Haryanvi Bible
1 इतिहास 16
सन्दूक का तम्बू म्ह राख्या जाणा
फेर परमेसवर का सन्दूक ल्याकै उस तम्बू म्ह धरया गया जो दाऊद नै उसकै खात्तर खड़या कराया था; अर परमेसवर कै स्याम्ही होमबलि अर मेलबलि चढ़ाए गए। जिब दाऊद होमबलि अर मेलबलि चढ़ा चुक्या, फेर उसनै यहोवा कै नाम तै प्रजा ताहीं आशीर्वाद दिया। अर उसनै के माणस, के जनान्नी, सारे इस्राएलियाँ ताहीं एक-एक रोट्टी अर एक-एक टुकड़ा माँस अर किशमिश की एक-एक टिकिया बँटवा दी।
फेर उसनै कई लेवियाँ ताहीं ज्यांतै ठहरा दिया, के यहोवा के सन्दूक कै स्याम्ही सेवा पाणी करया करैं, अर इस्राएल के परमेसवर यहोवा की चर्चा अर उसका धन्यवाद अर स्तुति करया करैं। उनका मुखिया तो आसाप था, अर उसकै नीच्चै जकर्याह था, फेर यीएल, शमीरामोत, यहीएल, मत्तित्याह, एलीआब बनायाह, ओबेदेदोम अर यीएल थे; ये तो सारंगियाँ अर वीणा लिये होए थे, अर आसाप झाँझ पै राग बजावै था। बनायाह अर यहजीएल नाम के याजक परमेसवर के वाचा के सन्दूक कै स्याम्ही रोज तुरहियाँ बजाण कै खात्तर नियुक्त करे गए।
दाऊद कै जरिये धन्यवाद गीत
फेर उसे दिन दाऊद नै यहोवा का धन्यवाद करण का काम आसाप अर उसके भाईयाँ तै सौंप दिया।
यहोवा का धन्यवाद करो1, उसतै प्रार्थना करो;
देश-देश म्ह उसके काम्मां का प्रचार करो।
उसका गीत गाओ, उसका भजन करो,
उसके सारे आश्चर्यकर्मा का ध्यान करो।
उसके पवित्र नाम पै घमण्ड करो;
यहोवा के खोजियाँ का मन आनन्दित हो।
यहोवा अर उसकी सामर्थ्य की खोज करो;
उसके दर्शन कै खात्तर लगातार खोज करो।
उसके करे होए चमत्कार,
उसके चमत्कार अर न्यायवचन याद करो।
हे उसके दास इस्राएल के वंश,
हे याकूब की सन्तान थम जो उसके चुणे होए सो!
वोए म्हारा परमेसवर यहोवा सै,
उसके न्याय के काम धरती भर म्ह होवै सैं।
उसके करार नै सदा याद राक्खो,
यो वोए वचन सै जो उसनै हजार पीढ़ियाँ कै खात्तर ठहरा दिया।
वो करार उसनै अब्राहम कै गैल बाँध्या
और उसे कै बारै म्ह उसनै इसहाक तै शपथ खाई,
अर उसे ताहीं उसनै याकूब कै खात्तर विधि
करकै अर इस्राएल कै खात्तर सदा का करार बाँधकै यो कहकै दृढ़ करया,
“मै कनान देश तेरै ताहीं दियुँगा,
वो बाँट म्ह थारा अपणा हिस्सा होवैगा।”
उस बखत तो थम गिणती म्ह थोड़े थे,
बलके घणेए थोड़े अर उस देश म्ह परदेशी थे।
अर वे एक जात तै दुसरी जात म्ह,
अर एक राज्य तै दुसरे म्ह फिरदे तो रहे,
पर उसनै किसे माणस ताहीं उनपै अंधेर करण ना दिया;
अर वो राजयां ताहीं उनकै निमित्त या धमकी देवै था,
“मेरे अभिषिक्तां नै ना छूओ,
अर ना मेरे नबियाँ का किमे नुकसान करो।”
हे सारे पृथ्वी के माणसों यहोवा का गीत गाओ।
रोज उसके करे होए उद्धार का शुभ समाचार सुणान्दे रहो।
गैरजात्तां म्ह उसकी महिमा का,
अर देश-देश के माणसां म्ह उसके अदभुत काम्मां का जिक्र करो।
क्यूँके यहोवा महान अर स्तुति के अति योग्य सै,
वो तो सारे देवत्यां तै घणा भययोग्य सै।
क्यूँके देश-देश के सारे देवता तो मूर्ति ए सैं;
पर यहोवा ए नै सुर्ग ताहीं बणाया सै।
उसके च्यांरु ओड़ वैभव अर ऐश्वर्य सै;
उसकी जगहां म्ह सामर्थ्य अर आनन्द सै।
हे देश-देश के कुलों, यहोवा का गुणानुवाद करो,
यहोवा की महिमा अर सामर्थ्य नै मान्नो।
यहोवा के नाम की महिमा इसी मान्नो जो उसके नाम कै योग्य सै।
भेंट लेकै उसकै स्याम्ही आओ,
पवित्रता तै शोभायमान होकै यहोवा नै दण्डवत करो।
हे सारी धरती के माणसों उसकै स्याम्ही थरथराओ!
जगत इसा स्थिर सै, के वो टळण का न्ही।
अकास आनन्द करै अर पृथ्वी मगन हो,
अर जात-जात म्ह लोग कहवै, “यहोवा राजा होया सै।”
समुन्दर अर उस म्ह की सारी चीज गरज उठै,
मैदान अर जो किमे उस म्ह सै वो प्रफुल्लित हो।
उसे बखत बण के पेड़ यहोवा कै स्याम्ही जयजयकार करैं,
क्यूँके वो धरती का न्याय करण नै आण आळा सै।
यहोवा का धन्यवाद करो, क्यूँके वो भला सै;
उसकी करुणा सदा की सै।
अर या कहो, “हे म्हारे उद्धार करण आळे परमेसवर म्हारा उद्धार कर,
अर हमनै कठ्ठा करकै गैरजात्तां तै छुड़ा,
के हम तेरे पवित्र नाम का धन्यवाद करां,
अर तेरी स्तुति करदे होए तेरै बारै म्ह बड़ाई करां2।
शरुआत तै अनन्त काल ताहीं इस्राएल का
परमेसवर यहोवा धन्य सै।”
फेर सारी प्रजा नै “आमीन” कह्या: अर यहोवा की स्तुति करी। फेर उसनै ओड़ै यानिके यहोवा की वाचा के सन्दूक कै स्याम्ही आसाप अर उसके भाईयाँ ताहीं छोड़ दिया, के रोज की जरूरत कै मुताबिक वे सन्दूक के स्याम्ही रोज सेवा पाणी करया करैं, अर अड़सठ भाईयाँ समेत ओबेदेदोम ताहीं, अर द्वारपालां कै खात्तर यदूतून के बेट्टे ओबेदेदोम अर होसा ताहीं छोड़ दिया। फेर उसनै सादोक याजक अर उसके भाई याजकां ताहीं यहोवा के निवास कै स्याम्ही, जो गिबोन के ऊँच्ची जगहां म्ह था, ठहरा दिया, के वे रोज सबेरै अर शाम नै होमबलि की वेदी3 पै यहोवा ताहीं होमबलि चढ़ाया करै, अर उन सारे कै मुताबिक करया करैं, जो यहोवा के नियम-कायदे म्ह लिख्या सै, जिन ताहीं उसनै इस्राएल तै दिए थे। अर उनकै गैल उसनै हेमान अर यदूतून अर दुसरयां ताहीं भी जो नाम लेकै चुणे गए थे ठहरा दिया, के यहोवा की सदा की करुणा कै कारण उसका धन्यवाद करैं। अर उनकै गैल उसनै हेमान अर यदूतून ताहीं बजाण आळयां कै खात्तर तुरहियाँ अर झाँझें अर परमेसवर के गीत गाण कै खात्तर बाजे दिए, अर यदूतून के बेट्यां ताहीं फाटक की रुखाळी करण नै ठहरा दिया।
फेर प्रजा के सारे माणस अपणे-अपणे घर चले गए, अर दाऊद अपणे घरान्ने नै आशीर्वाद देण नै बोहड़ ग्या।
Source notes (3)
- Footnote यहोवा का धन्यवाद करो इतिहासकार नै म्हारे अाग्गै जो भजन राख्या सै वो आराधना विधि सरूप आसाप अर उसके भाईयाँ कै जरिये उस बखत गाया गया था जिब वाचा का सन्दूक यरुशलेम म्ह प्रवेश कर रहया था।
- Footnote बड़ाई करां भजन. 106:47
- Footnote होमबलि की वेदी होमबलि की वेदी (निर्ग. 27:1-8) गिबोन म्ह मिलापआळे तम्बू ए म्ह थी (2 इति. 1:3, 2 इति. 1:5) हो सकै सै के दाऊद नै यरुशलेम म्ह बलि चढ़ाण कै खात्तर एक नई वेदी बणाई।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.