हाग्गय 2

नवा भवन की शोभा

1फिर सातवा महिना का येकविसवो दिन खे यहोवा को यो वचन हाग्गै भविष्यद्वक्‍ता का नजीक आयो, 2“शालतीएल को बेटो यहूदा को अधिपति जरुब्बाबेल, अरु यहोसादाक को बेटो यहोशु महायाजक, अरु सब बच्या हुया दुन्या से या बात बोली, 3तुम मे से कोन हइ, जेने या भवन की पहली महिमा देखी हइ? अब तुम येखे कसी दशा मे देखस हइ? का यो सच्ची नी हइ कि या तुमारी नजर मे उ पहले की अपेक्षा कुछ भी अच्छो नी हइ?1 4तेभी, अब यहोवा की या वचन हइ, हे जरुब्बाबेल, शक्ति बाधी अरु हे यहोसादाक को बेटो यहोशु महायाजक, हिम्मत बांध; अरु यहोवा कि या भी वचन हइ. कि हे देश का सब दुन्याहोन, हिम्मत करी खे काम कर, क्युकि मी तुम्हारा संग हइ, सेनाहोन का यहोवा की या वचन हइ. 5तुम्हारा मिस्र देश से निकलन का टेम जो वादो मे ने तुम से बाँधी थी, उ वचन का अनुसार मरी आत्मा तुम्हारा बीच मे बनी हइ; येकालिये तुम मत डर.2 6क्युकी सेनाहोन को परमेश्वर यों बोलस हइ, अब थोडी देर बाकी हइ कि मी बद्दल अरु धरती अरु समुदर अरु जमिन सब खे कपाह्यु.3 7मी सब राष्ट्रहोन खे कपाह्यु, अरु सब देश-देशहोन की कीमती चिजहोन आये; अरु मी यो भवन खे अपनी महिमा से भरी दियु, सेनाहोन का यहोवा को यो वचन हइ. 8चांदी तो मरी हइ, अरु सोनो भी मरो ही हइ, सेनाहोन खे यहोवा की या वचन हइ. 9यो भवन का पिछे की शोभा या पहली शोभा से बडी हुये, सेनाहोन का परमेश्वर कि या वचन हइ, अरु या जगा मे मी शान्ति दियु, सेनाहोन का परमेश्वर कि या वचन हइ.”

भविष्यद्वक्‍ता खे याजकहोन से सवाल करनो

10दारा राजा का शासन काल का दुसरा साल का नव्वो महिना का चौबीसवा दिन खे यहोवा को यो वचन हाग्गै भविष्यद्वक्‍ता का नजीक आयो, 11“सेनाहोन को परमेश्वर यो बोलस हइ : याजकहोन से या बात की व्यवस्था पूछ, 12‘अगर कोय अपना कपडा का पदर मे पवित्र मांस बाधीखे, उ पदर से रोटी या बनायो हुयो खानो या अंगुर रस या तेल या कोय प्रकार को खान खे छीये, ते का उ खानो पवित्र ठर्ये?’” याजकहोन ने जवाब दियो, “नी”. 13फिर हाग्गै ने पुछ्यो, “अगर कोय इन्सान का लाश का कारन अशुदध हुइखे असी कोय चिज खे छीये, ते का उ अशुदध ढर्हे?” याजकहोन ने जवाब दियो, “हव, अशुदध ढर्हे.”4 14फिर हाग्गै ने बोल्यो, “यहोवा की या वचन हइ, कि मरी नजर में या जनता अरु यो देश वसो ही हइ, अरु उनको सब काम भी असो हइ; अरु जो कुछ वे व्हा चडास हइ, वा भी अशुध्द हइ.

आशीर्वाद को वादो

15“अब अपना दिल मे बिचार कर कि आज से पहीले जब यहोवा को भवन बनाना मे एक फत्तर पर दुसरो फत्तर रख्यो जाना से पहले चिजहोन कसी थी, 16वे दिन मे जब कोय अनाज का बीस पायली की आस से जास, तब दस ही पातो थो, अरु जब कोय अंगूर का रस का कुण्ड का आस नजीक से जाता कि पचास बर्तन भरी निकाल्या, तब बीस ही निकलता था. 17मे ने तुम्हारी सब खेत खे लू अरु मुआ अरु गार से मार्यो, तेभी तूम मरा तरप नी फिऱ्या, यहोवा को यो वचन हइ. 18अब अपना दिल मे विचार कर, कि आज से पहीले अर्थात् जो दिन यहोवा का मन्दिर को पय्यो डाल्यो गयो, उ दिन से लिखे नव्वा महिना का चौबीसवा दिन तक की दशा का थी? येको विचार कर. 19का अब तक बीज कोठी मे हइ? अब तक अंगूर का बगीचा मे अंजीर अरु अनार अरु जैतून का झाड मे फल नी लगे, पन आज का दिन से मी तुम खे आशिर्वाद देतो र्‍हियु.”

जरुब्बाबेल से परमेश्‍वर को वादो

20उही महिना का चौबीसवा दिन खे दूसरी बार यहोवा को यो वचन हाग्गै का नजीक आयो : 21“यहुदा का अधिकारी जरुब्बाबेल से यों बोल, मी बद्दल अरु धरती दोइ खे कपाह्यु, 22अरु मी देश-देश पर शासक करन वाला कि गद्दी खे उलटय दियु; मी देश-देश का उपर राज करन आला को राज को बल के तोडी दियु, अरु रथ खे सवारी समेत उलटय दियु; अरु घोडा समेत सवार एक दूसरा की तलवार से मार्या जाये. 23सेनाहोन खे यहोवा की या वचन हइ, उ दिन, हे शालतीएल का बेटा मरा सेवक जरुब्बाबेल, मी तोखे लिखे मुहरआली मुंदी का जसो रख्यु, परमेश्वर को यो वचन हइ. क्युकी तोखे मने चुनी लियो हइ, सेनाहोन खे परमेश्वर को यो वचन हइ.”