ማዝሙረ 140

ኢታ አሳ ኩሸፐ ታና አሻ

ዳዊታ ማዝሙረ

1ጎዳዉ፥ ኢታታፐ ታና አሻ፤

ማካላንቾታፐ ታና ናጋ።

2ኤንቲ ኢታ ኦናዉ ማቀቶሶና፤

ጋላስ ጋላስ ኦላ ደንሶና።

3ባንታ እንፃርሳ ሾሻ እንፃርሳዳ ቃራዮሶና፤

ኤንታ ዶናን ዎያ ማርዘይ ደኤስ። ሳላሀ

4ጎዳዉ፥ ኢታታ ኩሸፐ ታና አሻ፤

ታ ቶሁዋ ቃፃናዉ ቆፕያ

ማካላንቾታፐ ታና ናጋ።

5ኦቶራንቾ አሳት ታዉ ፅሄ ዎሶና፤

ግተ ሂፆሶና፤

ታና ኦይካናዉ ግተ የጎሶና። ሳላሀ

6ጎዳ፥ “ኔኒ ታ ፆሳ” ጋና፤

ጎዳዉ፥ ታ ዎሳ ስአ።

7ኡባ ሃርያ ጎዳዉ፥

ታና አሽያ ምኑዋዉ፥

ኦላ ጋላስ ታዉ ጎንዳለ ግዳዳሳ።

8ጎዳዉ፥ ኢታታስ ኤንታ አሙዋ እሞፋ፤

ኤንቲ ኦቶርቶና መላ ኤንታ ማቁዋ ፖልሶፓ። ሳላሀ

9ታ ሞርከታን ታና ፆንሶፓ፤

ኤንታ ዶናፐ ከይያ ኢታይ

ኤንታ ቦላ ስሞ።

10ኤንታ ቦላ ፁግያ ታማ ቦንቆይ ቆለቶ፤

ኤንቲ ታማ ኦላን የገቶ፤

ከያናዉ ዳንዳኦና ኦላ ሆለቶ።

11ዮያማት ቢታ ቦላ ደኦፖ፤

ቡቀይሳታ ኢታባይ የደድ ኦይኮ።

12ጎዳይ ማንቆታስ ፕርደይሳነ

መቶታንቾታስ ሞተተይሳ ኤራይስ።

13ፅሎት ቱማ ነ ሱን ጋላታና፤

ሱረ አሳት ነ ስንን ዳና።