्दूक छीन लिया गया; अर एली के दोन्नु बेट्टे, होप्नी अर पीनहास, भी मारे गए।
एली की मृत्यु
फेर उस्से दिन एक बिन्यामीनी माणस सेना म्ह तै दौड़कै अपणे कपड़े पाड़े अर सिर पै माट्टी गेरे होए शीलो पोहच्या। वो जिब पोहच्या उस बखत एली, जिसका मन परमेसवर के सन्दूक की चिन्ता तै थरथर काँपण लागरया था, वो राह के किनारे कुर्सी उप्पर बैठ्या बाट देखण लागरया था। अर जिस तरियां ए उस माणस नै नगर म्ह पोहचकै वो समाचार दिया उसे तरियां ए सारा नगर चिल्ला उठ्या। चिल्लाण का शब्द सुणकै एली नै पूच्छया, “इसे हुल्लड़ अर हाहाकार माचण का के कारण सै?” अर उस माणस नै झट जाकै एली ताहीं पूरा हाल सुणाया। एली तो अठानवे साल का था, अर उसकी आँख धुँधळी पड़गी थी, अर उसनै किमे न्ही दिक्खै था। उस माणस नै एली तै कह्या, “मै वोए सूं जो सेना म्ह तै आया सूं; अर मै सेना तै आज ए भाजकै आया सूं।” एली नै कह्या, “हे मेरे बेट्टे, के खबर सै?” उस समाचार देणआळे नै जवाब दिया, “इस्राएली पलिश्तियाँ के स्याम्ही तै भाजगे सैं, अर माणसां का बड़ा भयानक संहार भी होया सै, अर तेरे दोन्नु बेट्टे होप्नी अर पीनहास भी मारे गए, अर परमेसवर का सन्दूक भी छीन लिया गया सै।” जिस तरियां ए उसनै परमेसवर के सन्दूक का नाम लिया उसे तरियां ए एली फाटक कै धोरै कुर्सी पै तै पछाड़ खाकै गिर पड्या; अर बूढ़ा अर भारी होण के कारण उसकी गर्दन टूटगी, अर वो मर ग्या। उसनै तो इस्राएलियाँ का न्याय चाळीस साल तक करया था।
ईकाबोद
उसकी बहू पीनहास की जनान्नी गर्भवती थी, अर उसका बखत करीब था। अर जिब उसनै परमेसवर के सन्दूक के छीन लिए जाण, अर अपणे ससुर अर पति के मरण का समाचार सुण्या, फेर उसनै जच्चा का दर्द उठ्या, अर वा दुहर गई, अर उसकै एक बेट्टा पैदा होया। उसके मरदे-मरदे उन जनानियाँ नै जो उसके आस्सै-पास्सै खड़ी थी उसतै कह्या, “मत डर, क्यूँके तेरै बेट्टा पैदा होया सै।” पर उसनै किमे उत्तर ना दिया, अर ना किमे ध्यान दिया। अर परमेसवर के सन्दूक के छीन लिए जाण अर अपणे ससुर अर पति के कारण उसनै यो कहकै उस बाळक का नाम ईकाबोद धरया, “इस्राएल म्ह तै महिमा उठगी!” फेर उसनै कह्या, “इस्राएल म्ह तै महिमा उठगी सै, क्यूँके परमेसवर का सन्दूक छीन लिया गया सै।”
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.