Haryanvi Bible
1 इतिहास 29
मन्दर निर्माण खात्तर भेंट
फेर राजा दाऊद नै सारी सभा तै कह्या, “मेरा बेट्टा सुलैमान सुकुमार छोरा सै, अर केवल उसे ताहीं परमेसवर नै चुण्या सै; काम तो भारी सै, क्यूँके यो भवन माणस कै खात्तर न्ही, पर यहोवा परमेसवर कै खात्तर बणैगा। मन्नै तो अपणी शक्ति भर, अपणे परमेसवर कै भवन के निमित्त सोन्ने की चिज्जां कै खात्तर सोन्ना, चाँदी की चिज्जां कै खात्तर चाँदी, पीतळ की चिज्जां कै खात्तर पीतळ, लोहे की चिज्जां कै खात्तर लोहा, अर लाकड़ी की चिज्जां कै खात्तर लाकड़ी, अर सुलैमानी पत्थर, अर जड़ण कै लायक मणि, अर पच्चीकारी के काम कै खात्तर अलग-अलग रंगां के नग, अर सारे तरियां के मणि अर भोत सा संगमरमर कठ्ठा करया सै। फेर मेरा मन अपणे परमेसवर कै भवन म्ह लाग्या सै, इस कारण जो कुछ मन्नै पवित्र भवन कै खात्तर कठ्ठा करया सै, उस सबतै ज्यादा मै अपणा निज धन1 भी जो सोन्ना-चाँदी के रूप म्ह मेरै धोरै सै, अपणे परमेसवर के भवन कै खात्तर दे देऊँ सूं। यानिके तीन हजार किक्कार ओपीर का सोन्ना, अर सात हजार किक्कार तपाई होई चाँदी2, जिसतै कोठरियां की भींत मढ़ी जावै। अर सोन्ने की चिज्जां कै खात्तर सोन्ना, अर चाँदी की चिज्जां कै खात्तर चाँदी, अर कारीगरां तै बणाण आळे सारे ढाळ के काम कै खात्तर मै उस ताहीं देऊँ सूं। अर कौण अपणी इच्छा तै यहोवा कै खात्तर अपणे आप ताहीं अर्पण कर देवै सै3?”
फेर पितरां के घरान्यां के प्रधानां अर इस्राएल के गोत्रां के हाकिमां अर सहस्त्रपतियाँ अर शतपतियाँ अर राजा कै काम के अधिकारियां नै अपणी-अपणी इच्छा तै, परमेसवर के भवन के काम कै खात्तर पाँच हजार किक्कार अर दस हजार दर्कमोन सोन्ना, दस हजार किक्कार चाँदी, अठारह हजार किक्कार पीतळ, अर एक लाख किक्कार लोहा दे दिया4। अर जिनकै धोरै मणि थे, उननै उन ताहीं यहोवा के भवन के खजाने कै खात्तर गेर्शोनी यहीएल के हाथ म्ह दे दिया। फेर प्रजा के माणस आनन्दित होए, क्यूँके हाकिमां नै खुश होकै खरे मन अर अपणी-अपणी इच्छा तै यहोवा कै खात्तर भेंट दी थी; अर दाऊद राजा घणाए आनन्दित होया।
दाऊद कै जरिये परमेसवर का धन्यवाद
फेर दाऊद नै सारी सभा के स्याम्ही यहोवा का धन्यवाद करया, अर दाऊद नै कह्या, “हे यहोवा! हे म्हारे मूलपुरुष इस्राएल के परमेसवर! अनादिकाल तै अनन्त काल तक तू धन्य सै। हे यहोवा! महिमा, पराक्रम, शोभा, सामर्थ्य अर वैभव, तेराए सै; क्यूँके अकास अर पृथ्वी म्ह जो कुछ सै, वो तेराए सै; हे यहोवा! राज्य तेरा सै, अर तू सब कै उप्पर खास अर महान ठहरया सै5। धन अर महिमा तेरी और तै मिलै सैं, अर तू सारया कै उप्पर प्रभुता करया करै सैं। सामर्थ्य अर पराक्रम तेरे ए हाथ म्ह सैं, अर सारे माणसां ताहीं बढ़ाणा अर बल देणा तेरे हाथ म्ह सै। इस करकै इब हे म्हारे परमेसवर! हम तेरा धन्यवाद अर तेरे महिमायुक्त नाम की स्तुति करां सां।”
“मै के सूं अर मेरी प्रजा के सै? के हमनै इस तरियां तै अपणी इच्छा तै तेरे ताहीं भेंट देण की शक्ति मिलै? तेरे तै तो सारा किमे मिलै सै, अर हमनै तेरै हाथ तै पाकै तेरे तै दिया सै। तेरी निगांह म्ह हम तो अपणे सारे पुरखाओं कै बराबर पराए अर परदेशी सैं; धरती पै म्हारे दिन छां की तरियां बीत जावैं सैं, अर म्हारा किमे ठिकाणा न्ही6। हे म्हारे परमेसवर यहोवा! वो जो बड़ा संचय हमनै तेरे पवित्र नाम का एक भवन बणाण कै खात्तर करया सै, वो तेरे ए हाथ तै हमनै मिल्या था, अर सारा तेराए सै। अर हे मेरे परमेसवर! मै जाणु सूं के तू मन नै जाँच्चै सै अर सिधाई तै खुश रहवै सै; मन्नै तो यो सारा किमे मन की सिधाई अर अपणी इच्छा तै दिया सै; अर इब मन्नै आनन्द तै देख्या सै, के तेरी प्रजा के माणस जो उरै उपस्थित सैं, वो अपणी इच्छा तै तेरै खात्तर भेंट देवै सैं। हे यहोवा! हे म्हारे पुरखा अब्राहम, इसहाक अर इस्राएल के परमेसवर! अपणी प्रजा के मन के विचारां म्ह या बात बणाए राख अर उनके मन अपणी और लगाऐ राख7। अर मेरे बेट्टे सुलैमान का मन इसा खरा कर दे के वो तेरे हुकमां, चितौनियाँ अर विधियाँ नै मानदा रहवै अर यो सारा किमे करे, अर उस भवन नै बणावै, जिसकी त्यारी मन्नै करी सै।”
फेर दाऊद नै सारी सभा तै कह्या, “थम अपणे परमेसवर यहोवा का धन्यवाद करो।” फेर सभा के सारे माणसां नै अपणे पितरां के परमेसवर यहोवा का धन्यवाद करया, अर अपणा-अपणा सिर झुकाकै यहोवा तै अर राजा ताहीं दण्डवत करया।
सुलैमान का राज्याभिषेक
अर दुसरे दिन उननै यहोवा कै खात्तर बलिदान करे, यानिके अर्घां समेत एक हजार बळध, एक हजार मिंढे अर एक हजार भेड़ के बच्चे होमबलि करकै चढ़ाए, अर सारे इस्राएल कै खात्तर घणे सारे मेलबलि चढ़ाए। उसे दिन यहोवा कै स्याम्ही उननै बड़े आनन्द तै खाया अर पिया।
फेर उननै दाऊद के बेट्टे सुलैमान ताहीं दुसरी बार राजा ठहराकै यहोवा की और तै प्रधान होण कै खात्तर उसका अर याजक होण कै खात्तर सादोक का अभिषेक करया। फेर सुलैमान अपणे पिता दाऊद की जगहां पै राजा होकै यहोवा के सिंहासन पै विराजण लाग्या अर समृद्ध होया, अर इस्राएल उसकै अधीन होया। अर सारे हाकिमां अर शूरवीरां अर राजा दाऊद के सारे बेट्टयाँ नै सुलैमान राजा की अधीनता अंगीकार करी। अर यहोवा नै सुलैमान ताहीं सारे इस्राएल के देखदे घणाए बढ़ाया, अर उसतै इसा राजकीय ऐश्वर्य दिया, जिसा उसतै पैहले इस्राएल के किसे राजा का ना होया था।
दाऊद की मौत
इस तरियां यिशै के बेट्टे दाऊद नै सारे इस्राएल कै उप्पर राज करया। अर उसके इस्राएल पै राज करण का समय चाळीस साल का था; उसनै सात साल तो हेब्रोन म्ह अर तैंतीस साल यरुशलेम म्ह राज करया। अर वो पूरे बुढ़ापे की अवस्था म्ह लम्बी उम्र का होकै अर धन अर वैभव, मन मान्या भोग कै मर ग्या; अर उसका बेट्टा सुलैमान उसकी जगहां पै राजा होया। आदि तै अन्त ताहीं राजा दाऊद के सारे काम्मां का वृत्तान्त, अर उसके सारे राज्य अर पराक्रम का, अर उसपै अर इस्राएल पै, बलके देश-देश दे सारे राज्याँ पै जो किमे बीत्या, इसका भी वृत्तान्त शमूएल दर्शी अर नातान नबी अर गाद दर्शी8 की किताबां म्ह लिख्या होया सै।
Source notes (8)
- Footnote निज धन वो इस दान की सरेआम घोषणा करै सै के जनता भी प्रोत्साहित होकै देवै।
- Footnote तीन हजार किक्कार ओपीर का सोन्ना, अर सात हजार किक्कार तपाई होई चाँदी सौ टन ओपीर सोन्ना अर लगभग 240 टन शुद्ध चाँदी
- Footnote अर्पण कर देवै सै यहोवा की सेवा म्ह सर्वांग समर्पण। इन शब्दां जरिये जनता तै खुद की इच्छा दान का आग्रह करया गया सै।
- Footnote 170 टन तै घणा सोन्ना, 340 टन तै घणा चाँदी, लगभग 620 टन कांस्य अर 3,400 टन तै घणा लोहा।
- Footnote प्रकाशितवाक्य 5:12-13
- Footnote इब्रानियों। 11:13, भजन संहिता 39:12, 114:4
- Footnote सहजता अर खुद की इच्छा तै दान देण कै खात्तर उनकी आत्मा नै बणाए राख अर उनके मन अपणे म्ह स्थिर राख।
- Footnote शमूएल दर्शी अर नातान नबी अर गाद दर्शी किसे-किसे अनुवाद म्ह गाद साफ-साफ शमूएल का पद उच्चतर उपाधि का सै जो सिर्फ उसे अर हनानी तै दिया गया था।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.