Skip to content
BibleKenya

Gowlan Bible

निर्गमन 33

सीने पहाड से आगे जान की आज्ञा

फेर यहोवा ने मूसा से बोल्यो, “तू वे दुनियाहोन खे जिनखे मिस्र देश से छुडइ लायो हइ संग लिखे उ देश मे जा, जेका विषय मेने अब्राहम, इसहाक अरु याकुब से कसम खाइखे बोल्यो थो, ‘मि ओखे तुम्हारा कुल खे दियु.’1 अरु मी तरा आगे-आगे एक दूत खे भेज्यु अरु कनानी, एमोरी, हित्ती, परिज्जी, हिव्वी, अरु यबूसी दुनियाहोन खे जबरदस्ती निकाली दियु. तुम दुनिया उ देश खे जानु जेमे दूध अरु मधु की धारा बोहास हइ; परन्तु तुम बाजु हइ2, यो कारण मी तुम्हारा बीच में हुइखे नी चलको, असो न हुये कि मी रस्ता में तुम्हारो अन्त करी डाल्यु.” यो बुरो समाचार सुनीखे वे दुनिया विलाप करन लग्या; अरु कोइ अपना गहना पेन्या हुया नी रियो. क्योंकि यहोवा ने मूसा से बोली दियो थो, “इस्राएल दुनिया खे मरो यो वचन सुनानु, ‘तुम दुनिया तो हठीलो हइ; जो मी पल भर का लिये तुम्हारा बीच हुइखे चल्यु ते तुम्हारो अन्त करी डाल्यु. येकालिये अब अपने-अपने गहना अपना अंग से उतारी दे कि मी जान्यु की तुम्हारा साथ का करन होनु’.” तब इस्राएली होरेब पहाड से लिखे आगे से अपना गहना उतारी रिया.

मिलापआलो तम्बु

मूसा तम्बू का छावनी से बाहर दूर खडो कर्यो करतो थो, अरु ओखे मिलापआलो तम्बू बोलतो थो. अरु जो कोई यहोवा खे ढूढ़तो उ मिलापआलो तम्बू का पास जो डेरा को बाहर से निकली जातो थो. जब-जब मूसा तम्बू का पास जातो थो, तब-तब सब दुनिया उठीखे अपने-अपने डेरा का दरवाजा पर खडा हुइ जाता था, अरु जब तक मूसा उ तम्बू में प्रवेश नी करतो थो तब तक ओका तरप देखता रहता था. जब मूसा उ तम्बू में प्रवेश करतो थो, तब बद्दल को खम्भो उतरीखे तम्बू का दरवाजा पर करतो थो, अरु यहोवा मूसा से बात करन लगतो थो. अरु सब दुनिया जब बद्दल का खम्भा खे तम्बू का दरवाजा पर ठर्यो देखता था, तब उठीखे अपना-अपना डेरा दरवाजा पर से घुटना टेकी खे दण्डवत् करता था. अरु यहोवा मूसा से यो प्रकार आमने-सामने बात करतो थो.3 जो प्रकार कोइ अपना भाइ से बात करतो थो. अरु मूसा तो डेरा में फेर लौटी आतो थो, पर यहोशु नामको एक जवान, जो नून को बेटो अरु मूसा को सेवक थो, उ तम्बू में से नी निकलतो थो.

यहोवा को अपना दुनिया से वाचा

अरु मूसा ने यहोवा से बोल्यो, “सुन तू मरासे बोलस हइ, ‘ये दुनियाहोन खे ली चल;’ परन्तु यो नी बतायो कि तू मरा संग कोखे भेज्ये. ते भी तोने बोल्यो हइ, ‘मी तोखे नाम से जानुस हइ, अरु तरा पर मरी अनुग्रह की नजर हइ.’ अरु अब अगर तरा पर तरी अनुग्रह की नजर हुये, ते मेखे अपनी रस्ता समझइ दे, जेकासे जब मी तरो ज्ञान पायु तब तरी अनुग्रह की नजर मरा पर बनी रिये. फेर येखे भी याद कर कि या दुनिया तरी प्रजा हइ.” यहोवा ने बोल्यो, “मी खुद तरा सात चल्यु अरु तोखे अराम दियु.” ओने ओकासे बोल्यो, “अगर तू हमारा साथ नी चल्ये, ते हमखे यहा से आगे मत लि जानु. यो कसो जान्यो जाये कि तरी अनुग्रह की नजर मरा पर अरु अपनी प्रजा पर हइ? का असो नी कि तू हमारा संग-संग चल्ये, जेकासे मी अरु तरी प्रजा का दुनिया पृथ्वी भर का सब दुनियाहोन से अलग ठर्ये?” यहोवा ने मूसा से बोल्यो, “मी यो काम भी जोकी चर्चा तोने करी हइ कर्यु; क्योंकि मरा अनुग्रह की नजर तरा पर हइ, अरु मी तोखे नाम से जानुस हइ.” मूसा ने बोल्यो, “मेखे तरी महिमा को उजालो दिख्यो.” ओने बोल्यो मी, “तरा सामने हुइके चलतो हुये तोखे अपनी सब भलाइ दिखायु, अरु तरा सामने यहोवा नाम को प्रचार कर्यु, अरु जोका पर मी अनुग्रह करनु चायु ओका पर कर्यु, अरु जोका पर दया करनु चायु ओका पर कर्यु.”4 फेर ओने बोल्यो, “तू मरा मुडा को दर्शन नी करी सक्ये; क्योंकि इन्सान मरा मुडा को दर्शन करीखे जिन्दो नी री सखे.” फेर यहोवा ने बोल्यो, “सुन, मरा पास एक जगह हइ, तू उ चट्टान पर खडो हो; अरु जब तक मरो तेज तरा सामने हुइखे चलतो रिये तब तक मी तोखे चट्टान का दरार में रख्यु, अरु जब तक मी तरा सामने से हुइखे नी निकली जायु तब तक अपना हाथ से तोखे झाक्यो रियु; फेर मी अपनो हाथ उठइ लियु, तब तू मरो पिछा को दर्शन तो पाये, परन्तु मरो मुडा को दर्शन नी मिलको.”

Source notes (4)
  1. Cross-reference उत्पत्ति 12:7; 26:3; 28:13
  2. Cross-reference प्रेरित 7:51
  3. Cross-reference गिनती 12:8; व्यवस्था विवरन 34:10
  4. Cross-reference रोमीयो 9:15

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.