ದೆವಾಚಿ ಖರಿ ಕಬರ್
ಪಿಲಿಪ್ಪಿ 4
ಸುಸ್ನಾ
ಆಸ ಆಸ್ತಾನಾ ಮಾಜೆ ಮಾಯೆಚಾ ಬನ್ಹಿ ಬಾವ್ಹಾನು ಮನಾ ಸಂತೊಶ್ ಆನಿ ಕಿರಿಟ್ ಜಾ಼ಲ್ಯಾಲ್ಯಾನು, ಮಿ ಸಾಂಗ್‍ಲ್ಯಾ ಶಾರ್ಕ ಪ್ರಭುಪ ಘಟ್ ಉಬಿ ರಾವ್ಹಾ:
ಪ್ರಭುಪ ಯಕಾ ಮನಾನಿ ರಾವ್ಹಾ ಮನ್ಹುನ್ ಯುವೊದಿಪ ಆನಿ ಸಂತುಕಿಪ ಮಾಗ್ತೊ. ಮಾಜಾ ಖರ‍್ಯಾ ಸಂಗಚಾ ಸೆವಕಾ, ತ್ಯಾ ಬಾಯಿಲ್ಮಾನ್ಸಾನಾ ಮಜ಼ತ್ ಕರ್ನಾರಾ ವ್ಹವುನ್ ರಾಹ್ಯಾವ್ಹಯಿಸ್ ಮನ್ಹುನ್ ತುಲಾ ಸಾಂಗ್ತೊ. ತ್ಯಾ ಕ್ಲೇಮೆನ್ಸ ದಿಸ್ರಿ ಮಾಜೆ ಸಂಗಚಾ ಕಾಮ್ಯಾರ‍್ಯಾನಾ ಮಾಜಿಸಂಗ ಬರೆ ಖಬರಿಸಾಟಿ ತರಾಸ್ ಖಾಲ್ಯಾಲ್ಯಾನಾ ಮಜ಼ತ್ ಕರ್. ತ್ಯಂಚಿ ನಾವ ಶಾಸ್ವತ್ ಜಿವಾಚಾ ಪುಸ್ತಕಾತ್ ಲಿವ್‍ಲ್ಯಾತ.
ಕವಾಬಿ ಪ್ರಭುಪ ಆನಂದಾನಿ ರಾವ್ಹಾ, ಆನಂದಾನಿ ರಾವ್ಹಾ ಮನ್ಹುನ್ ಪುನ್ಹಾ ಸಾಂಗ್ತೊ.
ತುಮಚ಼ ಥಂಡ್ಫನ್ ಸಗ್ಳ್ಯಾ ಲೊಕಾನಾ ಸಮಜು಼ನಿ, ಪ್ರಭುಚ಼ ಯನ ಜ಼ವಳ್ ಹಾ. ಕಶಾಚಿ ಚಿಂತಾ ಕರಾಚೆ ಆಂದಿ ಸರ್ವ್ಯಾ ಗುಶ್ಟಿತ್ನಿ ದೇವಾಚೆ ಮೊರ‍್ಹ ಕ್ರತಜ್ಞತಾ ಸ್ತುತಿ ಮಾಗ್ನಿ ಇನಂತಿ ಕರಿತ್ ತುಮಾನಾ ವ್ಹಯಿತ್ಯ ಪ್ರಭುಲಾ ಸಾಂಗಾ. ತವಾ ಸಗ್ಳೆ ಸಮಜು಼ಕಿವ್ನಿ ಆಗಾವ್ ಆಸ್‍ಲ್ಯಾಲಿ ದೆವಾಚಿ ಶಾಂತಿ ತುಮ್ಚಿ ಮನ, ಯವಜ಼್ನಾ ಕ್ರಿಸ್ತ ಯೆಸುಪ ರಾಖುನಿ.
ಸರ್ತ್ಯಾಯಳಾಲಾ, ಭನ್ಹಿ ಬಾವ್ಹಾನು, ಕಚ಼ ಖರ, ಕಿಮ್ತಿಚ಼, ನೀಯತಿಚ಼, ನಿರ್ಮಳ್, ಮಾಯೆಚ಼, ಮರೆದಿಚ಼ ಹಾ, ಕಚ಼ ಚಾ಼ಂಗಲ್ಯಾ ಗುನಾಚ಼ ಹಾ, ಕಚ಼ ಮರೇದಿಲಾ ಚಾ಼ಂಗ್ಲ ಹಾ, ತ್ಯಾ ಸಗ್‌ಳ್ಯಾಂಚಿ ಕ್ಯಾಳ್ಜಿ ಕರಾ. ತುಮಿ ಮಾಜಿಪ್ನಿ ಕ್ಯಾ ಶಿಕ್‍ಲ್ಯಾಸಾ, ಆನಿ ಮಾಜ಼ ಕ್ಯಾ ಐಕುನ್ ಬಗ್‌ಲ್ಯಾಸಾ ತ್ಯಸ್ ಕರಿತ್ ಯವಾ. ಆಸ ಕೆಲ್ಯಾವ ಥಂಡ್ಪನಾಚಾ಼ ದೆವ್ ತುಮ್ಚಿ ಸಂಗ ರಾನ್ಹಾರ್.
ಬಹುಮಾನಾಸಾಟಿ ದನ್ಯವಾದ್
ಮಾಜಿವ ತುಮಾನಾ ಆಸ್‍ಲ್ಯಾಲಿ ಕ್ಯಾಳ್ಜಿ ಇತ್‍ಕ್ಯಾ ದಿಸಾನಂತರ್ ಆನಿಕ್ ಫುಟ್ಲಿ ಮನ್ಹುನ್ ಮಿ ಪ್ರಭುಪ ಖುಬ್ ಸಂತೊಸ್ ವ್ಹತೊ. ಆಸ್ಲಿ ಯವಜ಼್ನಾ ತುಮ್ಚಿಪ ಆಂದಿದರ‍್ನಿ ಆಸ್‌ಲ್ಯಾವ, ಮಜ಼ತ್ ಕರಾಯಾ ಶಾರ್ಕಾ ಯೊಳ್ ಮಿಳುನ್ ಆಲಾನವ್ಥಾ. ಮನಾ ವ್ಹಯಿ ಜಾ಼ಲ್ಯಾಲೆ ಗುಶ್ಟಿತ್ ಹ್ಯ ಮೀ ಸಾಂಗಿತ್ನಾಹಿ ಮೀ ಹಾ ತ್ಯಾತುಸ್ ಸಮಾದಾನಾನಿ ರಾಹ್ಯಾ ಸಿಕ್‌ಲ್ಯೊ. ಗರಿಬ್ತಿತಿತ್ ರಾಹ್ಯಾಚ಼, ಸಗ್ಳ ಆಸ್ತಾನಾ ಕಸ ರಾಹ್ಯಾಚ಼ ಮನಾ ಠಾವ ಹಾ. ಮಿ ತ್ರಪ್ತ, ಬುಕಚಾ಼, ಸಗ್ಳ ಆಸ್ನಾರಾ, ಕಾಯ್ನಸ್ನಾರಾ, ಜಾ಼ಲೊತರಿ ಕಸ್ಲೆ ಪರಸ್ತಿತಿತ್ ಆಸ್ಲೊತರಿ ತ್ಯಚಿ ಪಾರಕ್ ಮನಾ ಹಾ. ಮನಾ ಬಳ್ ದೆತ್ಯಾಲ್ಯಾ ಕ್ರಿಸ್ತಾಸ್ ಲಾಗುನ್ ಮಿ ಸಗ್ಳ ಕರಾಯಾ ಬಳಿಜಾ಼ಲ್ಯೊ.
ಆಸ ಆಸ್ತಾನಾ ತುಮಿ ಮಾಜಾ ತರಾಸಾತ್ ವಾಟದಾರ್ ಜಾ಼ಲ್ಯಾಲ ಬರಜಾ಼ಲ್ಹ. ಫಿಲಿಪಿತಲ್ಯಾನು, ಆಂದಿ ತುಮ್ಚಿಪ ಬರಿ ಖಬರ್ ಸಾಂಗುನ್, ಮಕೆದೊನ್ಯಾತ್ನಿ ನಿಗುನ್ ಜಾ಼ತಾನಾ ದೆನ್ಯಾ ಗೆನ್ಯಾಚೆ ಗುಸ್ಟಿತ್ ತುಮ್ಚೆ ಶಿವಾರ್ ದಿಸ್ರೆ ಕಚೆಸ್ ಮಂಡಳಿನಿ ಮನಾ ಮಜ಼ತ್ ಕಿಲಿನಾಹಿ ಮನ್ಹುನ್ ತುಮಾನಾ ಠಾವ ಹಾ. ಮಿ ಥೆಸಲೊನಿಕಾತ್ ಆಸ್ತಾನಾಬಿ ತುಮಿ ಯಂಗ್ದಾ ದೊಂದಾ ಮಾಜಿ ಗರಜ಼್ ಬಾಗಿವ್ಲಿಸಾ. ಮಿ ತುಮ್ಚಿಪ್ನಿ ದಿನ್ಗಿಚಿ ಆಶಾ ಕರಿತ್ನಾಹಿ ಫನ್ ತುಮ್‌ಚಾ಼ ಇಸೊಬ್ ವಾಡ್ವಾಚಾ಼ ಇಚ್ಚಾ ಹಾ. ಮನಾ ವ್ಹಯಿತ್ಯ ಹಾ, ಸಗ್ಳ ಆಸ್ನಾರಾ ಹಾ. ತುಮಿ ಎಪೊಪ್ರೊದಿಪಾಪ ಲಾವುನ್ ದಿಲ್ಯಾಲ ಮಾಜಿಪ ಪೊಚ್‌ಲ್ಯಾ ತ್ಯನಿ ಮಿ ಬರ‍್ಹುನ್ ಉತ್ತು ಆಲ್ಯೊ. ತ್ಯ ದೆವಾಲಾ ದಿಲ್ಯಾಲ ವಾಸಾಚ಼ ಯಜ್ಞ ಹ್ಯಸ್ ದೇವಾಲಾ ಮಾನ್ಯ ಜಾ಼ಲ್ಯಾ. ಮಾಜಾ ದೆವಾನಿ ಕ್ರಿಸ್ತ ಯೆಸುಪ್ನಿ ಆಪ್‌ಲ್ಯಾ ಉಜಿಡಾಚೆ ಸಾವ್ಕರಿಚೆಗತ್ ತುಮ್ಚಿ ಗರಜ಼್ ಬಾಗಿವ್ನಾರ್. ಆಮ್ಚಾ ಬಾ ದೆವಾಲಾ ಖಾಯಿಮ್ ಮೈಮೆ ವ್ಹವುನಿ. ತಸಸ್ ವ್ಹವುನಿ.
ಸರ್ತ ಸಲಾಮ್
ಕ್ರಿಸ್ತ ಯೇಸುಪಲ್ಯಾ ಸಗ್ಳ್ಯಾ ದೇವಾಚಾ ಲೊಕಾನಾ ಮಾಜ಼ ದನ್ಯಾವಾದ್ ಸಾಂಗಾ. ಮಾಜೆ ಸಂಗಚಿ ಬನ್ಹಿ ಬಾಹು ತುಮಾನಾ ನಮಸ್ಕಾರ್ ಸಾಂಗ್‍ತ್ಯಾತ. ಹಿತ್ತ ಆಸ್‌ಲ್ಯಾಲ್ಯಾ ಸಗ್ಳ್ಯಾ ದೇವಾಚಾ ಲೊಕಾಂಚಾನಿ ತುಮಾನಾ ನಮಸ್ಕಾರ್ ಸಾಂಗಲ್ಯಾ. ಲ ಕರುನ್ ಕೈಸರ್ ರಾಜಾಚಾ ಗರ‍್ಹಾತ್ಲಿ ತುಮಾನಾ ನಮಸ್ಕಾರ್ ಸಾಂಗತ್ಯಾತ. ಪ್ರಭು ಯೇಸು ಕ್ರಿಸ್ತಾಚಿ ಕ್ರಪಾ ತುಮ್ಚಾ ಆತ್ಮಾಸಂಗ ರಾಹುನಿ.
ದೆವಾಚಿ ಖರಿ ಕಬರ್. Copyright © 2023 The Word for the World International and Gowly Marathi Translation Samti, Karnataka. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.