Gowlan Bible
उत्पत्ति 40
बन्दीहोन खे सपना को अर्थ बतानो
या बतहोन का बाद असो हुयो की मिस्र को राजो खे पिलान आला अरु खानो पकान आला ने अपना स्वामी का विअरुध्द कुछ अपराध कर्यो. तब फिरोन ने अपना उन दोय हाकिमहोन, अर्थात पिलान आला का प्रधान, अरु खानो पकान आला को प्रधान पर घुस्सा हुय खे. उन खे कैद करी खे, अंगरक्षहोन को प्रधान का घर मे उय बन्दीघर मे जहा युसुफ बन्दी थो, डाली दियो. तब अंगरक्षहोन को प्रधान ने उन खे युसुफ का हाथ मे सोप्यो, अरु उ ओकी सेवा टहल करन लग्यो अत; वे कुछ दिन तक बन्दिघर मे र्हिये. मिस्र का राजा खे पिलानेहारों अरु भोजन बनान आलो जो बन्दिघर मे बन्द थो, उन दोय ने एक ही रात मे अपना अपना हुनर का अनुसार, सपनो देख्यो. सुबह जब युसुफ उनका पास अन्दर गयो, तब उन पर ओने जो नजर करी, ते का देख्यो है कि वे उदास हइ. येकालिये ओने फिरोन का उन हाकिमहोन से जो ओका साथ ओका स्वामी का घर का बन्दीघर मे थो, पूछ्यो “आज तुम्हारा मुंडो क्यु उदास हइ?” उनने ओकासे बोल्यो, “हम दोय ने सपनो देख्यो हइ, अरु उनको अर्थ बतान आलो कोय भी नी.” युसुफ ने उनसे बोल्यो, “का सपना को का अर्थ बोलनो परमेश्वर को काम नी हइ? मे खे अपनो अपनो सपनो बतानु.” तब पिलानेहारो को प्रधान अपनो सपनो युसुफ खे यो बतान लग्यो; “मेने सपना मे देख्यो, कि मरा सामने एक अंगुर कि बेल हइ. अरु उ अंगुर मे तीन बेल होन हइ अरु ओमे मानो कलिहोन लगी हइ, अरु वे फुल अरु ओका गुच्छा मे अंगुर लगी खे पकी गय. अरु फिरोन को कटोरा मे पिर्यो अरु कटोरा खे फिरोन का हाथ मे दियो.” युसुफ ने ओका से बोल्यो, येको फल यो हइ: तीन बेल को मतलब तीन दिन हइ. येकालिये अब से तीन दिन का अन्दर फिरोन राजो तरो माथो उचो कर्ये, अरु तू पैयले का समान फिरोन का पिलान आला हुय खे ओको कटोरो ओका हाथ मे फिर दिया कर्ये. अत; जब तरो भलो हुय जाये तब मे खे याद करननो अरु मरा पर कृपा करी खे फिरोन से मरी चर्चा चलानु, अरु यो बन्दिघर से मे खे छुडैइ देनु. क्युकि सचमुच इब्रानिहोन का देश से मे खे चोरी खे लायो गयो हइ, अरु यहा भी मेने कोय असो काम नी कर्यो जेका कारण मी यो कारागार मे डाल्यो जायु. यो देखी खे कि ओने सपना को अर्थ अच्छो निकल्यो भोजन पकान आला को प्रधान ने युसुफ से बोल्यो, मेने भी सपनो देख्यो हइ, उ यो हइ: मेने देख्यो कि मरा माथा पर सफेद रोटी की तीन टोपलिहोन हइ. अरु उपर की टोकरी मे फिरोन का लिये सब प्रकार की पकी पकइ चिजहोन हइ; अरु चिडी मरा माथा पर की टोकरी मे से उ चिजहोन खे खै र्हा हइ. युसुफ ने बोल्यो, “येको फल यो हइ: तीन टोपलीहोन को अर्थ तीन दिन हइ. अब से तीन दिन का अन्दर फिरोन तरा माथो काटी खे तो खे एक खम्बा पर टांगी दियो, अरु चिडी थरा मास खे नोची खे खाये.” अरु तीसरा दिन फिरोन को जन्मदिन थो, ओने अपना सब कर्मचारीहोन खे खानो दियो, अरु ओमे से पिलान आला को प्रधान, अरु पकान आला को प्रधान, दोय खे जेलखानो से निकाल्यो. पिलान आला को प्रधान खे तो पिलान आला का पद पर फिर से नियुक्त कर्यो, अरु उ फिरोन का हाथ मे कटोरो देन लग्यो. पर भोजन पकान आला खे प्रधान खे ओने टांगी दियो, जसो कि युसुफ ने उनका सपना को अर्थ उनसे बोल्यो थो. फिर भी पिलान आला को प्रधान ने युसुफ खे याद नी रखनु; पर ओ खे भुली गया.
Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.