ማዝሙረ 91

ፆሳ ናጎ

1ኡባፈ ቃ ፆሳን ናገትድ ደኤይ፥

ኡባፈ ዎልቃማ ፆሳ ኩያን አቄስ።

2እ ጎዳ፥ “ኔኒ ታዉ ሚፃነ ቆሰታ አትያ በሲ፥

ኔኒ ታና አማንያ ታ ፆሳ” ያጋና።

3እ ነና ሻንካንቾታ ፅሄፐ፥

ዎድ ኦንግያ ጋዶፐ አሻና።

4እ ባ ባለታን ነና ካማና፤

እያ ቀፍያ ጋርሳን ኔኒ ቆሰታዳ አታና፤

እያ አማነተይ ነዉ ጎንዳለነ ካተ።

5ኔኒ ቃማ ዳጋንያባስ፥

ዎይኮ ጋላስ ፆንገትያ ቶራስ ያያካ።

6ኔኒ ማን ኦይክያ ሀርገ፥

ዎይኮ ጋላሳ ሴታን ኦንግያ ጋዶ ህርጋካ።

7ሙኩላይ ነ ምየን፥

ታሙ ሙኩላይ ነ ኡሻቻን ኩንዳና፤

ሽን ነና አይብካ ቦቸና።

8ኢታት ሴረትሽን፥

ኔኒ ነ አይፈ ፃላላን በአና።

9ኔኒ ጎዳ ነዉ ቆሰታዳ አትያ በሲ ኦዳ ግሾነ፥

ኡባፈ ቃ ፆሳ ነ ደእያ በሲ ኦዳ ግሾ፥

10ኢታባይ ነና ቦቸና፤

ጋዶይ ነ ኬኮ ሺቀና።

11ነ ኦገ ኡባን ነና ናጋና መላ፥

ፆሳይ ባ ኪታንቾታ ኪታና።

12ነ ቶሆይ ሹቻን በቶና መላ፥

ኪታንቾት ባንታ ኩሸን ነና ደንና።

13ኔኒ ጋሞነ ሾሻ ቦላ ሄመታና፤

ዎዳላ ጋሞነ ኢታ ሾሻ የና።

14ፆሳይ፥

“እ ታና ሲቅዳ ግሾ ታኒ እያ አሻና፤

ታ ሱን ኤርያ ግሾ ታኒ እያ ናጋና።

15እ ታና ፄግያ ዎደ ታኒ እያዉ ኮያና፤

መቶ ዎደ ታኒ እያራ ግዳና፤

ታኒ እያ አሻናነ ቦንቻና።

16ታኒ እያ ላይ አዱሳና፤

ታ አቶተ እያ በሳና” ያጌስ።