Haryanvi Bible
1 शमूएल 3
शमूएल की पैहली भविष्यवाणी
वो बाळक शमूएल एली के स्याम्ही यहोवा की सेवा टहल करया करै था। उन दिनां म्ह यहोवा का वचन दुर्लभ था; अर दर्शन कम मिल्या करै था। अर उस बखत इसा होया के (एली की आँख तो धुँधळी होण लाग्गी थी अर उसनै ना सूझ पड़ै था) जिब वो अपणी जगहां म्ह लेट्या होया था, अर परमेसवर का दीवा इब ताहीं बुझ्या न्ही था, अर शमूएल यहोवा के मन्दर म्ह जित्त परमेसवर का सन्दूक था, लेट्या था; फेर यहोवा नै शमूएल ताहीं पुकारया; अर उसनै कह्या, “के हुकम सै!” फेर उसनै एली कै धोरै दौड़कै कह्या, “के हुकम सै, तन्नै तो मेरे ताहीं पुकारया सै।” उसनै कह्या, “मन्नै न्ही पुकारया; अर कह्या, जा लेट जा।” तो वो जाकै लेट ग्या। अर यहोवा नै फेर पुकारकै कह्या, “हे शमूएल!” शमूएल उठकै एली कै धोरै गया, अर कह्या, “के हुकम सै, तन्नै मेरे ताहीं फेर पुकारया।” उसनै कह्या, “हे मेरे बेट्टे, मन्नै न्ही पुकारया; अर कह्या, जा लेट जा।” उस बखत तो शमूएल यहोवा नै न्ही जाणै था, अर ना यहोवा का वचन उस पर प्रगट होया था। फेर तीसरी बार यहोवा नै शमूएल ताहीं पुकारया। अर वो उठकै एली धोरै गया, अर कह्या, “के हुकम सै, तन्नै तो मेरे ताहीं पुकारया सै।” तब एली नै समझ लिया के इस बाळक ताहीं यहोवा नै पुकारया सै। ज्यांतै एली नै शमूएल तै कह्या, “जा लेट जा; अर जै वो तन्नै फेर पुकारै, तो तू कहिये, ‘हे यहोवा, कह, क्यूँके तेरा दास सुणण लागरया सै।’” फेर शमूएल अपणी जगहां पै जाकै लेट ग्या।
फेर यहोवा आ खड्या होया, अर पैहल्या की तरियां पुकारया, “शमूएल! शमूएल!” शमूएल नै कह्या, “कह, क्यूँके तेरा दास सुणण लागरया सै।” यहोवा नै शमूएल तै कह्या, “सुण, मै इस्राएल म्ह एक इसा काम करण पै सूं, जिसतै सारे सुणण आळयां पै बड़ा सन्नाटा छा जावैगा। उस दिन मै एली के बिरुध्द वो सारा किमे पूरा करुँगा जो मन्नै उसके घराने के बारै म्ह कह्या, उसनै शरुआत तै अन्त ताहीं पूरा करुँगा। क्यूँके मै तो उस ताहीं यो कहकै जता चुक्या सूं, के मै उस अधर्म का दण्ड जिसनै वो जाणै सै सदा खात्तर उसके घर नै हमेशा खात्तर दंड दियुँगा, क्यूँके उसके बेट्टे आप श्रापित होए सैं, अर उसनै उन ताहीं न्ही रोक्या। इस कारण मन्नै एली के घराने के बारै म्ह या शपथ खाई, के एली के घराने के अधर्म का प्रायश्चित ना तो मेलबलि तै कदे होवैगा, अर ना अन्नबलि तै।”
अर शमूएल भोर तक लेट्या रह्या; फेर उसनै यहोवा के भवन के किवाड़ां ताहीं खोल्या। अर शमूएल एली ताहीं उस दर्शन की बात बताण तै डरया। फेर एली नै शमूएल ताहीं पुकारकै कह्या, “हे मेरे बेट्टे, शमूएल।” वो बोल्या, “के हुकम सै।” फेर उसनै पूच्छया, “वा कौण सी बात सै जो यहोवा नै तेरे तै कही सै? उसनै मेरे तै ना छुपा। जो कुछ उसनै तेरे तै कह्या हो जै तू उस म्ह तै किमे भी मेरे तै छुपावै, तो परमेसवर तेरे साथ उसाए बलके उसतै भी घणा करै।” फेर शमूएल नै उस ताहीं रत्ती-रत्ती बात कह सुणाई, अर किमे भी ना लूका कै राख्या। उसनै कह्या, “वो तो यहोवा सै; जो किमे वो भला जाणै वोए करै।”
अर शमूएल बड़ा होन्दा गया, अर यहोवा उसकै गैल रह्या, अर उसनै शमूएल की कोए भी भविष्यवाणी निष्फल होण न्ही दी। अर उत्तर म्ह दान नगर तै दक्षिण म्ह बेर्शेबा नगर तक के रहणआळे सारे इस्राएलियाँ नै जाण लिया के शमूएल यहोवा का नबी होण के खात्तर नियुक्त करया गया सै। अर यहोवा नै शीलो म्ह फेर दर्शन दिया, क्यूँके यहोवा नै अपणे आप ताहीं शीलो म्ह शमूएल पै अपणे वचन के जरिये प्रगट करया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.