ማዝሙረ 141

ነ ሀይ ታኮ ዛራ

ዳዊታ ማዝሙረ

1ጎዳዉ፥ ታኒ ነና ፄጋይስ፤

ታና ማዳናዉ ኤለሳ፤

ታ ኔኮ ዋስያ ዎደ ታና ስአ!

2ታ ዎሳይ እፃነዳ ነ ስን ሺቆ፤

ታ ኩሸ ምጨይ ኦማርሳ ያርሾ መላ ግዶ።

3ጎዳዉ፥ ታ ዶና ናግያ አስ ዎ፤

ታ መተርሻ ፐንግያ ናጋ።

4ኢታ ኦያ አሳታራ ኢታ ኦና መላ፥

ታ ዎዛና ኢታኮ ዛሮፓ፤

ኤንታ ግብራ ታና ሙዞፓ።

5ፅሎ አስ ታና ሴሮ፥ ሄስ ታዉ ኬሀተ፥

እ ታና ሀንቀቶ፥ ሄስ ታ ሁጰን ዛይተ ትዮ መላ።

ታ ዎዛናይ ሄሳ እፀና፤

ታ ዎሳይ ኡባ ዎደ ኤንታ ኢታ ኦሱዋ ቦላና።

6ኤንታ ዳይናት አፎ ሆለትያ ዎደ፥

ታ ቃላይ ቱማ ግደይሳ ኤንቲ ኤራና።

7ኤንቲ፥ “አስ ቢታ ጎየይሳዳነ ጳሻ ላለይሳዳ፥

ኑ መቀይ ዱፎ ዶናን ላለታና” ያጎሶና።

8ኡባ ሃርያ ጎዳዉ፥

ታ አይፈይ ነና ፄሌስ።

ታኒ ኔኮ ባቃታይስ፤

ታና ሀይቆስ አዳ እሞፋ።

9ኤንቲ ታዉ የግዳ ግትያፐነ

ኢታ ኦይሳታ ፅህያፐ ታና ናጋ።

10ታኒ ሳሮ አን፥

ኢታት ባንታ ዎዳ ግትያን ኦይከቶ።