ማዝሙረ 90

ኦይዳን ማፃፋ

(ማዝ 90—106)

መርናዉ ደእያ ፆሳ

ፆሳ አስ ግድዳ ሙሰ ዎሳ

1ጎዳዉ፥ ኔኒ የለታፐ የለታ ጋካናዉ፥

ኑኒ ደእያ በሲ ግዳዳሳ።

2ደረት መታናፐ ካሰ፥

ሳእ ኦሰታናፐ ካሰ፥

መርናፐ መርና ጋካናዉ ነ ፆሰ።

3ኔኒ፥ “አሳ ናይቶ፥ ጉየ ቢታኮ ስምተ” ያጋዳ፥

ኤንታ መትዳ ቢታኮ ጉየ ዛራሳ።

4ሙኩሉ ላይ ዝነ አዳ ጋላሳ መላ፤

ዎይኮ እስ ቃማ ግዶን እስ ሳተ መላ።

5ኔኒ አሳ ቆፖና ድኦዳ ኤፋሳ፤

ኤንቲ አሙሆ መላ፤

ዎንታ ዎንታ ዶልያ ማታ መላ።

6ማት ዎንታ ድጭድ ጭዬስ፤

ኦማርስያ ዎደ ሹልድ መሌስ።

7ኑኒ ነ ይሉዋን ዉርዳ፤

ነ ሀንቁዋ ሱሎን ዳጋምዳ።

8ኑ ኢታ ኦሱዋ ነ ስንን ዎዳሳ፤

ኑ ጌምዳ ናጋራ ነ ሶምኡዋ ፖኡዋን ዎዳሳ።

9ኑ ጋላሳ ኡባይ ነ ሀንቁዋን አስ፤

ኑ ላይ ኦለን ዉርሶስ።

10ኑ ደኦ ላይይ ላፑን ታማ፤

ዎይኮ ዳርኮ ሆስፑን ታማ።

ሄስካ መቶይነ ዋየይ ኩምዳይሳ፤

ኑ ላይይ ኤሶን ዉሬስ፤ ኑካ ኤሶን አኦስ።

11ነ ሀንቁዋ ዎልቃ ኤረይ ኦኔ?

ነ ሀንቁዋ ሱሎይ ዎልቃማ።

12ኑ ላይ ማራ ኦገን ኑ ጎኤታና መላ፥

ኑና ጭንጫተ ታማርሳ።

13ጎዳዉ፥ ነ ሀንቆይ አዉደ ጋካናሴ?

ሀያና ነ አይለታስ ቃታ።

14ኑ ላይ ኡባን

ኑ ኡፋይታናዳነ የፃናዳ፥

ዎንታ ዎንታ ነ ሲቁዋ ኑና ካልሳ።

15ነ ኑና መቶዳ ጋላሳታ ኬና፥

ኑኒ ኡንኤትዳ ላይታ ኬና ኑና ኡፋይሳ።

16ኑስ ነ አይለታስ ነ ኦሶይ ቆንጮ፤

ነ ቦንቾይ ኤንታ ናይታስ በንቶ።

17ጎዳ ኑ ፆሳ ኬሀተይ ኑ ቦላ ግዶ፤

ኑ ኩሸ ኦሶ ኡባ ኑስ አይፍሳ፤

ኤ፥ ኑ ኩሸ ኦሶ ኡባ አይፍሳ።