Gowlan Bible
निर्गमन 18
सुसरा को मूसा से मिलस हइ
जब मूसा को सुसरो मिद्यान को याजक यित्रो ने यो सुन्यो, कि यहोवा ने मूसा अरु अपनी दुनिया इस्राएल का लिये का-का कऱ्यो हई, यानिकी यो कि कोय रीती से यहोवा इस्राएलिहोन खे मिस्र देश से निकाली खे लायो. तब मूसा को सुसरो यित्रो मूसा कि लुगेन सिप्पोरा खे, जो पैले अपना बाप का घर मे भेजी दी गई थी. अरु ओका दो बेटाहोन खे भी लिखे लायो; येमे से एक को नाम मूसा ने यो बोलीखे गेर्शोम रख्यो थो, “मी अन्य देश मे परदेशी हुयो हई.”1 अरु दुसरा को नाम ओने यो बोलीखे एलीएजेर2 रख्यो, “मरा बाप खे यहोवा ने मरो सहायक हूइखे मेखे फिरोन कि तलवार से बचायो.” मूसा की लुगेन अरु बेटाहोन खे ओको सुसरो यित्रो संग लिखे मूसा का पास जंगल का वा पहाड मे लायो, जहा यहोवा की टेकली का पास ओको डेरो थो. अरु ऐखे ओने मूसा का पास यो कहनो भेज्यो, “मी तरो सुसरो यित्रो हई, अरु दो बेटाहोन समेत तरी लुगेन खे तरा पास लिखे लायो हई.” येकालिये मूसा अपना सुसरा से मिलन का लिये निकल्यो, अरु ओखे दण्डवत् करीखे चुम्यो; अरु वे परस्पर कुशलता से पुछता हुये डेरा पर गया. वहा मूसा ने अपना सुसरा से वर्णन कऱ्यो कि यहोवा ने इस्राएलिहोन का निमित्त फिरोन अरु मिस्रिहोन से का-का तखलिफ दी, अरु इस्राएलिहोन ने रस्ता मे का-का कष्ट उठायो, फेर यहोवा उनखे कसो-कसो छुड्य खे लायो हई. तब यित्रो ने ओखे समस्त भलाई का कारण यहोवा ने इस्राएलिहोन का सात करी थी की उनखे मिस्रिहोन का हात से छुडायो थो, खुश हुइ खे बोल्यो. यित्रो ने बोल्यो “यहोवा धन्य हई यहोवा, जेने तुम खे फिरोन अरु मिस्रिहोन का हात से छुडायो, जेने तुम दुनियाहोन खे मिस्रिहोन कि मुठ्टी मे से छुडायो हई. अब मेने जानी लियो हई कि यहोवा सब देवता होन से बडो हई; वरण ओका बारे मे भी जेमेसे उन्हे इस्रालिहोन का सात अहंकारपूर्ण व्यवहार कऱ्यो थो.” तब मूसा को सुसर यित्रो ने यहोवा का लिये होमबलि अरु बलिदान चढायो, अरु हारुन इस्राएलिहोन का सब बापदादाहोन मुखिया होन का समने मूसा का सुसरा यित्रो का संग यहोवा का आगे खानो खान खे आया.
न्यायधीस होन की नियुक्ती
(व्यवस्था विवरन 1:9,18)
दुसरा दिन मूसा दुनियाहोन को न्यान करन खे बट्यो, अरु फजर से साम तक दुनिया मूसा का आस-पास खडा था. जब मूसा का सुसरा ने देखियो कि मूसा दुनियाहोन का लिये का-का करस हई, ओका सुसरा ने बोल्यो, “यो का काम हई जो तु दुनियाहोन का लिये करस हई? का कारण हई कि तु ऐखेलो बट्यो ऱ्हेस हई, अरु दुनिया फजर से साम तक तरा आस-पास खडा ऱ्हेस हई?” मूसा ने अपना सुसरा से बोल्यो, “येको कारण यो हई कि दुनिया मरा पास यहोवा से पुछन आस हई. जब-जब उनखे कोय मुकद्दमो होस हई तब-तब वे मरा पास आस हई अरु मि उनका बिच मे न्यान करुस, अरु यहोवा कि विधि अरु व्यवस्था उनखे समज्यो हई” मूसा का सुसरा ने ओकासे बोल्यो, “जो काम तु करस हई उ अच्छो नी. अरु येका से तुम अरु, या दुनिया भी जो तरा संग हई निश्चय थकी जाये, क्युकी यो काम तरा लिये बोत भारी हई; तु येखे ऐखेलो नी करी सखे.3 अब मरी सुनी ले, मी तोखे सम्मति दियुस हई, अरु यहोवा तरा संग ऱ्हीहे. तुम या दुनियाहोन का लिये यहोवा का सम्मुख जानु, अरु येका मुकद्दमा खे यहोवा का पास तु पोचय दियो कर. तुम उन खे विधि अरु व्यवस्था शिखानू अरु, जो रस्ता पर यनखे चला, अरु जो-जो काम इनखे करनो हई, यो इनखे समझय दियो कर. फिर तुम सब दुनियाहोन मे से असो इन्सान खे छाटी लेनु, जो गुणी, अरु परमेश्वर को डर माननवालो, सच्चो, अरु अन्याय को लाभ से घृणा करनवालो हई; अरु ओखे हजार-हजार, सौ-सौ, पचास-पचास, अरु दस-दस इन्सानहोन ग्रुप पर अधिकारी होन न्यायी नियुक्त करी दे. अरु वे सब टेम ये दुनियाहोन को न्यान कऱ्यो कर; अरु सब बडा-बडा मुकद्दमा खे ते तरा पास लिखे लायो कर, तब तरो बोझ हलको हुये, क्युकि यो बोझ खे वे भी तरा साथ उठाये. अगर तु यो उपायो कर, अरु यहोवा तोखे असो आज्ञा दे, ते तु ठहर सक्ये, अरु ये सब दुनिया अपना अपना जगा पर कुशल से पोची सक्ये.” अपना सुसरा कि या बात मानी खे मूसा ने ओका सब वचनहोन का अनुसार कऱ्यो. अरु मूसा ने सब इस्राएलिहोन मे से गुणी इन्सान चुनीखे उनखे हजार-हजार, सौ-सौ, पचास-पचास, दस-दस, दुनियाहोन का उपर अधिकारी ठेरायो. अरु वे सब दुनियाहोन को न्यान करन लग्यो; जो मुकद्दमो कठिन होस ओखे तो वे मूसा का पास लिखे आस हई, अरु सब छोटा मुकद्दमा को न्यान वे खुद ही कऱ्यो करते था. तब मूसा ने अपना सुसरा खे बिदा कऱ्यो, अरु उ अपना देश चली गयो.
Source notes (3)
- Footnote निर्गमन 2:21,22 प्रेरितो 7:2
- Footnote मेरा यहोवा साहयक हइ
- Footnote गिनती 11:14 व्यवस्थाविवरन 1:9
Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.