Haryanvi Bible
1 इतिहास 11
दाऊद ताहीं पूरे इस्राएल का राजा ठहराया गया
फेर सारे इस्राएली दाऊद कै धोरै हेब्रोन म्ह कठ्ठे होकै कहण लाग्गे, “सुण, हम माणस अर तू एक ए हाड्डी अर माँस सां। पिछले दिनां म्ह जिब शाऊल राजा था, फेर भी इस्राएलियाँ का अगुआ तू ए था, अर तेरे परमेसवर यहोवा नै तेरे तै कह्या, ‘मेरी प्रजा इस्राएल का पाळी, अर मेरी प्रजा इस्राएल का प्रधान, तू ए होवैगा1।’” ज्यांतै सारे इस्राएली अगुवे हेब्रोन म्ह राजा कै धोरै आए, अर दाऊद नै उनकै गैल हेब्रोन म्ह यहोवा कै स्याम्ही करार करया; अर उननै यहोवा के वचन कै मुताबिक, जो उसनै शमूएल तै कह्या था, इस्राएल का राजा होण कै खात्तर दाऊद का अभिषेक करया।
फेर सारे इस्राएलियाँ समेत दाऊद यरुशलेम गया, जो यबूस भी कुह्वावै था, अर ओड़ै यबूसी नाम के उस देश के निवासी रहवैं थे। फेर यबूस के बासिन्दया नै दाऊद तै कह्या, “तू उरै आण न्ही पावैगा।” फेर भी दाऊद नै सिय्योन नाम के गढ़ ताहीं ले लिया, वोए दाऊदपुर भी कुह्वावै सै। दाऊद नै कह्या, “जो कोए यबूसियाँ ताहीं सारे तै पैहल्या मारैगा, वो खास सेनापति होवैगा,” फेर सरूयाह का बेट्टा योआब2 सारे तै पैहल्या चढ़ गया, अर सेनापति बणग्या। फेर दाऊद उस गढ़ म्ह रहण लाग्या, ज्यांतै उसका नाम दाऊदपुर पड़या। अर उसनै नगर के च्यांरु ओड़, यानिके मिल्लो तै लेकै च्यांरु ओड़ शहरपनाह बणवाई, अर योआब नै बचे होए नगर के खण्डहरां ताहीं फेर बसाया। अर दाऊद का आदर-मान घणा बढ़दा गया अर सेनाओं का यहोवा उसकै गैल था।
दाऊद के शूरवीर
यहोवा नै इस्राएल कै बारै म्ह जो वचन कह्या था, उसके मुताबिक दाऊद के जिन शूरवीरां नै सारे इस्राएलियाँ समेत उसके राज्य म्ह उसकै पक्ष म्ह होकै, उसतै राजा बणाण का जोर दिया, उन म्ह तै खास आदमी ये सै। दाऊद के शूरवीरां की नामावली यो सै, यानिके एक हक्मोनी का बेट्टा याशोबाम जो तीसां म्ह खास था, उसनै तीन सौ माणसां पै भाला चलाकै, उन ताहीं एक ए बखत म्ह मार गेरया।
उसकै बाद अहोही दोदो का बेट्टा एलियाजर जो तीन्नु महान वीरां म्ह तै एक था। वो पसदम्मीम म्ह जित्त जौ का एक खेत था, दाऊद कै गैल रहया जिब पलिश्ती ओड़ै युद्ध करण नै कठ्ठे होए थे, और माणस पलिश्तियाँ कै स्याम्ही तै भाज गए। फेर उन ताहीं उस खेत कै बीच म्ह खड़े होकै उसकी हिफाजत करी, अर पलिश्तियाँ ताहीं मारया, अर यहोवा नै उनका बड़ा उद्धार करया।
तीसों खास आदमियाँ म्ह तै तीन दाऊद कै धोरै चट्टान नै, यानिके अदुल्लाम नाम की गुफा म्ह गए, अर पलिश्तियाँ की छावणी रपाईम नाम की तराई म्ह पड़ी होई थी। उस बखत दाऊद गढ़ म्ह था, अर उस बखत पलिश्तियाँ की एक चौकी बैतलहम म्ह थी। फेर दाऊद नै बड़ी अभिलाषा कै गैल कह्या, “कौण मन्नै बैतलहम के फाटक कै धोरै के कुएँ का पाणी प्यावैगा।” फेर वे तीन्नु जन पलिश्तियाँ की छावणी पै टूट पड़े अर बैतलहम के फाटक के कुएँ तै पाणी भरकै दाऊद कै धोरै ले आए; पर दाऊद नै पीण तै इन्कार करया अर यहोवा कै स्याम्ही अर्घ करकै उण्डेल्या: अर उसनै कह्या, “मेरा परमेसवर मेरै तै इसा करणा दूर राक्खै। के मै इन माणसां का लहू पीऊँ जिननै अपणी जान पै खेल्या सै? ये तो अपणे प्राण पै खेलकै उस ताहीं ले आए सैं।” ज्यांतै उसनै वो पाणी पीण तै इन्कार करया। इन तीन वीरां नै येए काम करे।
अबीशै जो योआब का भाई था, वो तीन्नु म्ह खास था। उसनै अपणा भाला चलाकै तीन सौ ताहीं मार गेरया अर तीन्नु म्ह नाम्मी होग्या। दुसरी श्रेणी के तीन्नु म्ह वो घणा प्रतिष्ठित था, अर उनका प्रधान होग्या, पर खास तीन्नु के पद ताहीं ना पोहच्या
यहोयादा का बेट्टा बनायाह था, जो कबसेल के एक वीर का बेट्टा था, जिसनै बड़े-बड़े काम करे थे, उसनै शेर बराबर दो मोआबियाँ ताहीं मार गेरया, अर हिमऋतु म्ह उसनै एक गड्ढे म्ह उतरकै एक शेर ताहीं मार गेरया। फेर उसनै एक डील-डोल आळे यानिके पाँच हाथ लाम्बे मिस्री माणस ताहीं मार गेरया, वो मिस्री हाथ म्ह जुलाहों का ढेका-सा एक भाला लिए होए था, पर बनायाह एक लाठ्ठी ए लिए होए उसकै धोरै गया, अर मिस्री के हाथ तै भाले ताहीं खोसकै उसे के भाले तै उसे ताहीं घात करया। इसे-इसे काम करकै यहोयादा का बेट्टा बनायाह उन तीन्नु वीरां म्ह नाम्मी होग्या। वो तो तीसों तै घणा प्रतिष्ठित था, पर खास तीन्नु के पद ताहीं ना पोहच्या। उस ताहीं दाऊद नै अपणे अंगरक्षकां का प्रधान नियुक्त करया।
फेर दलां के वीर ये थे, यानिके योआब का भाई असाहेल, बैतलहमी दोदो का बेट्टा एल्हनान, हरोरी शम्मोत, पलोनी हेलेस, तकोई इक्केश का बेट्टा ईरा, अनातोती अबीएजेर, सिब्बकै हूशाई, अहोही ईलै, महरै नतोपाई, एक और नतोपाई बानाह का बेट्टा हेलेद, बिन्यामीनियाँ के गिबा नगरवासी रीबै का बेट्टा इत्तै, पिरातोनी बनायाह, गाश के नालों कै धोरै रहण आळा हूरै, अराबावासी अबीएल, बहूरीमी अज्मावेत, शालबोनी एल्यहबा, गीजोई हाशेम के बेट्टे, फेर हरारी शागे का बेट्टा योनातान, हरारी साकार का बेट्टा अहीआम, ऊर का बेट्टा एलीपाल, मकेराई हेपेर, पलोनी अहिय्याह, कर्मेली हेस्रो, एज्बै का बेट्टा नारै, नातान का भाई योएल, हग्री का बेट्टा मिभार, अम्मोनी सेलेक, बेरोती नहरै जो सरूयाह के बेट्टे योआब का हथियार ढोण आळा था, येतेरी ईरा अर गारेब, हित्ती ऊरिय्याह, अहलै का बेट्टा जाबाद, तीस माणसां समेत रूबेनी शीजा का बेट्टा अदीना जो रूबेनियाँ का मुखिया था, माका का बेट्टा हानान, मेतेनी योशापात, अश्तारोती उज्जियाह, अरोएरी होताम के बेट्टे शामा अर यीएल, शिम्री का बेट्टा यदीएल अर उसका भाई तीसी, योहा, महवीमी एलीएल, एलनाम के बेट्टे यरीबै अर योशव्याह, मोआबी यित्मा, एलीएल, ओबेद अर मसोबाई यासीएल।
Source notes (2)
- Footnote होवैगा मत्ती 2:6 भजन 78:71
- Footnote सरूयाह का बेट्टा योआब उसकी प्रवीणता इस बखत अर दाऊद नगरी के निर्माण कै बखत (1 इति. 11:8) सिर्फ इतिहास के इस एक संदर्भ तै हमनै बेरा लाग्गै सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.