ማዝሙረ 139

ታ ዎዛና ፕልጋዳ በአ

ዳዊታ ማዝሙረ

1ጎዳዉ፥ ኔኒ ታና ፕልጋዳ ኤራዳሳ።

2ኔኒ ታ ኡተነ ታ ኤቁዋ ኤራሳ፤

ታ ቆፋ ኡባ ሃሆን አኬካሳ።

3ታኒ ብያ በሳነ ሸምፕያ በሳ ፆሞሳሳ፤

ታ ኦገታ ኡባ ኤራሳ።

4ጎዳዉ፥ ታኒ ታ እንፃርሳን

እስ ቃላ ኦደታናፐ ስን፥

ታ ቆፋ ኡባ ኤራሳ።

5ኔኒ ታ ዩሹዋን ደኣሳ፤

ነ ኩሽያ ታ ቦላ ዎሳ።

6ነ ኤራተይ ታና ዳሮ ማላልሴስ፤

ታ አኬካፐ ቃ።

7ታ ነ አያናፐ አዉ ባቃታኔ?

ነ ስንፈ አዉ ባኔ?

8ፑደ ሳሎ ከይኮ ነ ያን ደኣሳ!

ዱገ ስኦለ ዎኮካ ነ ያን ደኣሳ።

9ዶሎሀ ባጋ ፓላዳ ቢኮ፥

ዎይኮ ዉሎሀ ባጋን ሃካዳ ደእኮ፥

10ያን ነ ኩሸይ ታና ካለስ፤

ነ ኡሻቻ ኩሸይ ታና ዘምፕሴስ።

11“ማዉ ታና ገን፤

ጋላሳዉ ቃማ ላመታ” ግያኮካ፥

12ሳካና ም ነዉ መና፤

ቃም ጋላሳዳ ፖኤስ፤

ነዉ ም ፖኦ መላ።

13ኔኒ ታ ግዶ አሳተ መዳሳ፤

ታ አየ ኡሎን ታና ኔኒ ትላዳሳ።

14ኔኒ ታና ማላልስያባነ

የገልስ ኦዳ መዳ ግሾ፥

ታኒ ነና ጋላታይስ።

ነ ኦሶት ማላልሴስ!

ታኒ ሄሳ ሎይዳ ኤራይስ።

15ታኒ ጌማ በሳን መትያ ዎደ፥

ታ መቀይ ኔፐ ጌምቤና።

ታ አሳተይ ታ አየ ኡሎን ጪሞ ግዶን

ሂላን አሌቀትድ ኦሰትያ ዎደ፥

16ነ አይፈት ጊጎና ታ አሳተ በእዶሶና።

ቡሮ እሶይካ ዶመቶና ደእሽን፥

ነ ታዉ ቡዞይዳ ጋላሳ ኡባይ

ነ ማዝጋበን ፃፈትዶሶና።

17ፆሳዉ፥ ነ ታዉ ቆፕያ ቆፋይ

ዋንዳ ቦንቾ!

ኤንታ ታይቦይ ዋንድ ዳርደ!

18ታኒ ኤንታ ታይብያኮ ሻፈፐ ዳሮ፤

ታኒ ባርክያ ዎደ ሀእካ ኔራ ደአስ።

19ፆሳዉ፥ ኔኒ ኢታታ ዎያኮ አይበ!

ሱ ጉስያ አሳት ታፐ ሃኮ!

20ኤንቲ ነ ቦላ ኢታባ ሃሳዮሶና፤

ነ ሞርከት ነ ሱን ኢሶሶና።

21ጎዳዉ፥ ነና እፀይሳታ ታ እፅክና?

ነ ቦላ ደንደይሳታ ታ ሻተትክና?

22ታኒ ኤንታ ኩመ እፃይስ፤

ኤንታ ታኒ ታ ሞርከዳ ታይባይስ።

23ፆሳዉ፥ ታና ፕልጋዳ ታ ዎዛና ኤራ፤

ታና ኡንኤዳ ታ ቆፋ በአ።

24ታናን ኢታባይ ደእኮ ፄላ፤

መርና ኦግያን ታና ካለ።