ቆን 20

ሙኩሉ ላይ

1ዛው ባይና ኦላ ቁልፕያነ ግታ ሳንላታ ባ ኩሸን ኦይክዳ እስ ኪታንቾይ ሳሎፐ ዎሽን በአስ። 2እ ዳውያ ኦይክድ ሙኩሉ ላይስ ቃችስ። ሄ ዳወይ ኮይሮ ሾሻ፥ ዳቡሎሳ ዎይኮ ፃላሄ።1 3ኪታንቾይ ዛው ባይና ኦላን እያ የግድ፥ ሙኩሉ ላይ ዉራና ጋካናዉ ካዎተታ ዛር ባለና መላ ቁልፐን ጎርድድ አታምስ። ሄሳፈ ጉየ፥ ዳወይ ጉ ዎደስ ብለታናዉ በሴስ።

4ሄሳፈ ጉየ፥ አራታታነ አራታታ ቦላ ኡትድ ፕርዳና መላ ማት እመትዳይሳታ በአስ። የሱሳስ ማርካትዳ ግሾነ ፆሳ ቃላ ኦድዳ ግሾ ባንታ ቆያ ጎይረትዳ አሳ ሸምፑዋ በአስ። ኤንቲ ዶኣ ዎይኮ ዶኣ ምስልያ ጎይንቦኮና። ኤንቲ ዶኣ ማላ ባንታ ሶምኦን ዎይኮ ባንታ ኩሸን ዎቦኮና። ኤንቲ ሀይቆፐ ደንድድ ክርስቶሳራ እስፈ ሙኩሉ ላይ ሃርዶሶና።2 5ሀይስ ኮይሮ ደንዱዋ፤ አትዳ ሀንኮ ሀይቅዳይሳት ሙኩሉ ላይይ ዉራና ጋካናዉ ሀይቆፐ ደንድቦኮና። 6ኮይሮ ደንዱዋስ ቃድ ደኤይሳት አንጀትዳይሳታነ ጌሻታ። ኤንታ ቦላ ናምአን ሀይቁዋስ ዎልቅ ባዋ። ኤንቲ ፆሳስነ ክርስቶሳስ ካህነ ግዳና፤ እያራ እስፈ ሙኩሉ ላይ ሃራና።

ፃላሄ ፆነተ

7ሙኩሉ ላይይ ዉርዳፐ ጉየ ፃላሄይ ቃሾፐ ብለታና። 8እ ሳኣ ጋፃፐ ጋፃ ጋካናዉ ደእያ ካዎተታ፥ ኤንትካ፥ ጎገነ ማጎገ ጌተተይሳታ ባለድ ኦላስ ሺሻናዉ ከያና። ኤንታ ፓይዶይ አባ ጋፃን ደእያ ሻፈ መላ።3 9ኤንቲ ቢታ ኡባን ላለትድ፥ ጌሻታ ሄራነ ፆሳይ ዶስያ ካታማ ተቅዶሶና። ሽን ታም ሳሎፐ ዎድ ኤንታና ምስ።

10ኤንታ ባለዳ ፃላሄይ፥ ዶአይነ ዎርዶ ናበይ የገትዳ ኤፅያ ዲነ ታማ አባን የገትስ። ኤንቲ ቃማነ ጋላስ መርናዉ ፓፃ ካኤታና።

ዉርሰ ፕርዳ

11ሄሳፈ ጉየ፥ ግታ ቦ አራታ ቦላ ኡትዳይሳ በአስ። ሳእነ ሳሎይ እያ ስንፈ ባቃትዶሶና፤ ኤንቲ ዛር በንትቦኮና።4 12ሀይቅዳይሳት፥ ግታትነ ጉት አራታ ስንን ኤቅዳይሳታ በአስ፤ ማፃፋት ዶየትዶሶና፤ ቃስ ደኦ ማፃፋ ግድዳ ሀራ ማፃፍ ዶየትስ። ሀይቅዳይሳት ማፃፋን ፃፈትዳ ባንታ ኦሱዋዳ ፕርዳ ኤክዶሶና። 13አባይ ባ ግዶን ደእያ ሀይቅዳይሳታ እሚስ፤ ሀይቆይነ ስኦለይ ባንታ ግዶን ደእያ ሀይቅዳይሳታ እምዶሶና። እስ እስ አስ ባ ኦሱዋዳ ፕርዳ ኤክስ። 14ያትን፥ ሀይቆይነ ስኦለይ ታማ አባን የገትዶሶና። ሄ ታማ አባይ ናምአን ሀይቆ። 15ደኦ ማፃፋን እያ ሱንይ ፃፈትቦና አስ ኦንካ ታማ አባን የገትስ።