Gowlan Bible
उत्पत्ति 15
अब्राम का साथ परमेश्वर को वाचा करन को वर्नन
ये बातहोन का बाद परमेश्वर को यो वचन दर्शन मे अब्राम का पास पहुच्यो “हे अब्राम, मत डर; मी तरी ढाल अरु तरो भोत बडो प्रतिफल हइ” अब्राम ने बोल्यो, “हे प्रभु परमेश्वर, मी तो सन्तानहीन हइ, अरु मरो घर को वारीस यो दमिश्कवासी एलीएजेर हुये, आखरी तू मे खे का दिये?” अरु अब्राम ने बोल्यो, “मे खे तो तोने वारीस नी दियो, अरु का देखुस हइ, कि मरा घर मे पैदा हुयो एक जन मरो वारिस हुये.” तब परमेश्वर को यो वचन ओका पास पहुच्यो, “यो तरो वारीस नी हुये, तरो जो निज बेटो हुये, उय तरो वारिस हुये” अरु ओने ओ खे बाहेर ली जैय खे बोल्यो, “आकाश का तरफ नजर करी खे ताराहोन खे गिन, का तू उन खे गिनी सकस हइ?” फिर ओने ओकासे बोल्यो, “तरो कुल असो ही हुये.”1 ओने परमेश्वर पर भरोसो कर्यो; अरु परमेश्वर ने या बात खे ओका लिखना मे धार्मिकता गिन्यो.2 अरु ओने ओकासे बोल्यो, “मी उय परमेश्वर आय जो तो खे कसदीहोन का उर नगर से बाहेर लि आयो, कि तो खे यो देश को अधिकार दियु.” ओने बोल्यो, “हे प्रभु परमेश्वर मी कसो जान्युँ कि मी येको अधिकारी हूयु?” परमेश्वर ने ओकासे बोल्यो, “मरा लिये तीन साल की एक बछडो, अरु तीन साल की एक बकरी, अरु तीन साल को एक मेडो, अरु एक पिण्डुक अरु कबुतर को एक बच्चो ले.” अरु इन सभी खे लि खे, ओने बीच से दो टुकडा करी दियो अरु टुकडाहोन खे आमने-सामने रख्यो पर चिडीयाहोन खे ओने टुकडा नी कर्या. जब माँसाहारी पंछी लोथ पर झपट्या, तब अब्राम ने उन खे उडय दियो. जब सूरज अस्त होन लग्यो, तब अब्राम खे भारी नींद अय; अरु देखनु, भोत डर अरु बडो अंधारा ने ओ खे घेरि लियो.3 तब परमेश्वर ने अब्राम से बोल्यो, “यो निश्चय जान कि तरो कुल पराया देश मे परदेशी हुय खे र्हिये, अरु उ देश का इन्सानहोन का दास हुय जाये; अरु वे उन खे चार सौ साल तक दुख दिये;4 फिर जो देश का वे दास हुये ओ खे मी दण्ड दियु: अरु बाद वे बडा धन व्हा से लि खे निकल आये.5 तू तो अपना मऱ्या हुया बापदादा का साथ मिली जाये; तो खे पूरा बुडापा मे मट्टी दी जाये. पर वे चौथी पीढी मे यहा फिर आये : क्युकि अब तक एमोरीहोन को अधर्म पूरो नी हुयो हइ.” अरु असो हुयो कि जब सूरज अस्त हुय गयो अरु घोर अंधारो छै गयो, तब एक अंगार की भट्टी जेमे से धुव्वो उठतो थो अरु एक जलती हुय मशाल दिखैइ दी जो जनवर का वे टुकडाहोन का बीच मे से हुय खे निकली गय. उय दिन परमेश्वर ने अब्राम का साथ या वाचा बाँधी, “मिस्र का महानद्दी से लि खे फरात नामकी बडी नद्दी तक जित्ता देश हइ,6 अर्थात्, केनियहोन, केनिज्जिहोन, कदमोनिहोन, हित्तीहोन, परिज्जिहोन, रापाइहोन, एमोरीहोन, कनानिहोन, गिर्गाशीहोन अरु यबूसीहोन को देश, मेने तरा कुल खे दियो हइ.”
Source notes (6)
- Footnote रोमियो 4:18 इब्राहिम 11:12
- Footnote रोम 4:3 गला 3:6 याकु 2:23
- Footnote अयुब 4:13,14
- Footnote निगमन 1:1,14 प्रेरितो खे का 7:6
- Footnote निगमन 12:40,41 प्रेरीत 7:7
- Footnote प्रेरीतो खे काम 7:5
Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.