परमेश्वर को पवित्र वचन
2 कुरिन्थिहोन 4
मट्टी का बर्तन मे अध्यात्मीक खजानो
येका लिये जब हम पर असी दया हुइ कि हमखे या सेवा मीली, ते हम हिम्मत नी छोड्ये. पर हमने लाजन खे गुप्त काम होन खे छोडी दियो, अरु नी हुशारी से चलता, अरु नी परमेश्वर, सामने हर एक को विवेक मे अपनी भलइ बठाडस हइ. पर अगर हमारा सुसमाचार पर पडदो पड्यो हइ, ते यो खत्म होनआला ही का लिये पड्यो हइ. अरु वे अविश्वासीहोन का लियेका जेकी बुध्दि यो जगत को परमेश्वर ने अंधी करी दी हइ, ताकि मसीह जो परमेश्वर को रुप हइ, ओका तेजमय सुसमाचार को उजालो उनका पर नी चमक्ये. क्युकि हम अपना खे नी, पर मसीह यीशु को प्रचार करस हइ, कि उ प्रभु हइ. अरु ओका बारे मे यो बोलस हइ, कि हम यीशु का करण तुमारा सेवक हइ. येका लिये कि परमेश्वर ही हइ, जे ने बोल्यो, “अंधारा मे उजालो चमक्ये,” अरु उ हमारा मनहोन मे चमक्यो कि परमेश्वर कि महिमा को पैछान को उजालो यीशु मसीह, मुडा से उजालो हो.1
पर हमारा पास यो धन मट्टी को बर्तनहोन मे रख्यो हइ, कि यो भोत सामर्थ्य हमारा तरफ से नी क्युकी परमेश्वर ही का तरफ से ठैर्यो. हम चारी तरफ से दुख से भागस हइ, पर भागस हइ, पर संकट मे नी पडे. घबरास ते हइ, लेकिन नीराश नी होय. सताया तो जास हइ. पर त्याग्या नी जाय. गिराया तो जास हइ, पर खत्म नी होय. हम यीशु को मरना खे अपना आंग मे हर टेम लिया फिरस हइ. कि यीशु को जिवन भी हमारा आंग मे प्रगट हो. क्युकि हम जीन्दा हइ सर्वदा यीशु करण मरनहार का हात मे दियो जास हइ कि यीशु को जिवन भी हमारो मरनआलो आंग मे प्रगट हुइ जाये. येको मतलब हइ कि मौत हमारा काम मे हइ, लेकिन जिवन तुमारा काम मे हइ.
अरु येका लिये कि हम मे उ विश्वास की आत्मा हइ, “शास्त्र बोलस हइ, कि मेने विश्वास कर्यो कि येका लिये मी बोल्यो” आखरी हम भी विश्वास करस हइ, येका लिये बोलस हइ.2 क्युकि हम जानस हइ, जे ने प्रभु यी खे जिन्दो, उ हमखे भी यीशु मे हिस्सेदार जानीखे जिन्दो, अरु तुमारा साथ अपना सामने हजर कर्ये. क्युकि सब चिजहोन तुमारा लिये हइ, ताकि अनुग्रह भोतजन का वजेसे जादा हुइ, परमेश्वर की महिमा का लिये धन्यवाद भी बडानु.
विश्वास से जीनो
येका लिये हम हिम्मत नी छोड्ये. अगर हमारो बाहेर कि इन्सानीयत खत्म भी हूइ जास हइ, ते भी हमारा अंदरुनी इन्सानीयत दिन हर दिन नवो होतो जास हइ. क्युकि हमारो पल भर को हलको सो दुख हमारा लिये भोत ही महत्वपूर्ण अरु अनन्त महिमा पइदा करतो जास हइ. अरु हम तो देखी हुइ चिजहोन खे नी पर अनदेखी चिजहोन खे देखते र्हेस हइ, क्युकि देखी हुइ चिजहोन थोडा ही दिन की हइ, पर अनदेखी चिजहोन खे हरदिन बनी र्हेस हइ.
Source notes (2)
- Cross-reference यशया 1:3
- Cross-reference भजन संहिता 116:10
परमेश्वर को पवित्र वचन. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.