ማዝሙረ 51

ታዉ ጌሻ ዎዛና እማ

ዳዊቲ ዛማረታ ሀላቃስ ፃፍዳ ማዝሙረ

ዳዊቲ በርሳበራ ላይማትዳ ዎደ ናብያ ናታን እያዉ ኦድ ስምን ዳዊቲ የፅዳ ማዝሙረ

1አቤት ፆሳዉ፥ ነ መርና ሲቁዋዳ ታና ማራ፤

ነ ቃታ ዳሩዋ መላ ታ ናጋራ ቁቻ።

2ታ ኢታተፈ ታና ሜጫ፤

ታ ናጋራፐ ታና ጌሻ።

3ታኒ ታ ቆሁዋ ኤራይስ፤

ታ ናጋራይ ኡባ ዎደ ታ ስንና።

4ታኒ ነና፥ ነ ፃላላ ቆሀስ፤

ነ ስንን ኢታባ ኦስ።

ሄሳ ግሾ፥ ነ ሀንቁዋን ነ ልከ፤

ነ ፕርዳንካ ነ ፅሎ።

5ሄኮ ታ የለትያ ዎደ ናጋራንቾ፤

ታ አየ ኡሎን ቡሮ አትያ፥

ዎደፐ ዶማዳ ታኒ ናጋራንቾ።

6ኔኒ አሳ ዎዛናፐ ቱማተ ኮያሳ፤

ታ ጋ አሳተ ጭንጫተ ታማርሳ።

7ህሶጰ ቦንጮን ታና ዉርፃ፤ ታ ጌያና፤

ታና ሜጫ፤ ታ ሻቻፈ አዳ ቦፃና።

8ነ ታና ኡፋይስነ ሎኦባ ስሳ፤

ነ መንረዳ ታ መቀ ዛራዳ ኡፋይሳ።

9ነ ሶምኡዋ ታ ናጋራፐ ሀራ ሶ ዛራ፤

ታ ባላ ኡባ ቁቻ።

10አቤት ፆሳዉ፥ ጌሻ ዎዛና ታናን መ፤

ቃፆና አያና ታ ግዶን ኦራ።

11ታና ነ ስንፈ የጎፋ፤

ነ ጌሻ አያና ታፐ ኤኮፋ።

12ነ አቶተ ኡፋይሳ ታዉ ዛራ፤

ታ ነዉ ኪተታና መላ ታና ዘምፕሳ።

13ታ ሄ ዎደ ህገ መንይሳታ ነ ኦግያ ታማርሳና፤

ናጋራንቾትካ ኔኮ ስማና።

14አቤት ፆሳዉ፥ ታና አሽያ ፆሳዉ፥

ሱ ጉስያ ናጋራፐ ታና አሻ፤

ሄ ዎደ ታ እንፃርሳይ ነ ፅሎተ የፃና።

15አቤት ጎዳዉ፥ ታ ዶና ዶያ፤

ታ እንፃርሳይ ነ ጋላታ አዋጃና።

16ነ ያርሾን ኡፋይትያኮ፥ ታ ነዉ ያርሻናሽን፥

ነ ፁሳ ያርሾን ኡፋይታካ።

17ፆሳ ያርሾይ አዳ አያና፤

ፆሳዉ፥ ነ መቅዳነ

ካዉይዳ ዎዛና ካካ።

18አቤት ፆሳዉ፥ ዶሳን ፅዮነስ ኬሀ፤

የሩሳላመ ግምበታ ግምባ።

19ሄ ዎደ ነ ፅሎተ ያርሾንነ

ፁሳ ያርሾን ኡፋይታና።

ፖሎ ሽቂያ መሄ ያርሾን ኡፋይታና፤

ኮርማት ነ ያርሾ በሳን ያርሸታና።