Haryanvi Bible
1 इतिहास 4
यहूदा की वंशावली
यहूदा के बेट्टे: पेरेस, हेस्रोन, कर्मी, हूर अर शोबाल1। अर शोबाल के बेट्टे: रायाह तै यहत अर यहत तै अहूमै अर लहद पैदा होए, ये सोराई कुल सैं। एताम के पिता के ये बेट्टे होए यानिके यिज्रेल, यिश्मा अर यिद्वाश, जिनकी भाण का नाम हस्सलेलपोनी था; अर गदोर का पिता पनूएल, अर हूशाह का पिता एजेर। ये एप्राता के जेठ्ठे हूर की सन्तान थे, जो बैतलहम का पिता होया। अर तकोआ के पिता अशहूर कै हेला अर नारा नाम की दो जनानियाँ थी। नारा तै अहुज्जाम, हेपेर, तेमनी अर हाहशतारी पैदा होए, नारा के येए बेट्टे होए। अर हेला के बेट्टे, सेरेत, यिसहर अर एत्ना। कोस तै आनूब अर सोबेबा पैदा होए अर उसकै वंश म्ह हारूम के बेट्टे अहर्हेल के कुल भी पैदा होए। अर याबेस अपणे भाईयाँ तै घणा प्रतिष्ठित होया, अर उसकी माँ नै यो कहकै उसका नाम याबेस2 राख्या, “मन्नै इसनै पीड़ित होकै पैदा करया।” अर एक दिन याबेस नै इस्राएल के परमेसवर तै या कहकै पुकारया, “भला होन्दा, के तू मन्नै सचमुच आशीष देन्दा, अर मेरा देश बढ़ान्दा, अर तेरा हाथ मेरै गैल रहन्दा, अर तू मन्नै बुराई तै इसा बचाए राखदा के मै उसतै पीड़ित ना होन्दा!” अर जो किमे उसनै मांग्या, वो परमेसवर नै उसतै दिया। फेर शूहा के भाई कलूब तै एशतोन का पिता महीर पैदा होया। एशतोन के वंश म्ह बेतरापा का घरान्नां, अर पासेह अर ईर्नाहाश का पिता तहिन्ना पैदा होए, रेका नगर के माणस येए सैं। कनज के बेट्टे: ओत्नीएल अर सरायाह, अर ओत्नीएल का बेट्टा हतत। मोनोतै तै ओप्रा अर सरायाह तै योआब जो गेहराशीम का पिता होया; वे कारीगर थे। अर यपुन्ने के बेट्टे कालेब के बेट्टे: ईरू, एला अर नाम; अर एला के बेट्टे: कनज। यहलेल के बेट्टे, जीप, जीपा, तीरया अर असरेल। अर एज्रा के बेट्टे: येतेर, मेरेद, एपेर अर यालोन, अर उसकी घरआळी तै मिर्याम, शम्मै अर एश्तमो का पिता यिशबह पैदा होए। उसकी यहूदिन औरत तै गदोर का पिता येरेद, सोको के पिता हेबेर अर जानोह के पिता यकूतीएल पैदा होए, ये फिरौन राजा की बेट्टी बित्या के बेट्टे थे जिसनै मेरेद ब्याह लिया था। अर होदिय्याह की घरआळी जो नहम की भाण थी, उसके बेट्टे: कीला का पिता एक गेरेमी अर एश्तमो का पिता एक माकाई। अर शिमोन के बेट्टे: अम्नोन, रिन्ना, बेन्हानान अर तोलोन; अर यिशी के बेट्टे: जोहेत अर बेनजोहेत। यहूदा के बेट्टे शेला के बेट्टे: लेका का पिता एर, मारेशा का पिता लादा अर बेत-अशबे म्ह उस घरान्ने के कुल जिस म्ह सण के कपड़े का काम होवै था; अर योकीम अर कोजेबा के माणस अर योआश अर साराप जो मोआब3 म्ह प्रभुता करैं थे अर याशूब, लेहेम इनका पुराणा जिक्र सै। ये कुम्हार थे, अर नताईम अर गदेरा म्ह रहवैं थे जित्त वे राजा का काम-काज करदे होए उसकै धोरै रहवैं थे।
शिमोन के वंशज
शिमोन के बेट्टे: नमूएल, यामीन, यारीब, जेरह अर शाऊल; अर शाऊल का बेट्टा शल्लूम, शल्लूम का बेट्टा मिबसाम अर मिबसाम का मिश्मा होया। अर मिश्मा का बेट्टा हम्मूएल, उसका बेट्टा जक्कूर, अर उसका बेट्टा शिमी। शिमी के सोलह बेट्टे अर छः बेटियाँ होई पर उसके भाईयाँ के घणे बेट्टे न्ही होए; अर उनका सारा कुल यहूदियाँ के बराबर ना बढ़या। वे बेर्शेबा, मोलादा, हसर्शूआल, बिल्हा, एसेम, तोलाद, बतूएल, होर्मा, सिकलग, बेत्मर्काबोत, हसर्सूसीम, बेतबिरी अर शारैंम म्ह बसगे; दाऊद के राज्य कै बखत उनके येए नगर रहे। अर उनके गाम एताम, ऐन, रिम्मोन, तोकेन अर आशान नाम के पाँच नगर; अर बाल जितने गाम इन नगरां कै आस्सै-पास्सै थे, उनकै बसण की जगहां योए थी, अर या उनकी वंशावली सैं।
फेर मशोबाब अर यम्लेक अर अमस्याह का बेट्टा योशा, अर योएल अर योशिब्याह का बेट्टा येहू, जो सरायाह का पोत्ता, अर असीएल का पड़पोत्ता था, अर एल्योएनै अर याकोबा, यशोहायाह अर असायाह अर अदीएल अर यसीमीएल अर बनायाह, अर शिपी का बेट्टा जीजा जो अल्लोन का बेट्टा, यो यदायाह का बेट्टा, यो शिम्री का बेट्टा, यो शमायाह का बेट्टा था। ये जिनके नाम लिखे होए सैं, अपणे-अपणे कुल म्ह प्रधान थे; अर उनके पितरां के घरान्ने घणे बढ़गे। ये अपणी भेड़-बकरियाँ कै खात्तर चराई ढूँढ़ण नै गदोर शहर की घाटी की तराई कै पूर्व और गए। अर उन बढ़िया तै बढ़िया चराई मिली, अर देश लाम्बा-चौड़ा, चैन अर शान्ति का था; क्यूँके ओड़ै के पैहले रहणआळे हाम के वंश4 के थे। अर जिनके नाम उप्पर लिखे सैं, उन यहूदा के राजा हिजकिय्याह के दिनां म्ह ओड़ै आकै जो मूनी ओड़ै मिले, उन डेरां समेत मारकै इसा सत्यानाश कर दिया के आज उनका पता न्ही सै, अर वे उनकी जगहां म्ह रहण लाग्गे, क्यूँके ओड़ै उनकी भेड़-बकरियाँ कै खात्तर चराई थी। अर उन म्ह तै यानिके शिमोनियां म्ह तै पाँच सौ माणस अपणे उप्पर पलत्याह, नार्याह, रपायाह अर उज्जीएल नाम यिशी के बेट्यां तै अपणा प्रधान ठहराया; फेर वे सेईद पहाड़ पै गए, अर जो अमालेकी बचकै रह गए थे उन ताहीं मारया, अर आज कै दिन ओड़ै रहवैं सैं।
Source notes (4)
- Footnote उरै बेट्यां ताहीं “वंशजां” के अर्थ म्ह समझा जाणा चाहिए, क्यूँके इस सूची म्ह सिर्फ पेरेस यहूदा का बेट्टा था।
- Footnote याबेस यो एक हैरान करण आळी बात सै के याबेस का परिचय बिना बखान करया गया सै जिसा के वो एक प्रसिद्ध आदमी था। याबेस के नाम का मतलब सै दुःखी अर उसकी मनोकामना थी के उसनै उसके नाम का जो मतलब सै वो उसपै ना घटै।
- Footnote मोआब दाऊद नै मोआब जीत लिया था (2 शमू 8:2) अर फेर ओम्री नै उस ताहीं जीत्या अर अहाब की मौत वो इस्राएल कै अधीन रहया। (2 राजा 3:5)
- Footnote हाम के वंश वे नूह के बेट्टे हाम के वंशज थे
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.