Gowlan Bible
उत्पत्ति 18
इसहाक को पैदाहोन कि प्रतिक्षा
अब्राहम मम्रे को पवित्र झाडहोन का बीच कड़ी धूप को टेम झोपडी का दरवाजा पर बठ्यो हुयो थो, तब परमेश्वर ने ओ खे दर्शन दियो : ओने आँख उठी खे नजर करी ते का देख्यो, कि तीन इन्सान ओका सामने खडा हइ, जब ओने उन खे देख्यो तब उ उनसे भेट करन का लिये झोपडी का दरवाजा से दौड्यो, अरु जमीन पर गिरी खे प्रनाम कर्यो अरु बोलन लग्यो,1 “हे प्रभु, अगर मरा पर तरा अनुग्रह की नजर हइ ते मी बिंनती करुस हइ, कि अपना दास का पास से चली नी जानु. मी थोडो सो पाणी लउस हइ अरु खुद अपना पाय धोय खे उ झाड का निच्चे अराम कर. मी एक टुकडो रोटी ली आउ, अरु ओकासे खुद अपना-अपना जीव खे तृप्त करनु; तब ओका बादमे आगे बडनु क्युकि खुद अपना दास का पास येकालिये आया हइ.” उनने बोल्यो, “जसो तू बोलस हइ वसो ही कर.” तब अब्राहम तुरुत झोपडी मे सारा का पास गयो अरु बोल्यो, “दस किलो मैदो जल्दी से गूँध, अरु रोटी बना.” फिर अब्राहम गाय-बैल का झुण्ड मे दौड्यो, अरु एक कोमल अरु अच्छो बच्चो लि खे अपना सेवक खे दियो, अरु ओने जल्दी से ओ खे बनायो. तब ओने दही, अरु दूध, अरु बच्चा को माँस, जो ओने बनायो थो, लि खे उनका सामने पोरसी दियो; अरु खुद झाड का निच्चे उनका पास खडो र्हिये, अरु वे खान लग्या.
उनने ओकासे पूछ्यो, “तरी लुगय सारा कहा हइ?” ओने बोल्यो, “वा तो झोपडी मे हइ.” ओने बोल्यो, “अब से नव महिना का बाद मे मी निश्चय तरा पास फिर आयु; अरु तरी लुगय सारा खे एक बेटो पैदा हुये” सारा झोपडी का दरवाजा पर जो अब्राहम का पीछे थो सुनी र्हि थी.2 अब्राहम अरु सारा दोयझन भोत शान्या था; अरु सारा को मासिक धर्म बन्द हुय गयो थो. येकालिये सारा मन मे हसी खे बोलन लगी, “मी तो शानी हइ, अरु मरो अदमी भी शानो हइ, ते का मे खे यो सुख हुये?”3 तब परमेश्वर ने अब्राहम से बोल्यो, “सारा यो बोली खे क्यु हसी, कि का मरा, जो असी शानी हुय गय हइ, सच्ची एक बेटो पैदा हुये? का परमेश्वर का लिये कोय काम मुशकिल हइ? सइ टेम मे, अर्थात् वसन्त ऋतु मे, मी तरा पास फिर आयु, अरु सारा खे बेटो पैदा हुये.”4 तब सारा डर का मारे यो बोली खे मुकरी गय, “मी नी हसी,” ओने बोल्यो, “नी; तू हसी थी.”
अब्राहम को सदोम का लिये निवेदन
फिर वे इन्सान व्हा से चली खे, सदोम का तरफ नजर करी; अरु अब्राहम उन खे बिदा करन का लिये उनका संग-संग चल्यो. तब परमेश्वर ने बोल्यो, “यो जो मी करुस हइ ओ खे का अब्राहम से लुक्यै खे रखु? अब्राहम से ते निश्चय एक बडी अरु सामर्थी जात जन्म्ये, अरु धरती की पुरी जातहोन ओका वजेसे आशीष मिल्हे. क्युकि मी जानुस हइ, कि उ अपना बेटाहोन अरु परिवार खे जो ओखा पीछे र्हि जाये, आज्ञा दिये कि वे परमेश्वर का रस्ता मे अटल बन्या र्हिये, अरु धार्मिकता अरु न्याय करता र्हिये, जबकी जो कुछ परमेश्वर ने अब्राहम का बारे मे बोल्यो हइ ओ खे पुरो करनु.” फिर परमेश्वर ने बोल्यो, “सदोम अरु गमोरा का खिलाप चिल्लाहट बडी गय हइ, अरु उनको पाप बहुत भारी हुय गयो हइ; येकालिये मी उतरी खे देख्यु, कि ओका जसी चिल्लाहट मरा कान तक पहुची हइ, उन खे ठीक ओसो ही काम कर्यो हइ कि नी; अरु नी कर्यो हो ते मी ओ खे जानी लियु.” तब वे इन्सान व्हा से घुमे खे सदोम का तरफ जान लग्या; पर अब्राहम परमेश्वर का आगे खडो र्हि गयो. तब अब्राहम ओका सामने जैय खे बोलन लग्यो, “का तू सचमुच पापी का संग धर्मी खे भी खत्म कर्ये? कदाचित् उ नगर मे पचास धर्मी हुय ते का तू सच्ची वा जगा खे खत्म कर्ये अरु उन पचास धर्मिहोन का कारण जो ओमे हुये उन खे नी छोड्ये? यो प्रकार को काम करनो तरा से दूर र्हिये कि दुष्टहोन का साथ धर्मी खे भी मारी डाल्ये अरु धर्मी अरु दुष्ट दोय की एक ही दशा हो, यो तरा से दूर र्हिये का पुरी धरती को न्यायी न्याय नी कर्ये?” परमेश्वर ने बोल्यो, “अगर मे खे सदोम मे पचास धर्मी मिल्ये, ते उनका कारण उ नगर खे छोड्ये.” फिर अब्राहम ने बोल्यो, “हे प्रभु, सुन मी तो मट्टी अरु राख हइ; ते भी मेने येत्ती हिम्मत करी कि तरा से बात कर्यु. कदाचित् उन पचास धर्मीहोन मे पाँच घटी जाये; ते का तू पाँच ही खे घटन का कारण उ पुरा नगर खे खत्म कर्ये?” ओने बोल्यो, “अगर मे खे ओमे पैतालीस भी मिलये, ते भी उनको खात्मो नी करन को.” फिर ओने ओकासे यो भी बोल्यो, “कदाचित् व्हा चालीस मिल्ये” ओने बोल्यो, “ते की चालीस का कारण भी असो नी कर्यु.” तब आब्राहम ने बोल्ये, “हे प्रभु, घुस्सा नी करनु, ते मी कुछ अरु बोल्यु: कदाचित् व्हा तीस मिल्ये” ओने बोल्यो, “अगर मे खे व्हा तीस भी मिल्ये, ते भी असो नी कर्यु.” फिर ओने बोल्यो, “हे प्रभु, सुन, मेने येत्ती हिम्मत से करी हइ कि तरा से बात कर्यु : कदाचित् ओमे बीस मिल्ये” ओने बोल्यो, “मी बीस का कारण भी ओ खे खत्म नी करु.” फिर ओने बोल्यो, “हे प्रभु, घुस्सा नी करनु, मी एक ही बार अरु बोल्यो: कदाचित् ओमे दस मिल्ये,” ओने बोल्यो, “ते मी दस का कारण भी ओ खे खत्म नी कर्यु.” जब परमेश्वर अब्राहम से बातहोन करी हुया, तब चली गयो : अरु अब्राहम अपना घर खे पल्टी गयो.
Source notes (4)
- Footnote इब्राहम 13:2
- Footnote रोम 9:9
- Footnote 1 पतरस 3:6
- Footnote लुका 1:37
Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.