ጌሻ ማፃፋ
ቆን 21
ኦራ ሳሎነ ኦራ ሳአ
ታኒ ኦራ ሳሎነ ኦራ ሳአ በአስ። ኮይሮ ሳሎይነ ኮይሮ ሳእ ይስ፤ አባይካ ይስ።1 ጌሻ ካታምያ፥ ኦራ የሩሳላመይ፥ አዝና ገላናዉ አሌቀታዳ ጊጋዳ ደእያ ማጫሳዳ ሳሎፐ ፆሳ ማታፐ ዱገ ዎሽን በአስ።2
አራታፐ ሀይሳዳ ያግድ፥ ኦድያ ግታ ቃላ ስአስ፤ “ፆሳ ኬይ አሳራ ደኤስ፤ ፆሳይ ባ ቦንቹዋራ አሳራ እስፈ ዳና። ኤንቲ እያ ደረ ግዳና፤ ፆሳይ ባ ሁጰን ኤንታራ ዳና፤ እ ኤንታ ፆሳ ግዳና።3 ፆሳይ ኤንታ አይፈፐ አፉ ኡባ ቁቻና። ህዛፐ ሀይቆይ ዎይኮ ካዮይ ዎይኮ ዋሶይ ዎይኮ ዋየይ ዴና። ጋልአይ ኡባይ አስ” ያግስ።4
አራታ ቦላ ኡትዳይስ፥ “ታኒ ኡባ ኦራ ኦና” ያግስ። ቃስ ዛሪድ ታኮ፥ “ታኒ ኦደይስ አማንይሳነ ቱማ ግድያ ግሾ ፃፋ” ያግስ። ቃስ ታኮ፥ “ፖለትስ! ታኒ አልፋነ ኦመጋ፤ ዶመነ ፖሎ።5 ሳሞትዳ ኦናካ ደኦ ሃ ፑልቶፈ ጋተ ቃንፆና ጮ ኡሻና። ፆንያ ኦንካ ሄሳ ኡባ ላታና፤ ታኒ እያዉ ፆሳ ግዳና፤ እካ ታ ናአ ግዳና።6 ሽን ያሻንቾታ፥ አማነቶናይሳታ፥ ቱናታ፥ ሸምፖ ዎይሳታ፥ ላይማተይሳታ፥ ብተይሳታ፥ ኤቃ ጎይነይሳታነ ዎርዳንቾታ ቃዳይ ዲነይ ኤፅያ ታማ አባን ግዳና። ሄስ ናምአን ሀይቆ” ያግስ።
ላፑን ዉርሰ ቦሻት ኩምዳ ላፑን ፁአታ ኦይክዳ ላፑን ኪታንቾታፐ እሶይ ታኮ ይድ፥ “ሃያ፥ ታኒ ነና ገሎስ ጊግዳ ዶርሳ ማችዉ በሳና” ያግስ። ኪታንቾይ ታና ዙማ ሁጰ ጌሻ አያናን ከስድ፥ ጌሻ ካታማይ፥ የሩሳላመይ፥ ሳሎፐ ፆሳ ማታፐ ዱገ ዎሽን በስስ።7 ሄ ካታማይ ፆሳ ቦንቾን ፖኤስ። ሄ ካታማ ፖኦይ ያስጵደ ጌተትያ አልኦ ሹቻ መላ፤ ጌሻ ብርለዳ ጶሌስ። ሄ ካታማ ድርሳይ ዎልቃማነ አዱሰ። እያዉ ታማነ ናምኡ ፐንገትነ ሄ ፐንገታ ናግያ ታማነ ናምኡ ኪታንቾት ደኦሶና። ፐንገታ ቦላ ታማነ ናምኡ እስራኤለ ዘረታ ሱንይ ፃፈትስ።8 ዶሎሀ ባጋራ ሄ ፐንገት፥ ፑደሀ ባጋራ ሄ ፐንገት፥ ዱገሀ ባጋራ ሄ ፐንገትነ ዉሎሀ ባጋራ ሄ ፐንገት ደኦሶና። ካታማ ግምበ ድርሳይ ታማነ ናምኡ ሹቻ ባሶታ ቦላ ኤቅስ። ኤንታ ቦላ ታማነ ናምኡ ዶርሳ ሀዋረታ ሱንይ ፃፈትስ።
ታዉ ኦድያ ኪታንቹዋስ፥ ካታማ፥ እያ ፐንገታነ እያ ድርሳ ዋያ ዎርቃ ፃምአይ ደኤስ።9 ካታማስ ኦይዱ ማዛነት ደኦሶና፤ ካታማ ጌሳይነ ጎምፓይ እስ ግና። ኪታንቾይ ካታማ ባ ፃምአን ዋን፥ ካታማይ ታማነ ናምኡ ሙኩሉ ክሎ ምትረ ግድስ፤ ካታማ ጌሳይ፥ ጎምፓይነ ቃተይ እስ ግና። ኪታንቾይ ቃስ ድርሳ ዋን፥ ኪታንቾይ ጎኤትያ አሳ ኩሸን እስ ፄታነ ኦይታማነ ኦይዱ ዋ ግድስ።
ካታማ ድርሳይ ያስጵደ ጌተትያ ሹቻን ድረትስ። ካታማይ ማስቶተዳ ጶልያ ዋላህ ባይና ዎርቃን ኦሰትስ። ካታማ ድርሳ ባሶይ ኡባ ቆሞ ቦንቸትዳ ሹቻን አሌቀትስ። ኮይሮ ሂፀትዳ ሹቻይ ያስጵደ፥ ናምአንይ ሳንፓረ፥ ሄንይ ከልቀዶነ፥ ኦይዳንይ ባሉረ፥ እቻሻንይ ሳርዶንክሳ፥ ኡሱፑንይ ሳርድዮነ፥ ላፑንይ ክርስትሎበ፥ ሆስፑንይ ብርለ፥ ኡዱፉንይ ቶጳዘ፥ ታማንይ ክርስጵራስሰ፥ ታማነ እስንይ ያክንተ፥ ታማነ ናምአንይ አመተስፅኖሳ።
ታማነ ናምኡ ፐንገታስ ታማነ ናምኡ አልኦ ሹች ደኤስ። እስ እስ ፐንገይ እስ አልኦ ሹቻን ኦሰትስ። ካታማ ዎጋ ኦገይ ማስቶተዳ ጶልያ ዋላህ ባይና ዎርቃፈ ኦሰትስ።10
ጎዳይ፥ ኡባፈ ዎልቃማ ፆሳይነ ዶርሳይ ካታማስ ኬ ግድያ ግሾ፥ ታ ሄ ካታማን ፆሳ ኬ በአብከ። ፆሳ ቦንቾይ ሄ ካታማስ ፖእያ ግሾነ ዶርሳይ እያዉ ፆምፐ ግድያ ግሾ ካታማስ አዋ ዎይኮ አጌና ፖኦ ኮሸና።11 ካዎተት ሄ ካታማ ፖኦን ሄመታና፤ ካዎትካ ባንታ ቦንቹዋ ያ ኤሀና።12 ቃም ያን ባይና ግሾ ካታማ ፐንገት ኡባ ጋላስ ዶያ ግዳና፤ ኡባራካ ጎርደቶኮና።13 ካዎተታ ግታተይነ ቦንቾይ ሄ ካታማ ያና። ዶርሳ ደኦ ማፃፋን ሱንይ ፃፈትዳይሳታ ፃላል አትሽን፥ ቱናባ ዎይኮ ዬላያባ ኦይ ዎይኮ ዎርዶተይ ኦንካ ሄ ካታማ ገለና።14
Source notes (14)
- Cross-reference እሳ 65:17፤ 66:22፤ 2 ጰፅ 3:13.
- Cross-reference እሳ 52:1፤ ቆን 3:12፤ እሳ 61:10.
- Cross-reference ህዝ 37:27፤ ሌወ 26:11.
- Cross-reference እሳ 25:8፤ እሳ 35:10፤ 65:19.
- Cross-reference እሳ 55:1.
- Cross-reference 2 ሳሜ 7:14፤ ማዝ 89:26.
- Cross-reference ህዝ 40:1.
- Cross-reference ህዝ 48:30-35.
- Cross-reference ህዝ 40:3.
- Cross-reference እሳ 54:11-12.
- Cross-reference እሳ 60:19.
- Cross-reference እሳ 60:3.
- Cross-reference እሳ 60:11.
- Cross-reference እሳ 52:1፤ ህዝ 44:9.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.