ದರ್ಶಾನ್ 12

ಮೊಟಾ ಸಾಪ್

1ತವಾ ಸ್ವರ್ಗಾತ್ ಮೊಟಿ ಚಮತ್ಕಾರ್ ದಿಸ್ಲಿ. ದಿಸಾಲಾ ಕಪ್‌ಡ ಗ್ಯಾತ್‌ಲ್ಯಾಚೆಗತ್ ಯೇಕ್ ಬ್ಯಾಯ್ಕಾಮಾನುಸ್ ತಿಥ ಹುತಿ. ತಿಚಾ ಪಾಯಾ ಬುಡಿ ಚಾ಼ಂದ್ ಹುತ್ತಾ. ತಿಚೆ ಡುಯಿವ ಬಾರಾ ಚಾನ್ಯಾ ಆಸ್‌ಲ್ಯಾಲ ಯಾಕ್ ಕಿರೀಟ್ ಹುತ್ತ. 2ತೀ ಗರ್ವಾರ್ ಹುತಿ ತೀ ಬಾಳತ್ಫನಾಚಾ ಯಗಾನಿ ವರಡತಿ.

3ತವಾ ಸ್ವರ್ಗಾತ್ ಆನಿ ಯೆಕ್ ಚಮತ್ಕಾರ್ ದಿಸ್ಲಿ ತಾಂಬ್ಡಾ ಖತರ್ನಾಕ್ ಸಾಪ್ ಯೊಕ್ ತಿಥ ಹುತ್ತಾ ತ್ಯಲಾ ಸಾತ್ ಡೊಯಾ ಹುತ್ಯಾ ಪರತೇಕ್ ಡುಯಿವ ಕಿರಿಟ ಹುತ್ತಿತ. ತ್ಯಾ ಸಾಪಾಲಾ ಧಾ ಸಿಂಗ ಹುತ್ತಿತ. 4ತ್ಯನಿ ಆಪ್ಲೆ ಸಿಪ್ಟಿನಿ ಆಬ್ಳಾತ್‌ಲ್ಯಾ ಚಾನ್ಯಾಂಚಾ ತಿನವ್ಯಾತ್ಲಾ ಯೊಕ್ ಭಾಗ್ ವಡುನ್ ಜಿಮ್ನಿವ ಟ್ಯಾಕ್ಲಾ. ತ್ಯೊ ಸಾಪ್ ಬಾಳತ್ಪನಾಚಾ ಯಗಾತ್‌ ಆಸ್‌ಲ್ಯಾಲೆ ಬ್ಯಾಯ್ಕಾಮಾನ್ಸಾಚೆ ಮೊರ‍್ಹ ತೀ ಬಾಳತ್ ಜಾ಼ಲ್ಹಿಕಿ ಮುಲಾಲಾ ಗಿಳಾಲಾ ರಾಖೀತ್ ಉಬಾ ಹುತ್ತಾ.

5ತೆ ಬ್ಯಾಯ್ಕಾಮಾನ್ಸಾನಿ ಸಗ್ಳೆ ದುನೆವ ಲೊಖಾಂಡಾಚೆ ಕಾಠಿನಿ ರಾಜ಼್ಕರತ್ಯಾಲ್ಯಾ ಯಕಾ ಪೊರ್ಗ್ಯಾಲಾ ಜ಼ಲ್ಮ ದಿಲಾ. ತಿಚಾ ಮುಲಾಲಾ ದೇವಾಪ ತ್ಯಚಾ ಸಿಂಹಾಸನಾಪ ಗಿಹುನ್ ಗಿಲಿ.

6ತೇ ಬ್ಯಾಯ್ಕಾಮಾನ್ಸಾನಿ ಆಪ್ಲಿಸಾಟಿ ದೇವಾನಿ ತಯಾರ್ ಕೇಲ್ಯಾಲೆ ಮರುಬುಮಿತ್ ಪಳುನ್ ಗಿಲಿ ತಿತ ಯೇಕ್ ಹಾಜಾ಼ರ್ ದೊನ್ಸೆ ಸಾಟ್ ದಿಸಾ ಪರೆತ್ ಬಾಳಗ್ನಾರ್.

7ಮಂಗ್ ಸ್ವರ್ಗಾತ್ ಯೇಕ್ ಲಡಾಯಿ ಜಾ಼ಲಿ ಮಿಕಾಯೇಲ್ ಆನಿ ತ್ಯಚೆ ಸಂಗಚ಼ ದುತ್ ತ್ಯಾ ಖತರ್ನಾಕ್ ಸಾಪಾಸಂಗ ಲಡ್ಲ ತ್ಯೊ ಸಾಪ್ ಆನಿ ತ್ಯಚ಼ ಧುತ್ಸಾಹಿತ್ ಲಡ್ಲ. 8ಫನ್ ತ್ಯೊ ಸಾಪ್ ಆನಿ ತ್ಯಚ಼ ದುತ್ ಹಾರುನ್ ತ್ಯಂಚಾನಿ ಸ್ವರ್ಗಾತ್ಲಾ ಆಪ್ಲಾ ಜಾ಼ಗಾ ಶೊಡ್ಲಾ. 9ಸೈತಾನ್ ಮನ್ಹುನ್ ಜು಼ಟಿಂಗ್ ಮನ್ಹುನ್ ತ್ಯಚ಼ ನಾವ್ ಹುತ್ತ. ಸಗ್ಳೆ ದುನೆಲಾ ಚ಼ುಕಿಚೆ ವಾಟವ ಚಾ಼ಲಿವ್ವಿ ಮನ್ಹುನ್ ತ್ಯಲಾ ಆನಿ ತ್ಯಚಾ ದುತಾನಾ ದರ್ಥಿವ ಟ್ಯಾಕ್ಲ.

10ತವಾ ಸ್ವರ್ಗಾತ್ ಜಾ಼ಲ್ಯಾಲಾ ಯೊಕ್ ಮೊಟಾ ಆವಾಜ಼್ ಮೀ ಐಕ್ಲಾ ಆಮ್ಚಾ ದೇವಾಚ಼ ಸುಟ್ನುಕ್ ಆನಿ ಬಳ್ ರಾಜ಼್ ಆನಿ ತ್ಯಚಾ಼ ಕ್ರಿಸ್ತ್ ಜಾ಼ಲ್ಯಾಲ್ಯಾಚಾ಼ ಹುಕುಮ್ ಆತಾ ಆಲ್ಯಾ. ಆಮ್ಚಾ ಬನ್ಹಿ ಬಾವ್ಹಾವ್ನಿ ರಾಗ್ ಕರ್ತ್ಯಾಲ್ಯಾಲಾ ಬಾಹಿರ್ ಟ್ಯಾಕ್‍ಲ್ಯಾ ಮನ್ಹುನ್ ಹ್ಯ ಸಗ್ಳ ಆಲ್ಯಾ ಆಮ್ಚಾ ದೇವಾಚೆ ಮೊರ‍್ಹ ರ‍್ಯಾತ್ ದೀಸ್ ಆಮ್ಚಾ ಇಸ್ವಾಸಾತ್ ಆಸ್‌ಲ್ಯಾಲ್ಯಾ ಬನ್ಹಿ ಬಾವ್ಹಾಂಚೆ ಗುಶ್ಟಿತ್ ತ್ಯನಿ ಚಾ಼ಡಿ ಸಾಂಗ್ಲಿ. 11ಆಮ್ಚಾ ಬನ್ಹಿ ಬಾವ್ಹಾನು ಮಿಂಡುರ್ ಜಾ಼ಲ್ಯಾಲ್ಯಾಚಾ ರಕ್ತಾನಿ ಆಪ್‌ಲ್ಯಾ ಖರ‍್ಯಾ ವಾಕ್ಯಾಚಾ ಬಳಾನಿ ತ್ಯಲಾ ಜಿತ್‌ಲ್ಯಾ. ತ್ಯಂಚಾನಿ ಆಪಲ್ಯಾ ಜಿವಾಚಿ ಮಾಯಾ ಕಿಲಿನಾಹಿ. ಮರಾಯಾಬಿ ಬಿಹ್ಯಾಲ ನಾಹಿತ. 12ಮನ್ಹುನ್ ಸ್ವರ್ಗಾ, ತ್ಯಾತ್ ಜೀವ್ನಾ ಕರ್ತ್ಯಾಲ್ಯಾನು ಸಂತೊಶ್ ವ್ಹವಾ, ಫನ್ ಜೀಮ್ನೆ ಆನಿ ಸಮಿಂದೊರಾ ಸೈತಾನ್ ತುಮ್ಚಿಪ ಆಲ್ಯಾ ಮನ್ಹುನ್ ತುಮಾನಾ ಬುರ್ಸ ವ್ಹನಾರ್ ಸೈತಾನ್ ರಾಗಾನಿ ಬರ್ಲ್ಯಾ ಆಪ್ಲಿಪ ಥೊಡಾ ಯೊಳ್ ಹಾ ಮನ್ಹುನ್ ತ್ಯಲಾ ಸಮಾಜ಼್‍ಲ್ಯಾ.

13ಖತರ್ನಾಕ್ ಸಾಪಾಲಾ ಆಪ್‌ಲ್ಯಾಲಾ ದರ್ಥಿವ ಡಖಲ್ಯಾಲ ಸಮಾಜ಼್ಲ ಮನ್ಹುನ್ ತ್ಯೊ ಪ್ಯೊರ್ಗ್ಯಾಲಾ ಜ಼ಲ್ಮ ದಿಲ್ಯಾಲೆ ಬ್ಯಾಯ್ಕಾಮಾನ್ಸಾಲಾ ತರಾಸ್ ದಿಯಾ ಪಾಠೀಲಾಗತ್ ಗೇಲಾ. 14ಫನ್ ತೇ ಬ್ಯಾಯ್ಕಾಮಾನ್ಸಾಲಾ ಮೊಟ್ಯಾ ಗರುಡಾಚಿ ದೊನ್ ಪಖೊಟಿ ದಿಲಿತ ಮನ್ಹುನ್ ಆಪ್ಲಿ ಸಾಟಿ ರಾನಾತ್ ತಯಾರ್ ಕೇಲ್ಯಾಲ್ಯಾ ಜಾ಼ಗ್ಯಾತ್ ಪುರಕಾನಿನಿ ಜಾ಼ಯಾ ತಿಲಾ ಜಾ಼ಲ್ಹ. ತಿಥ ತೀ ಸಾಡತೀನ್ ವರ್ಸಾ ಪರೆತ್ ಸಾಪಾಲಾ ದಿಸಾಚೆ ಆಂದಿ ರಾಯ್ಲಿ.

15ತವಾ ಖತರ್ನಾಕ್ ಸಾಪಾನಿ ಆಪ್‌ಲ್ಯಾ ತೊಂಡಾತ್ನಿ ನ್ಹಚೆಗತ್ ಪಾನಿ ಬಾಹಿರ್ ಟ್ಯಾಕ್ಲ ತ್ಯ ಪವುಡ್ ಆಲ್ಯಾಲ ಪಾನಿ ತಿಲಾ ವ್ಹಾವುನ್ ನಿಹುನಿ ಮನ್ಹುನ್ ತ್ಯಚಾ಼ ಉಧೇಶ್ ಜಾ಼ಲ್ಥಾ. 16ಫನ್ ದರ್ಥಿನಿ ತೇ ಬ್ಯಾಯ್ಕಾಮಾನ್ಸಾಲಾ ಮಜ಼ತ್ ಕರಾಯಾ ಆಪ್ಲ ತ್ವಾಂಡ್ ಉಗ್ಡುನ್, ತ್ಯಾ ಸಾಪಾಚಾ ತೊಂಡಾತ್ನಿ ಬಾಹಿರ್ ಆಲ್ಯಾಲ್ಯಾ ಪಾನ್ಯಾಲಾ ಆಪ್ನು ಗಿಳ್ಳ. 17ತವಾ ತ್ಯಾ ಸಾಪಾನಿ ತೆ ಬ್ಯಾಯ್ಕಾಮಾನ್ಸಾವ ಖುಬ್ ರಾಗ್ ಕರುನ್ ತಿಚಾ ದುಸ್‌ರ‍್ಯಾ ಸಗ್‌ಳ್ಯಾ ಪ್ಯೊರ್‌ಗ್ಯಾವ್ನಿ ಮಂಜೆ ದೇವಾಚೆ ಆಜ್ಞಾಶಾರ್ಕಿ ಚಾ಼ಲತ್ಯಾಲಿ ಆನಿ ಯೇಸುಚಿ ಸಾಕ್ಷಿ ಸಾಂಗ್‌ಲ್ಯಾಲ್ಯಾವ್ನಿ ಲಡಾಯಾ ಗೇಲಾ.

18ತ್ಯೊ ಖತರ್ನಾಕ್ ಸಾಪ್ ಸಮಿಂದೊರಾಚೆ ದರವ ಉಬಾಹುತ್ತಾ.