ದರ್ಶಾನ್ 11

ದೊಗಜಾ಼ನ್ ಸಾಕ್ಷಿ

1ಮಂಗ್ ಮಾಪಾಚಿ ಮುಟಿಕಾಠಿ ಮಾಜಿಪ ದಿವುನ್ ಮನಾ ಆಸ ಸಾಂಗ್ಲ. “ಜಾ಼, ದೇವಾಚ಼ ಘರ್ ಜ಼ನಾವಾರ ಮ್ಯಾರ್‌ತ್ಯಾಲಾ ಜಾ಼ಗಾ ಮ್ಯಾಪ್; ಆನಿ ತಿಥ ವವ್ಯಾಳ್‍ತ್ಯಾಲ್ಯಾ ಲೊಕಾನಾ ಮೇಜ಼್. 2ಫನ್ ಗರ‍್ಹಾಚೆ ಬಾಹಿರ‍್ಲ ಆಂಗಾನ್ ಮಾಪಾಚೆ ಆಂದಿ ಸುಡುನ್ ದೇ ತ್ಯ ಯಹುದಿ ನಸ್‌ಲ್ಯಾಲ್ಯಾ ಲೊಕಾನಾ ಶೊಡ್‌ಲ್ಯಾ. ತ್ಯ ಪವಿತ್ರ ನಗರ್ ಚಾಳ್ಸಾವ ದೊನ್ ಮೈನಿ ತ್ಯಂಚಾ ತಾಬ್ಯಾತ್ ರಾನ್ಹಾರ್. 3ಮೀ ಮಾಜಾ ದೊಗಾ ಸಾಕ್ಷಿನಾ ಹುಕುಮ್ ದೇತೊ ತೀ ಯೇಕ್ ಹಾಜಾ಼ರ್ ದೊನ್ಸೆಸಾಟ್ ದೀಸಾಪರತ್ ದೇವಾಚಾ಼ ಸಂದೇಶ್ ಸಾಂಗ್‌ತ್ಯಾತ ತೇ ಗೊಂಥ್ಯಾಚ಼ ತಳ್ಕ ಬಾಂದುನ್ ರಾಥ್ಯಾತ.

4ಧರ್ಥಿವ್‌ಲ್ಯಾ ಪ್ರಭುಪ ಉಬಿ ಆಸ್‌ಲ್ಯಾಲಿ ದೊನ್ ಆಲಿವ್ ಜಾ಼ಢ್ಹ ಆನಿ ದೊನ್ ದಿವಲಾವನ್ಯಾಚ಼ ಖಾಂಬ್ ಹೇ ದೊನ್ ಸಾಕ್ಷಿ. 5ಹೇ ಸಾಕ್ಷಿ ಕುನಿತರಿ ಬುರ್ಸ ಕರಾಯಾ ಯತ್ನ ಕಿಲಿತತ. ಸಾಕ್ಷಿಂಚಾ ತೊಂಡಾತ್ನಿ ಇಸ್ಥು ವಾದಿನಾ ನಾಸ್ ಕರ್ತ್ಯೊ ಕಾ ಮಂಜೆ ತ್ಯನಾ ತರಾಸ್ ದಿಯಾ ಯತ್ನ ಕರ್ತ್ಯಾಲ್ಯಾ ಸಗ್‌ಳ್ಯಾನಾ ಮಾರುನ್ ಟ್ಯಾಕ್ತ. 6ತ್ಯನಾ ಅಬಾಳ್ ಜಾ಼ಕಾಯಾ ಅಧಿಕಾರ್ ಆಸ್ತೊ. ಹ್ಯಚಿಸ್ ಲಾಗುನ‍ ತೀ ದೇವಾಚ಼ ಸಂದೇಶ್ ಸಾಂಗ್‌ತ್ಯಾಲ್ಯಾ ದಿಸಾತ್ ಪಾವುಸ್ ಪಡತ್ ನಾಹಿ ಫನ್ ತ್ಯನಾ ಪಾನಿ ರಗಾತ್ ಕರ್ತ್ಯಾಲಾ ಅಧಿಕಾರ್ ದಿಲ್ಯಾ. ತ್ಯಂಚಾ ಮನಾಚೆಗತ್ ದರ್ಥಿವ ಸಗ್ಳೆ ತರಚಾ಼ ಅಧಿಕಾರ್ ತ್ಯನಾ ದಿಲ್ಯಾ.

7ಹ್ಯಾ ದೊಗಾಂಚಿ ಸಾಕ್ಷಿ ಆಪ್ಲಾ ಸಂದೇಶ್ ಸಾಂಗುನ್ ಸಪ್‌ಲ್ಯಾ ನಂತರ್, ಪಾತಾಳಾತ್ನಿ ವರ್ ಯತ್ಯಾಲ ಖತರ್ನಾಕ್ ಜ಼ನಾವಾರ್ ತ್ಯಂಚೆ ಆಡ್ವ ಲಡಾಯೀ ಕರ್ತ. ಹ್ಯ ಜ಼ನಾವಾರ್ ತ್ಯನಾ ಪಾಡುನ್, ಮಾರುನ್ ಟ್ಯಾಕ್ತ. 8ತ್ಯಾ ದೊನ್ ಸಾಕ್ಷಿಂಚಿ ಮಡಿ ಮೊಟ್ಯಾ ನಗರಾಚೆ ಪಾಂದಿತ್ ಪಡ್ನಾರ್. ಹ್ಯಾ ನಗರಾಲಾ ವಳಕ್ ಸೊದೊಮ್ ನಾಹಿತ ಈಜಿಪ್ಟಿ. ತ್ಯಾ ನಗರಾಂಚಾ ನಾವಾಲಾ ಚಾ಼ಂಗ್ಲಾ ಅರ್ಥ ಹಾ. ಪ್ರಭುಲಾ ಹ್ಯಾ ನಗರಾತುಸ್ ಶಿಲ್ಬೆವ ಗ್ಯಾತ್ಲಾಹುತ್ತಾ. 9ಸಗ್ಳೆ ದೇಶೆತ್ಲಿ ಲೊಕ, ಸಗ್ಳಿ ಕುಳ, ಸಗ್ಳೆ ಬಾಶೆಚಿ ಲೊಕ ಸಾಡತೀನ್ ದಿಸಾಪರೆತ್ ಹೇ ಸಾಕ್ಷಿ ಮಡಿ ಬಗೀತ್ ರಾಥ್ಯಾತ. ತ್ಯನಾ ಮಾತಿ ದಿವು ದಿಯಿತ್ನಾಹಿತ. 10ಹೇ ದೊಗ ಮೆಲ್ಯಾತ ಮನ್ಹುನ್ ದರ್ಥಿವ್ಲಿ ಲೊಕ ಸಂತೊಶ್ ವ್ಹನಾರ್. ತೀ ಸನ್ ಕರುನ್, ಯಕಾಮಕಾಲಾ ಆಯಾರ್ ದೇನಾರ್. ಹ್ಯಾ ದೊಗಾ ಪ್ರವಾದಿಂಚಾನಿ ದರ್ಥಿವ ರಾಥ್ಯಾಲ್ಯಾ ಲೊಕಾನಾ ಖುಬ್ ತರಾಸ್ ದಿಲ್ತಾ ಮನ್ಹುನ್ ತೀ ಲೊಕ ಆಸಿ ಕರ್ತ್ಯಾತ.

11ಫನ್ ಸಾಡತೀನ್ ದಿಸಾನಂತರ್ ತ್ಯಾ ದೊಗಾ ಪ್ರವಾದಿನಾ ಆನಿಕ್ ಜೀವ್ ಯಯಿಸಾ ಕೆಲಾ. ಆಪ್‌ಲ್ಯಾ ಪಾಯಾವ ಉಬ ರಾಯ್ಲ. ತ್ಯ ಬಗ್‌ಲ್ಯಾಲ್ಯಾ ಲೊಕಾನಾ ಸಗ್‍ಳ್ಯಾ ಮೊಟ ಭೆ ಬರ್ಲ. 12ತ್ಯಾ ನಂತರ್, “ವರ್ ಯವಾ” ಮನ್ಹುನ್ ಸ್ವರ್ಗಾತ್ನಿ ಮೊಟ್ಯಾನಿ ತ್ಯಾ ಪ್ರವಾದಿನಾ ಸಾಂಗ್ಲ ತವಾ ತೇ ದೊಗ ಪ್ರವಾದಿ ಢಘಾತ್ನಿ ಸ್ವರ್ಗಾತ್ ಗೇಲ. ತೇ ಜಾ಼ತ್ಯಾಲ ತ್ಯಂಚ಼ ವಾದಿ ಬಗೀತ್ ಹುತ್ತ.

13ತ್ಯಾ ಯಳಾತ್ ಮೊಟ ಭುಕಂಪ್ ಜಾ಼ಲ್ಹ. ತ್ಯಾ ನಗರಾತ್ಲಾ ಧಾತ್ಲಾ ಯೊಕ್ ಭಾಗ್ ನಾಸ್ ಜಾ಼ಲ್ಹಾ. ಭುಕಂಪಾತ್ ಸಾತ್ ಹಾಜಾ಼ರ್ ಲೊಕ ಮಿಲಿತ. ಜಿತ್ತಿ ಆಸ್‍ಲ್ಯಾಲ್ಯಾ ಲೊಕಾಂಚಾನಿ ಖುಬ್ ಬಿಹುನ್ ಸ್ವರ್ಗಾತ್‌ಲ್ಯಾ ದೇವಾಲಾ ವವ್ಯಾಳ್ಳಾ.

14ದೊನ್ವಾ ಮೊಟಾ ತರಾಸ್ ಸೊಪ್ಲಾ. ತಿನ್ವಾ ಮೊಟಾತರಾಸ್ ಬಿಗಿನಿ ಯನಾರ್.

ಸಾತ್ವಿ ತುತ್ತುರಿ

15ಸಾತವ್ಯಾ ದೇವ್ದುತಾನಿ ಆಪ್ಲಿ ತುತ್ತರಿ ವಾಜಿವ್ಲಿ. ತವಾ ಸ್ವರ್ಗಾತ್ ಮೊಟಾ ಆವಾಜ಼್ ಆಲಾ. ತ್ಯನಿ ಆಸ ಸಾಂಗ್ಲ.

“ಹ್ಯಾ ಲೊಕಾತ್ಲ ರಾಜ಼ ಆತಾ ಆಮ್ಚಾ ಪ್ರಭುಚಾ ಆನಿ ಕ್ರಿಸ್ತ ಜಾಲ್ಯಾಲ್ಯಾಚ಼ ರಾಜೆ ವ್ಹವುನ್ ಬದಾಲ್ಲ.

ತ್ಯೊ ಖಾಯಿಮ್ ರಾಜ಼್ಬಾರ್ ಕರ್ನಾರ್. ”

16ಮಂಗ್ ಇಸಾವಚಾರ್ ಜಾಂತ್ಯಾಂಚಾನಿ ನಡ್ಗಟಿಕುನ್ ದೇವಾಲಾ ವವ್ಯಾಳ್ಳಾ ದೇವಾಚೆ ಮೊರ‍್ಹ ಆಪ್‌ಲ್ಯಾ ಸಿಂಹಾಸನಾವ ಬಸ್‌ಲ್ಯಾಲಸ್ ಹೇ ವಡಿಲ್. 17ಹ್ಯಾ ವಡ್ಲಾಂಚಾನಿ ಆಸ ಸಾಂಗ್ಲ:

ಪ್ರಭು ಸರ್ವ ಕರತ್ಯಾಲ್ಯಾ ದೇವಾ, ಪೈಲ್ಯಾಕಾಲಾತ್ ಆಸ್‌ಲ್ಯಾಲಾ ಆತಾ ಆಸ್ನಾರ‍್ಯಾ ತುಲಾ ಉಪಕಾರಾಚಿಸ್ತುತಿ ಕರ್ತಾವ್. ತು ತುಜಾ಼ ಮೊಟಾ ಹುಕುಮ್ ವಾಪ್ರುನ್ ತುಜಾ಼ ಅದಿಕಾರ್ ಚಾ಼ಲಿವಲ್ಯಾಸ್ ಮನ್ಹುನ್ ತುಲಾ ಉಪಕಾರ್ ಸ್ತುತಿ ದೇತಾವ್

18ದುನೆತ್‌ಲ್ಯಾ ಲೊಕಾಂಚಾನಿ ರಾಗ್ ಕೇಲಾ. ಫನ್ ಹ್ಯೊ ತುಜಾ಼ ರಾಗಾಚಾ಼ ಯೊಳ್. ಮೆಲ್ಯಾಲ್ಯಾನಾ ತೀರ್ಪ್ ಕರಾಚಾ಼ ಯೊಳ್ ತುಜಾ ಸೇವಕಾನಾ ಆನಿ ಪ್ರವಾದಿನಾಬಿ ತುಜಾ ಪರಿಶುದ್ದ ಲೊಕಾನಾಬಿ ತುಲಾಬಿ ಮರ‍್ಯಾದ್ ದೇತ್ಯಾಲ್ಯಾ ಮೊಟ್ಯಾ ಲೊಕಾನಾಬಿ ಬ್ಯಾರ್ಕ್ಯಾನಾಬಿ ಪ್ರತಿಫಳ್ ದಿಯಾಚಾ಼ ಯೊಳ್ ಹ್ಯೊ. ದುನ್ಯಾ ನಾಸ್ ಕರಾಚಾ಼ ಯೊಳ್ ಹ್ಯೊ.

19ಮಂಗ್ ಸ್ವರ್ಗಾತ್‍ಲ್ಯಾ ದೇವಾಚ಼ ಘರ್ ಉಗಾಡ್ಲ. ದೇವಾನಿ ಆಪ್‌ಲ್ಯಾ ಲೊಕಾನಾ ದಿಲ್ಯಾಲಾ ಕರಾರ್ ಥೆವ್‌ಲ್ಯಾಲಿ ಪಿಟಿ ತ್ಯಚಾ ಗರ‍್ಹಾತ್ ದಿಸ್ಲಿ. ತವಾ ಇಜಾ಼ ಚ಼ಮಾಕಲ್ಯಾ, ಸಬ್ದಜಾ಼ಲ್ಹ. ತಡಾಸ್ ಜಾ಼ಲ್ಹ, ಭುಕಂಪ್ ಜಾ಼ಲ್ಹ. ಆನಿ ಗಾರಚಾ಼ ಪಾವುಸ್ ಪಡ್ಲಾ.