Skip to content
BibleKenya

Gowlan Bible

हाग्गय 1

मन्दिर फिर से बनान कि आज्ञा

दारा राजा का शासन काल का दुसरा साल का छटवो महीना को पयलो दिन, यहोवा को यो वचन, हाग्गै भविष्यद्वक्‍ता का तरप से शालतीएल को बेटो जरुब्बाबेल का नजीक, जो यहुदा को अधिकारी थो, अरु यहोसादाक को बेटो यहोशु महायाजक का नजीक पोच्यो :1 “सेनाहोन को परमेश्वर यों बोलस हइ : ये दुन्या बोलस हइ कि यहोवा को भवन बनान को टेम आयो नी हइ.” फिर यहोवा को यो वचन हाग्गै भविष्यद्वक्‍ता का तरप से आयो, “का यो टेम हइ कि तुम खुद छत वाला घरहोन मे ऱ्हे, अरु यो भवन उजाड पड्यो ऱ्हिये?” येकालिये सेनाहोन को परमेश्वर यो बोलस हइ, अपना अपना कामहोन पर ध्यान कर. तुम ने भोत बोयो पर थोडो काट्यो; तुम खास हइ, पर मगन नी होय; तुम पीस हइ, पन प्यास नी बुझे; तुम कपडा पेनस हइ, पन गरम नी होय; अरु जो मजुरी करस हइ, उ अपनी मजुरी की कमइ खे छेदआला झोला मे रखस हइ. “सेनाहोन को परमेश्वर तुम से बोलस हइ : अपना अपना कामहोन पर सोचनु. पहाड पर चढी जा अरु लकडी ला अरु यो भवन बना; अरु मी ओखे देखीखे खुश हुयु, अरु मरी महिमा हुये, यहोवा को यो वचन हइ. तुम ने भोत उपज की आस रखी, पन देख थोडी ही हइ; अरु जब तुम ओखे घर मे लि आया, तब म ने ओखे उडय दियो. सेनाहोन का यहोवा की या वाणी हइ, असो क्युव हुयो? क्युकि मरो भवन उजाड हुयो हइ अरु तुम मे से हर एक अपना अपना घर कि फिकर करस हइ? यो कारण बद्दल से ओस गिरानो अरु जमिन से अनाज उंगानो दोइ बन्द हइ. मरी आज्ञा से जमिन पर अरु पहाडहोन पर, अरु अनाज अरु नवा अंगुर का बगीचा पर अरु तेल पर, अरु जो कुछ जमीन से निकलस हइ ओका पर, अरु इन्सानहोन अरु घरका जनवरहोन पर, अरु उनका मेहनत की सब कमइ पर भी अकाल पड्यो हइ.”

दुन्याहोन का वजेसे परमेश्‍वर की आज्ञा माननु

तब शालतीएल को बेटो जरुब्बाबेल अरु यहोसादाक को बेटो यहोशु महायाजक ने सब बच्या हुया दुन्या का साथ अपना परमेश्‍वर यहोवा की बात मानी; अरु जो वचन उनका परमेश्‍वर यहोवा ने उन से बोलन का लिये हाग्गै भविष्यद्वक्‍ता खे भेजी दियो थो, ओखे उनने मानी लियो; अरु दुन्या ने यहोवा को डर मान्यो. तब यहोवा को खबर बतानआला हाग्गै ने यहोवा से आज्ञा लिखे वे दुन्या से यो बोल्यो, “यहोवा को यो वचन हइ, मी तुम्हारा संग हइ”. अरु यहोवा ने शालतीएल को बेटो जरुब्बाबेल खे जो यहुदा को अधिकारी थो, अरु यहोसादाक को बेटो महायाजक यहोशु खे, अरु सब बच्या हुया दुन्या का मन खे उत्साह से भरी दियो कि वे अयखे अपना परमेश्‍वर, सेनाहोन यहोवा का भवन खे बनाना मे लगी जाये. यो दारा राजा का शासन काल का दुसरा साल का छटवा महीना मे चौबीसवो दिन हुयो.

Source notes (1)
  1. Cross-reference एज्रा 4:24—5:2; 6:14

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.