ಎಫೆಸಾತ್‌ಲ್ಯಾನಾ 6:10

ಐ ಬಾ ಆನಿ ಪೊರ

1ಪೊರಾನು, ತುಮಿ ಪ್ರಭುಪ ಆಸ್‌ಲ್ಯಾಚೆಗತ್ ತುಮ್ಚೆ ಐ ಬಾಚ಼ ಐಕಾ ಹ್ಯ ಚಾಂಗ್ಲ. 2ವಾಗ್ದಾನ್ ಕೆಲ್ಯಾಲ್ಯಾಲಿ ಆಂದಿಚಿ಼ ಆಜ್ಞೆ ಐಕಾ, ತುಜೆ ಐ ಬಾಲಾ ಮರ‍್ಯಾದ್ ದಿಯಾವ್ಹಯಿ;1 3ಮರ‍್ಯಾದ್ ದಿಲ್ಯಾವ ತುಲಾ ಬರ ವ್ಹನಾರ್, ತು ದರ್ತಿವ ಖುಬ್ ದಿಸ್ ಜ಼ಗ್ನಾರ್.

4ಬಾಸಾನು, ತುಮ್ಚಾ ಪೊರಾನಾ ರಾಗ್ ಆನಾಚೆ಼ ಆಂದಿ, ಪ್ರಭುಲಾ ಆವ್ಡಸಾರ ತ್ಯನಾ ಶಿಸ್ತಿತ್ ಆನಿ ಶಿಕ್ಷನಾತ್ ವಾಡ್ವಾ.

ಸಾವ್ಕಾರ್ ಆನಿ ಗುಲಾಮ್

5ಗುಲಾಮಾನು, ಕ್ರಿಸ್ತಾಚ಼ ಐಕ್ತಾಸಾ ತಸಿಸ್ ದರ್ಥಿವ ತುಮಾನಾ ಸಾವ್ಕಾರ್ ಜಾ಼ಲ್ಯಾಲ್ಯಾನಾ ಮನಾತ್ ಭಿವುನ್ ಕ್ಯಾಪ್ರಿ ಬರುನ್ ಚಾ಼ಂಗಲ್ಯಾ ಮನಾನಿ ಐಕಾ. 6ಮಾನ್ಸಾಲಾ ಬಗಾಯಾಸಾಟಿ ಮಾಲಕ್ ಬಕ್ತಾ ಆಸ್ತಾನಾ ತ್ಯವ್ಡಿಸ್ ಚಾ಼ಕ್ರಿ ಕರಾಚೆ಼ ಆಂದಿ, ಕ್ರಿಸ್ತಾಚಾ ಗುಲಾಮಾ ಶಾರ್ಕ ದೇವಾಚ಼ ಚಿತ್ತ್ ಮನಾ ಪಸುನ್ ಕರಾ. 7ತುಮಿ ಕರತ್ಯಾಲಿ ಸೇವಾ ಮಾನ್ಸಾಚಿ ನವ್ಹ, ಪ್ರಭುಚಿ ಕರ್ತ್ಯಾವ್ ಮನ್ಹುನ್ ಮನಾ ಪಸುನ್ ಕರಾ. 8ಕಾ ಮಂಜೆ ಪರ್ತೆಕ್ ಯೊಕ್ ಮಾನುಸ್ ಗುಲಾಮ್ ವ್ಹವುನಿ ಸ್ವತಂತ್ರ ವ್ಹವುನಿ ಆಪ್ನು ಕಸ್ಲ ದೆತೊ ತ್ಯಂಚ಼ ಪ್ರತಿ ಪಳ್ ಪ್ರಭುಪ್ನಿ ಗೆನಾರ್ ಮನ್ಹುನ್ ತುಮಾನಾ ಸಮಾಜ಼್‍ಲ್ಯಾ ನವ್ಹ.

9ದನ್ಯಾನು, ತುಮ್ಚಾ ಗುಲಾಮಾಚೆ ಗುಸ್ಟಿತ್ ತೆಸ್ ತರನಿ ಚಾ಼ಲಾ. ಸ್ವರ್ಗಾತ್ ತುಮಾನಾಬಿ ತ್ಯನಾಬಿ ದನ್ಹಿ ಹಾ ಮನ್ಹುನ್ ತ್ಯಂಚಿಪ ಪಕ್ಷಪಾತ್ ನಾಹಿ ಮನ್ಹುನ್ ಸಮ್‌ಜು಼ನ್ ತುಮ್ಚಾ ಗುಲಾಮಾನಾ ಬ್ಯಾ ಗಾಲಾಚ಼ ಸುಡುನ್ ದೆವಾ.

ದೇವಾಚಿ಼ ಶಸ್ತ್ರ

10ಸರ್ತ ಸಬಾತ್ ಕ್ಯಾ ಮಂಜೆ , ತುಮಿ ಪ್ರಭುಪ ತ್ಯಚ಼ ಖುಬ್ ಬಳ್ ಗೆವಾ. 11ಸೈತಾನಾಚೆ ಯವಜ಼ನಾಲಾ ಆಡ್ವ ಉಬ ರಾಹ್ಯಾ ವ್ಹಯಿಸಾರ ದೇವಾನಿ ದಿಲ್ಯಾಲಿ ಸರ್ವಿ ಶಸ್ತ್ರ ಗಾಲಾ. 12ಆಮಚಿ ಲಡಾಯಿ ಮಾನ್ಸಾಚೆ ಸಂಗ ನವ್ಹ. ರಾಜಾವ್ನಿ, ಅಧಿಕಾರ‍್ಯಾವ್ನಿ, ಹ್ಯಾ ಅಂದಾರಾಚಾ ಲೊಕಾತ್‌ಲ್ಯಾ ಅಧಿಕಾರ‍್ಯಾವ, ಆಬ್ಳಾತ್‌ಲ್ಯಾ ಬುರ್ಶಾ ಸೈನ್ಯಾವ, ಆಮಿ ಲಡ್ನಾರಿ ಜಾ಼ಲ್ಯಾವ್. 13ಮನ್ಹುನ್ ತ್ಯಾ ಬುರ್ಶಾ ದಿಸಾತ್ ವಾದಿಂಚೆ ಮೊರ‍್ಹ ಉಬರಾಹ್ಯಾ ಕರಾಯಾ ವ್ಹಯಿತ್ಯ ಸಗ್ಳ ಕರುನ್ ಗಟ್ ಉಬರಾಹ್ಯಾ ವ್ಹಯಿಸಾರ ದೇವಾನಿ ದಿಲ್ಯಾಲಿ ಸರ್ವಿ ಶಸ್ತ್ರ ಗಾಲುನ್‌ಗೆವಾ.

14ಖರ ಮಂತ್ಯಾಲಾ ಪಟಾ ತುಮ್ಚೆ ಕಂಬ್ರಸ್ ಬಾದುನ್, ನೀಯೆತ್ ಮಂತ್ಯಾಲ ಶಾತಿಚಾ಼ ಕವಚಾ ಗಾಲುನ್, 15ಥಂಡ್ಪನಾಚಿ಼ ಬರಿ ಖಬರ್ ಸಾಂಗಾಯಾ ತಯಾರ್ ಜಾ಼ಲ್ಯಾಲ್ಯಾ ವ್ಹಾನಾ ಪಾಯಾತ್ ಗಾಲುನ್ ಉಬಿರಾವ್ಹಾ. 16ಸಗ್‌ಳ್ಯಾಚೆ ಆಂದಿ ಇಸ್ವಾಸಾಚ಼ ಡಾಲ ಹಾತಾತ್ ದರಾ. ತ್ಯನಿ ತುಮಿ ವೈರಿಚಾ ಇಸ್‌ತ್ಯಾಂಚ಼ ಬಾನ್ ಇಜ್ವಾ಼ಯಾ ವ್ಹಯಿಲ್. 17ಆನಿ ರಕ್ಷನಾಚ಼ ಶಿರಸ್ತ್ರಾನ್ ಡುಯಿವ ಥಿವುನ್ ಪವಿತ್ರಾತ್ಮ ದೆತ್ಯಾಲ ದೇವಾಚಿ಼ ವಾಕ್ಯಾ ಮಂತ್ಯಾಲ ಹಾತ್ಯಾರ ಹಾತಾತ್ ದರಾ. 18ತುಮಿ ಪವಿತ್ರಾತ್ಮಾನಿ ಬರುನ್ ಸಗ್‌ಳ್ಯಾ ಯಳಾತ್ ಸಗ್ಳೆತರಚಾ ಮಾಗ್‌ನ್ಯಾನಿ ಕ್ರತಜ್ಞಾನಿ ದೇವಾಲಾ ಮಾಗ್ನ ಕರಾ. ಹ್ಯಾತ್ ಶಾಶ್ವತ್ ಮನಾನಿ ಬರುನ್ ದೇವಾಚಾ ಪೊರಾಂಚೆ ಗುಸ್ಟಿತ್ ಖಾಯಿಮ್ ಮಾಗ್ನ ಕರಿತ್ ಜಾ಼ಗ್ರುತ್‌ರಾವ್ಹಾ. 19ಆನಿ ಮಾಜಿ಼ ಸಾಟಿ ಸಾಯಿತ್ ಮಾಗ್ನ ಕರಾ. ಮೀ ಬೊಲ್ತಾನಾ ಪೈಲ್ಯಾ ಕಾಲಾತ್ ಚು಼ರುನ್ ಆಸ್‍ಲ್ಯಾಲ ಬರೆ ಖಬ್ರಿಚ಼ ಖರ ಬ್ಯಾ ನಸ್ತಾನಾ ಸಾಂಗಾಯಾ ಪಾಯ್ಜೆತ್ಯಾ ಬೊಲ್ಯಾ ದೇವ್ ಮನಾ ದಿವುನಿ ಮನ್ಹುನ್ ಮಾಗ್ನ ಕರಾ. 20ತಿ ಬರಿ ಖಬರ್ ಗಿಹುನ್ ಜಾ಼ತ್ಯಾಲಾ ವಕಿಲ್ ಮೀ ತುರುಂಗಾತ್ ಹಾ ನವ್ಹ. ತ್ಯಚೆ ಗುಸ್ಟಿತ್ ಮೀ ಬೊಲಾಯಾ ವ್ಹಯಿ ಆಸ ಧೀರಾನಿ ಬೊಲಾಯಾ ಮಾಜಿಸಾಟಿ ಮಾಗ್ನ ಕರಾ.

ಸರ್ತ್ಯಾ ಬೊಲ್ಯಾ

21ಮಾಜೆ ಗುಸ್ಟಿತ್ ಮಾಜ಼ ಕಾಮ್‍ ತುಮಾನಾ ಸಮಜ಼ ಸಾರ ಮಾಯೆಚಾ಼ ಬಾಹು ಪ್ರಭುವ ಇಸ್ವಾಸಾಚಾ ಸೇವಕ್ ಜಾ಼ಲ್ಯಾಲಾ ತುಖಿಕ್ ತುಮಾನಾ ಸಗ್ಳ ಸಾಂಗ್ನಾರ್. 22ತುಮಿ ಆಮ್ಚಾ ಗುಸ್ಟಿ ಸಮಜು಼ನ್ ಗಿಹಿಸಾರ, ತ್ಯೊ ತುಮ್ಚಿ ಮನ ಸಮ್‌ಜಾವಿ ಶಾರ್ಕ ತ್ಯಲಾ ತುಮ್ಚಿಪ ಲಾವುನ್‌ದಿಲ್ಯಾ.

23ಬಾ ದೇವಾಪ್ನಿ ಪ್ರಭು ಯೇಸು ಕ್ರಿಸ್ತಾಪ್ನಿ ಥಂಡ್ಪನ್, ಇಸ್ವಾಸಾನಿ ಬರ್ಲ್ಯಾಲಿ ಮಾಯಾ ಸಗ್‌ಳ್ಯಾ ಇಸ್ವಾಸಿ ಬನ್ಹಿ ಬಾವ್ಹಾನಾ ಲಾಬುನಿ. 24ಆಮ್ಚಾ ಪ್ರಭು ಯೇಸು ಕ್ರಿಸ್ತಾಲಾ ಖಾಯಿಮ್ ಮಾಯಾ ಕರ್ನಾರ‍್ಯಾ ಸಗ್‌ಳ್ಯಾಂಚಿವ ದೇವಾಚಿ಼ ಕ್ರಪಾ ರಾಹುನಿ.