ማዝሙረ 89

አማንያ ፆሳስ የፅተ

እዝራኤላ አድያ ኤታና ማዝሙረ

አኬካን ፃፍዳ ግንፆ

1ጎዳዉ፥ ነ ሲቁዋባ ታኒ መርናዉ የፃና፤

ነ አማነተ የለታ ኡባስ አዋጃና።

2ነ ሲቆይ መርናዉ ኤቅዳይሳነ

ቱማተ ኔኒ ሳሎን ምንዳ ኤስዳይሳ ኦዳና።

3ኔኒ፥ “ታ ዶርዳይሳራ ቃላ ገላስ፤

ታ አይልያ ዳዊታስ ሀይሳዳ ያጋዳ ጫቃስ፤

4‘ታኒ ነ ኮቻ መርናዉ ካዎና፤

ነ አራታ የለታ ኡባን ምንና’ ” ያጋዳሳ። ሳላሀ

5ጎዳዉ፥ ሳሎት ነ ማላልስያ ኦሱዋ አዋጆ፤

ጌሻታ ሺቆይ ነ አማነተ ኦዶ።

6ሳሎን ጎዳራ ልከታናዉ ዳንዳኤይ ኦኔ?

ሳሎ መተታ ግዶን ጎዳ መል ኦኔ?

7ጌሻታ ሺቁዋን ፆሳይ ያሽሴስ፤

እያ ዩሹዋን ደእያ ኡባፈ አድ ዳጋንስ።

8ኡባፈ ዎልቃማ ጎዳዉ ፆሳዉ፥

ነ መላ ዎልቃም ኦኔ?

ጎዳዉ፥ ኔኒ ኡባባን አማነታሳ።

9ኔኒ ጉምያ አባ ዎልቃ ኪታሳ፤

ደንድያ ዙልያ ስእ ኦሳ።

10ራኣባ ጌተትያ ዶአ መንረዳሳ፤

ነ ሞርከታ ነ ዎልቃማ ቀስያን ላላዳሳ።

11ሳሎይነ ሳእ ነባ፤

አላምያነ እያን ደእያ ኡባ መዳይ ነና።

12ፑደሀነ ዱገሀ ነ መዳሳ፤

ታቦረነ አርሞና ዙማት፥

ኡፋይሳን ነ ሱን ሳቦሶና።

13ነዉ ዎልቃማ ቀሰይ ደኤስ፤

ነ ኩሸይ ምኖ፤

ነ ኡሻቻ ኩሸይ ቁ ግስ።

14ፅሎተነ ሱረ ፕርድ ነ አራታስ ባሶ፤

ሲቆይነ ቱማተ ነ ስንን ቦሶና።

15ጎዳዉ፥ ኡፋይሳን እልለይሳትነ

ነ ሶምኡዋ ፖኡዋን ሄመተይሳት አንጀትዳይሳታ።

16ነ ሱንን ጋላስ ኩመ ኡፋይቶሶና፤

ኤንቲ ነ ፅሎተ ቁ ቁ ኦሶና።

17ኤንቲ ጬቀትያ ዎልቃይ ነና፤

ነ ቴማን ኑ ካጨይ ቁ ቁ ግስ።

18ኑ ጎንዳለይ ኑ ጎዳ ኩሸና፤

ኑ ካዎይካ እስራኤለ ጌሻ ኩሸና።

19በን ኔኒ፥ ነ አማነትዳ አሳስ

ቆንጨን ሀይሳዳ ያጋዳሳ።

“ታኒ እስ ኦላንቹዋ ማዳስ፤

አሳ ግዶፈ ዶረትዳይሳ ቁ ቁ ኦስ።

20ታ አይልያ ዳዊታ ደማስ፤

ታ ጌሻ ዛይትያ ትያዳ እያ ካዎስ።

21ታ ኩሸ እያራ ዳና፤

ታ ቀሰይ እያ ምንና።

22እያ አይ ሞርከይካ ጊርሰና፤

አይ ኢታ አስካ እያ ሃረና።

23እያ ሞርከታ ታ እያ ስንን ትንቸረና፤

እያ እፀይሳታ ሾጫ የጋና።

24ታ ቱማተይነ ታ ሲቆይ እያራ ግዳና፤

ታ ሱንን እያ ካጨይ ቁ ቁ ጋና።

25ታኒ እያ ካዎተ መደትራነ አባ፥

እያ ዛዋ ሻፋታ ጋካናዉ አሳና።

26እ ታና፥ ‘ኔኒ ታ አዋ፥ ታ ፆሳ፤

ታና አሽያ ዛላ’ ያግድ ፄጋና።

27ታኒ እያ ባይራ ናአ ኦና፤

ሳአን ደእያ ካዎታ ኡባፈ እያ ግታያና።

28ታኒ ታ ሲቁዋ መርናዉ እያዉ ናጋና፤

ታኒ እያራ ጫቅዳ ጫቁዋ ምንና።

29ታኒ እያ ኮቻ መርናዉ ምንዳ ኤሳና፤

እያ አራታ ሳሎዳ ጋምእሳና።”

30“ሽን እያ ኮቻት ታ ህግያ አግኮ፥

ኤንቲ ታ ዎጋዳ ሄመቶና እፅኮ፥

31ታ አዋጁዋ ሻርኮ፥

ታ ኪታ ናጎና እፅኮ፥

32ታኒ ኤንታ ናጋራ ግሾ ፃምአን፥

ኤንታ ኢታተ ግሾ ልሶን ሴራና።

33ሽን ታኒ ታ ሲቁዋ እያፐ ኤክከ፤

ታኒ እያዉ መርናዉ አማነታና።

34ታኒ ኤንታራ ጫቅዳ ጫቁዋ መንከ፤

ታ ዶናፐ ከይዳ ቃላ ላምከ።

35ታኒ እስ ቶሆ ታ ጌሻተን ጫቅዳ ግሾ፥

ዳዊታስ ዎርዶትከ።

36እያ ኮቻይ መርናዉ ዳና፤

እያ አራታይ ታ ስንን አዋዳ ጋምአና።

37ሳሎን አማነትያ ማርካ ግድዳ አጌናዳ፥

እያ ካዎተይ መርናዉ ምንድ ዳና” ያጋዳሳ። ሳላሀ

38ሽን ሀእ ነ ትይዳ ካዋ ቦላ ሀንቀታዳሳ፤

እያ እፃዳሳ፤ አጋዳሳ።

39ነ አይልያራ ጫቅዳ ጫቁዋ መንዳሳ፤

እያ ካላቻ ባናን ሆላዳ ቱንሳዳሳ።

40እያ ካታማ ግምበ ድርሳ ላላዳሳ፤

እያ ሚፃ ይሳዳሳ።

41ኦገራ አያ ኡባይ እያ ቦንቅዶሶና፤

እ ባ ሾሮታስ ሚቻስ አትስ።

42እያ ሞርከታስ ፆኖ እማዳሳ፥

ኤንታ ኡባ ኡፋይሳዳሳ።

43እያ ማሻ ፄራ ቃላምአዳሳ፤

እያ ኦላን ማዳባካ።

44እያ ካዎታ ፃምኣ እያ ኩሸፐ ኤካዳሳ፤

እያ አራታ ቢታን ሆላዳሳ።

45እያ ያላጋተ ዎድያ ቃምሳዳሳ፤

እያ ዬላ ማይዛዳሳ። ሳላሀ

46ጎዳዉ፥ ኔኒ አዉደ ጋካናዉ ጋምአይ?

ኔኒ መርናዉ ጌማኔ?

ነ ሀንቆይ ታማዳ አዉደ ጋካናዉ ኤፃኔ?

47ታ ላይይ አይ መላ ቃንኮ ቆፓ፤

አሳ ኡባ ጮ መላ መድ!

48ሀይቆፐ አታናዉ ዳንዳእያ አስ ደኢ?

ዱፎ ገሎና ዳናዉ ዳንዳኤይ ኦኔ? ሳላሀ

49ጎዳዉ፥ ኔኒ ነ ቱማተን ዳዊታስ ጫቅዳ፥

ነ ሲቆይ አዉን ደኢ?

50ጎዳዉ፥ ነ አይለይ አይ መላ ቦረትዳኮ በአ፤

አሳ ኡባ ቦርያ ዋታ ዳንዳእዳኮ ሀሳያ።

51ጎዳዉ፥ ነ ሞርከት ቀልቅስዳይሳ፥

ነ ትይዳ ካዋ ታንጎን ታንጎን ቦረይሳ በአ።

52ጎዳይ መርናዉ ጋላተቶ!

አምንእ! አምንእ!