प्रकाशन 1

अभिनंदन

1यीशु मसीह को प्रकाशन जो वोखे परमेश्वर ने येका लिये दियो कि अपनो सेवकहोन खे वे बात खे जेको तुरुत होनु जरुरती हइ दिखाये अरु वोने अपनो स्वर्ग दूतखे भेजीखे वो का वजेसे अपनो दास यहून्ना खे बतायो. 2यहुन्ना ने परमेश्वर को वचन अरु यीशु मसीह की गवय खे अगर जो कुछ ओने देख्यो थो ओकी गवइ दी. 3धन्य हइ वु जो या किताब, खे पडस हइ कि धन्य हइ भविष्यवाणी का वचन खे सुनस हइ कि अरु जो लिखस हइ अरु ओका जसो चलास हइ सुनस हइ क्युकि या सब बात घटित होन को टेम नजीक हइ.

सात मंडलीहोन को अभिवादन

4यहून्ना का तरप से का खे देस का सात मंडलीहोन को नाम उ परमेश्वर का तरप से जो हइ, अरु जो थो अरु जो आनवालो हइ

अरु वे सात आत्माहोन का तरप से जो वोको राजगद्दी का सामने हइ1, 5अरु यीशु मसीह का तरप से जो विश्वासयोग्य गवाह अरु मऱ्यो हुया मे से जिन्दो उठनआला मे पयलो अरु जमीन को राजाहोन को अधिकारी हइ, तुमखे अनुग्रह अरु शांती मीलती ऱ्हे. जो हमारा से प्यार से रखस हइ, अरु जेने अपना खुन का वजेसे हम पाप से छुडायो हइ2, 6अरु हम एक राज अरु अपना बाप परमेश्वर का लिये याजक भी बनय दियो. यीशु मसीह अरु प्राक्रम पिडमपिडि ऱ्हिये. आमीन3.

7देख, वु बद्दल का साथ आनवालो हइ, अरु हर एक आख वोखे देख्ये का क्युकी जिनने वोखे गड्यो थो वे भी वोखे देख्ये का अरु जमीन का सब दुन्या वोखे करन छाती ठोक्हे हुये4. आमीन. 8“प्रभु परमेश्वर,” जो हइ अरु जो थो अरु जो आनवालो हइ, जो सर्व शक्तिमान हइ, ह्या बोल्योस हइ, मी ही पयलो अरु आखरी हय5.

यहून्ना खे मसीह को दर्शन

9मी यहून्ना, को जो तुमारो भैइ अरु बहीन यीशु को बडो दुख अरु राज अरु रुखना मे तुमारो सात हय, परमेश्वर को वचन अरु यीशु की गवय कारन पतमेस नामको टेकडो मे थो. 10मी प्रभु को दिन आत्मा मे अय गयो, अरु अपना पिछे पिपडी का जसो बडो अवाज यो बोलते सुन्यो, 11“जो कुछ तु देखस हइ वोखे किताब मे लिखीखे साथ मंडलीहोन का पास भेजी दे, अगर इफिसुस अरु स्मुरना, अरु पिरगमुन, अरु थुआतीरा, अरु सरदीस, अरु फिलदिलफिया, अरु लौदिकिया खे.”

12तब मे ने वोखे, जो मरासे बोली रो थो, देखन का लिये अपनो मुडो फिरायो अरु पिछे घुमीखे मे ने सोना का साथ दिव्वा को वोडो देख्यो, 13अरु वे दिव्वा को वोका बिच मे इन्सान को बेटो सदृश एक इन्सान खे देख्यो, जो पाय तक का कपडा पेन्या अरु छाती पर सोन्ना को पट्टो बांधी खे हुयो थो6. 14वोका माथो अरु बाल उजरा बाल अरु पाला का जसा उजालो थो, अरु वोकी आख अंगार का भडकती अंगार का जसी चमकती थी7. 15वोको पाय अच्छो पीतल का जसो थो, जो मान भट्टी मे तपायो गयोस हय, अरु वोको बात खुप पाणी का बात का जसो थो8. 16उ अपना जवना हात मे सात तारा लिये हुयो थो, अरु वोका मुडा से धार दोधारी तलवार नीकालती थी. वोको मेडो भर धुपार मे नीकल्यो हुयो सुरज का जसो चमकतो थो. 17जब मे ने वोखे देख्यो ते वोको पाय पर मुद का जसो गिरी गयो. वोने मरा पर “अपनो जवनो हात रखी खे बोल्यो, मत डरे. मी पयलो अरु आखरी हय9. 18मी जिन्दो हय मी मरी गयो थो, अरु आप देख मी हमेशा हमेशा जिनदो हय; अरु मऱ्यो पर अरु मरन का सब जगत पर मरो अधिकार हइ. 19येका लिये जो बात तो ने देखी हइ अरु जो बात हुय री हइ अरु जो बात येका बाद होनआली हइ, वे सब खे लिखी ले. 20अगर वे सात तारा को भेद जेने तो ने मरा जवना हात मे देख्यो थो, अरु वे सात सोन्ना को गुच्छो को भेद: वे सात तारा सात मंडलीहोन का दूत हइ, अरु वे सात दिव्वा को वोडो सात मंडली हइ.