Skip to content
BibleKenya

Gowlan Bible

उत्पत्ति 35

बेथेल मे परमेश्वर को याकुब खे आशिर्वाद देनो

तब परमेश्वर ने याकुब से बोल्यो, “यहा से निकली खे बेथेल खे जा, अरु व्‍हा ही र्‍हे; अरु व्हा परमेश्वर को वेदी बना, जेने मे खे उ टेम्मे दर्शन दियो, जब तू अपना भी एसाव का डर से भागी जातो थो.”1 तब याकुब ने अपना घरना से, अरु उन सबसे भी जो ओका संग था, बोल्यो, “तुम्हारा बिच मे जो पराया देवता हइ, उनके खे निकाल फेकनु; अरु अपना अपना खे शुध्द करनु, अरु अपना कपडा बदली डालनु. अरु आनु, हम याह से निकली खे बेथेल नगर खे जानु, व्हा मी परमेश्वर का लिये एक वेदी बनायु, जेने संकट का दिन मरी सुनी ली, अरु जो रस्था से मी चलतो थो, ओमे मरा संग र्‍हे.” येकालिये जित्ता पराया देवता उनका पास था, अरु जित्ता कुन्डल उनका कानहोन मे थी, उन सभी खे उनने याकुब खे दि दि; अरु ओने उन खे उ पवित्र झाड का निचे, जो शेखेम का पास हइ, गाडी दियो. तब वे वहा से नकली गया उनका चारी तरफ का नगर का र्‍हेनआला का मन मे परमेश्वर का तरफ से असो डर समैइ गयो, कि उनने याकुब का बेटाहोन खे पिछो नी कर्यो. याकुब ने जो सब ओका साथ था, वे सब खे लि खे कनान देश का लूज नगर खे आयो, उ नगर बेतेल भी बोल्यो जास हइ. व्हा ओने एक वेदी बनैय, अरु उ जगा को नाम एलबेतेल2 रख्यो क्योकि जब उ अपना भैइ का डर से भागी जातो थो तब परमेश्वर ओका पर वही प्रगट हुयो थो. अरु रिबका को बच्चा खे दुध पिलान आली दाइ दबोरा मरी गय, अरु बेतेल को पवित्र झाड का निच्चे ओ खे मट्टी दी गय, अरु उ पवित्र झाड को नाम अल्लोनबक्कूत3 रख्यो गयो. फिर याकुब को पद्दनराम से आना का बाद परमेश्वर ने दुसरी बार ओ खे दर्शन दि खे आशिर्वाद दियो. अरु परमेश्वर ने ओकासे बोल्यो “अब तक तरो नाम याकुब र्हियो; पर आगे से तरो नाम याकुब नी र्‍हिये, तू इस्राएल बोल्याजाये,” सयो प्रकार ओने ओको नाम इस्राएल रख्यो. 4 फिर परमेश्वर ने ओका से बोल्यो, “मी सर्वशक्तिमान परमेश्वर आय, तू फुल्ये फल्ये अरु बड्ये; अरु तरासे एक जाति अरु जातिहोन कि एक मण्डली भी पैदा हुये, अरु तरा कुल मे राजाहोन पैदा हुये.5 अरु जो देश मेने अब्राहम अरु इसहाक खे दियो हइ, उय देश तो खे देउस हइ, अरु तरा पीछे तरा कुल खे भी दियु.” तब परमेश्वर उ जागा मे, जहाँ ओने याकुब से बात करी की, उनका पास से उपर चडी गया. अरु जो जगा मे परमेश्वर ने बात करी, व्हा याकुब ने पत्थर को एक खम्बो खडो कर्यो, अरु ओका पर पेयबली दे खे जैतुन को तेल अरु द्राखरस डाली दियो. जहा परमेश्वर ने याकुब से बात करी, वा जगा के नाम ओने बेतेल रख्यो.

राहेल को मरनो

फिर उनने बेतेल नगर से निकली खे अरु एप्राता नगर थोडी ही दूर र्‍हि गयो थो कि राहेल खे बच्चो जनन कि बडी पीडा उठन लगी. जब ओ खे बडो-बडो दर्द उठन लग्यो तब दाइ ने ओकासे बोल्यो, “मत डर; अब भी तो खे बेटो ही हुये.” तब असो हुयो कि व्हा मरी गय, अरु जान निकलते ओने उ बेटा का नाम बेनोनी रख्यो; पर ओको बाप ने बिन्यामिन6 रख्यो. अरु राहेल मरी गय, अरु एप्राता, अरु बैतलहम का जगा मे, ओ खे मट्टी दी गय. अरु याकुब ने ओकी कब्र पर एक खम्बो खडो कर्यो; राहेल की कब्र को उ खम्बो आज तक बन्यो हइ. फिर इस्राएली वहा से निकली खे अरु एदेर नामको गुम्मट का आगे बडी खे अपनो तम्बु खडो कर्यो.

याकुब का बेटा

(1 इतिहास 2:1-2)

जब इस्राएल उ देश मे बस्यो तो, तब एक दिन असो हु कि रुबेन ने जैय खे अपना बाप कि रखैल बिल्हा का सात कुर्कम कर्यो; अरु या बात इस्राएल खे मालुम हुय गय, याकुब का बारा बेटा हुया. उनमे से लिआ का बेटा ये था; अर्थात याकुब से बडो, रुबेन, फिर शिमोन, लेवी, यहुदा इस्साकार, अरु जबूलून. अरु राहेल का बेटा ये था: अर्थात युसुफ अरु बिन्यामिन. अरु राहेल की दासी बिल्हा का बेटा ये था; अर्थात दान, अरु नप्ताली. अरु लिआ की दासी जिल्पा का बेटा ये हुया था; अर्थात गाद, अरु आनेर, याकुब का ये ही बेटा हुया, जो ओकासे पद्दनराम क्षेत्र मे पैदा हुया.

इसहाक को मरनो

अरु याकुब मम्रे मे, जो किर्यत अर्बा, अर्थात हेब्रोन हइ, जहाँ अब्राहम अरु इसहाक परदेशी हुय खे रीया था, अपना बाप इसहाक का पास आया.7 इसहाक कि उम्र एक सौ अस्सी साल की हुय. अरु इसहाक कि जान छुटी गय, अरु उ मरी गयो, अरु उ बुड्डो अरु पुरी उम्र को हुय खे अपना इन्सानहोन मे जैय मिल्यो; अरु ओको बेटो एसाव अरु याकुब ने ओ खे मट्टी दी.

Source notes (7)
  1. Footnote उत्पती 28:11-17
  2. Footnote एलबेतेल बेतेल का परमेश्वर
  3. Footnote अल्लोनबक्कूत रुडाने वाला बीज
  4. Footnote उत्पती 32:28
  5. Footnote उत्पती 17:4,8
  6. Footnote बिन्यामिन मरो दाहिनी हात का बेटा
  7. Footnote उत्पती 13:18

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.