ማዝሙረ 106

ፆሳይ ግታ፥ እያ ጋላትተ

1ጎዳ ጋላትተ!

እ ኬሀ ግድያ ግሾነ

እያ ሲቆይ መርናሳ ግድያ ግሾ፥

ጎዳ ጋላትተ።

2ጎዳይ ኦዳ ዎልቃማ ኦሶ ኦዳናዉ፥

ዎይኮ እያ ጋላታ ኡባ ቆንጭሳናዉ

ዳንዳኤይ ኦኔ?

3ፕርዳ ናገይሳትነ

ኡባ ቶሆ ፅሎባ ኦይሳት አንጀትዳሳታ።

4አቤት ጎዳዉ፥ ኔኒ ነ አሳስ ኬህያ ዎደ ታና ቆፓ፤

ኤንታ ኔኒ አሽያ ዎደ ታና አላ።

5ሄስካ ነ ዶርዳ አሳ ድቻ ታ በአና መላ፥

ነ አሳ ኡፋይሳን ታኒ ኡፋይታና መላነ

ነ አሳራ እስፈ ታኒ ጋላታና መላሳ።

6ኑኒ ኑ አዋታዳ ናጋራ ኦዳ፤

ኑ ባልዳ፤ ኢታባ ኦዳ።

7ኑ አዋት ግብፀን ደእያ ዎደ፥

ማላልስያ ነ ኦሱዋ ቆፕቦኮና።

ነ ሲቁዋ ዳሮተ ኤንቲ ሀሳይቦኮና፤

ዞኦ አባ ማታን እያ ቦላ ማካልዶሶና።

8ግዶሽን፥ እ ባ ሱን ግሾ፥

ባ ግታ ዎልቃ ኤርሳናዉ ኤንታ አሽስ።

9እ ዞኦ አባ ኪትን፥ አባይ መልስ፤

መላ ቢታራ ካንድ አያዳ፥

ጪሞ ግዶራ ኤንታ ካለድ ፕንስ።

10እ ኤንታ እፀይሳታ ኩሸፐ አሽስ፤

ሞርከታ ኩሸፐ ኤንታ ዎዝስ።

11ኤንታ ሞርከታ ሃይ ምትስ፤

ኤንታፈ እሶይካ አትቤና።

12ሄ ዎደ ኤንቲ እያ ኡፋይሳ ቃላ አማንዶሶና፤

እያ ማዝሙረን ሳቦሶና።

13ግዶሽን፥ ኤንቲ እ ኦዳባ ዶግዶሶና፤

እ ዞርያ ኦግያ ናግድ ባናዉ ዶስቦኮና።

14መላ ቢታን ደእሸ ዳሮ አሞትዶሶና፤

መላ ቢታን ፆሳ ፓጭዶሶና።

15ኤንቲ ዎስዳይሳ እ እሚስ፤

ሽን ኢታ ሀርገ ኤንታ ግዶ ኪትስ።

16መላ ቢታን ዱንካነን ደእሸ ሙሰነ

ጎዳስ ዱማትዳ አሮና ቃናትዶሶና።

17ቢታይ ዶየትድ ዳታነ ምትስ፤

አቤሮ እያ ኬ አሳራ ሞግስ።

18ኤንታ ማባራ ግዶን ታም ኤፅስ፤

ላጮይ ሄ ኢታ አሳታ ፁግስ።

19ኮሬባ ዙማን ዎርቃፈ

ማራ ምስለ መዶሶና፤

ሄ ምስልያ ጎይንዶሶና።

20ኤንቲ፥ ባንታ ቦንቾ ፆሳ

ማታ ምያ መሄ ምስለን ላምዶሶና።

21ኤንቲ ግብፀን ግታ ኦሶ ኦዳነ

ኤንታና አሽዳ ፆሳ ዶግዶሶና።

22ካማ ቢታን ኦሰትዳ ማላልስያባነ

ዞኦ አባን ሀንዳ ማላታ ኦዳሳ።

23ሄሳ ግሾ፥ ፆሳይ ኤንታ ይሳና ግስ፤

ሽን ይሶና መላ እያ ሀንቆ ዛራናዉ፥

ፆሳይ ዶርዳ ሙሰይ ግዶን ኤቅስ።

24ሄሳፈ ጉየ፥ ኤንቲ

እያ ቃላ አማኖና ግሾ፥

ሄ ሎኦ ቢታ ካዶሶና።

25ኤንቲ ባንታ ዱንካንያ ግዶን ዙዙምዶሶና

ጎዳ ቃላስ ኪተትቦኮና።

26ሄሳ ግሾ፥ እ ኤንታ ባዞን የጋናዉ፥

ባ ኩሽያ ደንድ ጫቅስ።

27ኤንታ ኮቻ ካዎተታ ግዶን

የጋናዉነ ቢታ ቦላ ላላናዉ ጫቅስ።

28ሄሳፈ ጉየ፥ ኤንቲ ብኤል-ፋጎራ ኤቃ ጎይነይሳታራ እስፈ ጋሄትዶሶና፤

ሸምፖይ ባይና ኤቃታስ ያርሸትዳ ያርሹዋ ምዶሶና።

29ባንታ ኦሱዋን ጎዳ ሀንቀዶሶና፤

ሄሳ ጋሶን ኤንታ ግዶን ኢታ ሀርገይ ዎስ።

30ሽን ፕንሃስ ደንድድ፥

ኤንታ ናጋራ ፕርድን፥

ኢታ ሀርገይ ኤንታ ቦላፈ ክችስ።

31ሄስካ፥ እያዉ፥ የለተፈ የለተ ጋካናዉ

መርናዉ ፅሎተ ግድድ ታይበትስ።

32ማርባ ፑልቱዋ ማታን ጎዳ ሀንቀዶሶና፤

ኤንታ ጋሶን ሙሰ ቦላ መቶይ ጋክስ።

33ኤንቲ እያ ይሎይዶሶና፤

ሙሰ ዶናፐ በሰና ቃላይ ከይስ።

34ጎዳይ ይስተ ግን፥

ኤንቲ ካናነ አሳታ ይስቦኮና።

35ሄ ፓላባፐ፥ ኤንቲ ሄ አሳታራ

ዋላከትዶሶና፤

ኤንታ ደኦ ዎጋ ካልዶሶና።

36ፆሳ አሳት ኤንታ ኤቃ ጎይንዶሶና፤

ሄስ ኤንታዉ ፅሄ ግድስ።

37ኤንቲ ባንታ አደነ ማጫ ናይታ

ቱና አያናታስ ያርሽዶሶና።

38ኤንቲ ፅሎ ሱ ካናነ ኤቃታስ ያርሽድ፥

ባንታ አደነ ማጫ ናይታ ሱ ጉስዶሶና፤

ሄ ሱን ቢታይ ቱንስ።

39ሄሳዳ ኤንቲ ባንታ ኦሶን ቱንዶሶና፤

ባንታ ሀኖታን ባንታ ላይማ ከስዶሶና።

40ሄሳ ግሾ፥ ጎዳ ሀንቆይ

እያ አሳ ቦላ ኤፅስ፤

እ ባ ላታ ሻተትስ።

41እ ኤንታ አላጋ ኩሸን አድ እሚስ፤

ኤንታ ሞርከት ኤንታ ሃርዶሶና።

42ኤንታ ሞርከት ኤንታ ኡንኤዶሶና

ባንታ ሸነን ኤንታ አይስዶሶና።

43እ ኤንታ ዳሮ ዎደ አሽስ፤

ሽን ኤንቲ ባንታ ማካላ አጎና እፅዶሶና፤

ባንታ ናጋራ ጋሶን ይዶሶና።

44ግዶሽን፥ እ ኤንታ ዋሱዋ ስእስ፤

ኤንታ ዋይያ ቆፕስ።

45እ ኤንታ ግሾ፥ ባ ኡፋይሳ ቃላ ሀሳይስ፤

ባ ሲቁዋ ዳሩዋን ኤንታ ማርስ።

46ኤንታ ድእዳ ኡባይ፥

ኤንታዉ ቃታና መላ ኦስ።

47ኑኒ ነ ጌሻ ሱን ጋላታና መላ

አቤት ጎዳዉ፥ ኑ ፆሳዉ፥ ኑና አሻ።

ነ ቦንቹዋን ኑ ጬቀታና መላ፥

ካዎተታ ግዶፈ ኑና ሺሻ።

48እስራኤለ ጎዳይ፥ ፆሳይ፥

መርናፐ መርና ጋካናዉ ጋላተቶ!

አሳ ኡባይ፥ “አምንእ” ያጎ።

ጎዳ ጋላትተ!