ማዝሙረ 52

ፆሳ ሲቆይ መርናሳ

ዳዊቲ ዛማረታ ሀላቃስ አኬካን ፃፍዳ ግንፆ

ኤዶመ ቢታ አስ ግድዳ ዶይቅ ሳኦላኮ ብድ፥ “ዳዊቲ አብመለከ ሶ ብስ” ያግድ ኦድ ስምን፥ ዳዊቲ ፃፍዳ ማዝሙረ

1ነኖ፥ ዎልቃማ ኡራዉ፥ ኢታተን አይስ ኦቶርታይ?

ነኖ ፆሳን ካትዳይሶ ኡባ ዎደ አይስ ጬቀታይ?

2ነኖ፥ ዎርዶ ኦደተይሶ፥

ነ ሀራታ ይሳናዉ ማቀታሳ፤

ነ እንፃርሳይ ቃራ ማቅላ መላ።

3ነ ሎኦ አጋዳ ኢታ ዶሳሳ፤

ቱማ አጋዳ ዎርዶ ኦደታሳ። ሳላሀ

4ነኖ፥ ዎርዳንቹዋዉ፥

ነ ቦሻ ቃላ ኡባ ዶሳሳ።

5ፆሳይ ነና መርናዉ መንና፤

ፆሳይ ነና መንረናነ ነ ኬፈ ዳፍድ ከሳና፤

ነና ደኦን ደኤይሳታ ግዶፈ ሾድድ የጋና። ሳላሀ

6ፅሎት ሄሳ በእድ ያያና፤

ኤንቲ ሀይሳዳ ያግድ፥ ነ ቦላ ሚጫና፤

7“ፆሳ ባዉ ገሸ ኦቦና፥

ባ ዱረተን አማነትዳ፥

ኢታ ኦሶን ምንዳ፥

አድያ ሀይሳ በእተ” ያጋና።

8ሽን ታኒ ፆሳ ኬን አጭያ ሻማሆ መላ፤

እያ ሲቁዋን ታኒ መርናዉ አማነታይስ።

9ነ ኦዳ ግሾ መርናዉ ታ ነና ጋላታና፤

ኔኒ ሎኦ ግድያ ግሾ ነ ሱንን ኡፋይስ ኦና፤

ጌሻታ ስንን ታ ነና ሳባና።