उत्पत्ति 12

परमेश्वर का तरप से अब्राम खे बुलायो जानो

1परमेश्वर ने अब्राम से बोल्यो, “अपना देश, अरु अपनी जन्म-भूमि, अरु अपना बाप को खे छोडी खे उ देश मे चली जा जो मी तो खे दिखायु.1 2अरु मी तरासे एक बडी जाति बनायु, अरु तो खे आशिर्वाद दियु, अरु तरो नाम महान कर्यु, अरु तू आशिर्वाद को जड हुये. 3अरु जो तो खे आशिर्वाद दिये, उन खे मी आशिर्वाद दियु; अरु जो तो खे कोसे, ओ खे मी श्राप दियु; अरु भूमंडल का पुरा कुल तरा वजेसे आशिर्वाद सक्हे.”2 4परमेश्वर को यो वचन का अनुसार अब्राम चल्यो; अरु लूत भी ओका संग चल्यो; अरु जब अब्राम हारान देश से निकल्यो उ टेम्मे उ पचहत्तर साल को थो. 5यो प्रकार अब्राम अपनी लुगय सारा, अरु अपना भतीजो लूत खे, अरु जो धन उन खे जमा कर्यो थो, अरु जो जनवर उनने हारान मे प्राप्त कर्यो थो, सब खे लि खे कनान देश मे जान खे निकली चल्यो; अरु वे कनान देश मे अय गया. 6उ देश का बीच से जाता हुये अब्राम शेखेम मे, जहाँ मोरे को पवित्र झाड हइ वहा पहुच्यो, उ टेम्मे देश मे कनानी इन्सान र्‍हेता था. 7तब परमेश्वर ने अब्राम खे दर्शन दि खे बोल्यो, “यो देश मी तरा कुल खे दियु,” अरु ओने परमेश्वर का लिये, जेने ओ खे दर्शन दियो थो, एक वेदी बनैय.3 8फिर व्हा से आगे बडी खे, उ पहाड़ पर आयो, जो बेतेल नगर का पूर्ब का तरफ हइ; अरु अपनी झोपडी उ मे खडो कर्यो जे खे पश्चिम का तरफ तो बेतेल, अरु पूर्ब का तरफ अय हइ; अरु व्हा भी ओने परमेश्वर का लिये एक वेदी बनैय: अरु परमेश्वर से आराधना करी. 9अरु अब्राम आगे बडी खे कनान देश का दक्षिण भाग का तरफ चली गयो.

मिस्र देश मे अब्राम

10उ देश मे अकाल पड्यो: येकालिए अब्राम मिस्र देश खे चली गयो कि व्हा परदेशी हुय खे र्‍हिये क्युकि देश मे खतरनाक अकाल पड्यो थो. 11फिर असो हुयो कि मिस्र दुन्या का पास पहुची खे, ओने अपनी लुगय सारा से बोल्यो, “सुन, मे खे मालूम हइ, कि तू एक सुन्दर बइ हइ; 12अरु जब मिस्री दुन्या तो खे देख्ये, तब बोल्ये, ‘या ओकी लुगय हइ,’ येकालिए वे मे खे तो मारी डाल्ये, पर तो खे जीन्दो रखी लिये. 13आखरी यो बोलनो, ‘मी ओकी भैइ आय,’ जेकासे तरा कारण मरो कल्याण हो अरु मरी जान तरा कारण बची जाह्ये.”4 14फिर असो हुयो कि जब अब्राम मिस्र देश मे आयो, तब मिस्रिहोन ने ओकी लुगय खे देख्यो कि या भोत सुन्दर हइ. 15अरु मिस्र को राजो फिरोन का हाकिमहोन ने ओ खे देखी खे फिरोन का सामने ओकी बड्यै करी : येकालिए वा बइ फिरोन का महल मे पहुँचै गय. 16अरु फिरोन ने ओका कारण अब्राम की भलाइ करी; अरु ओ खे मेडा-बकरी, गाय-बैल, दास-दासिहोन, गधो-गधीहोन, अरु उट मिल्या. 17तब परमेश्वर ने फिरोन अरु ओका घराना पर, अब्राम की लुगय सारा का कारण बड़ी-बड़ी विपत्तिहोन डाली. 18तब फिरोन ने अब्राम खे बुलैइ खे बोल्यो, “तोने मरा साथ यो का कर्यो? तोने मे खे क्यु नी बतायो कि वा तरी लुगय आय? 19तोने का बोल्यो कि वा तरी भैइन हइ? मेने ओ खे अपनी ही लुगय बनान का लिये लियो; पर अब अपनी लुगय खे लि खे यहा से चली जा.” 20अरु फिरोन ने अपनी दुन्याहोन खे ओका बारे मे आज्ञा दी अरु उनने ओ खे अरु ओकी लुगय खे, सब सम्पत्ति समेत जो ओको थो, बिदा करी दियो.