ምልክያሳ 3

1“ሄኮ፥ ታ ስንን ኦገ ጊግሳና መላ ታ ኪታንቹዋ ካሰታዳ ኪታና። ህንተ ኮያ ጎዳይ ቆፖና ደእሽን ባ ኬ ያና። ህንተ ኡፋይሳን ናግያ፥ ጫቆ ኪታንቾይ ያና” ያጌስ ኡባፈ ዎልቃማ ጎዳይ።

2ሽን እ ብራ ሴርስድ ጌሽያ ታማ መላነ ማኡዋ ሜጭያ ሳሙና መላ ግድያ ግሾ፥ እ ያ ጋላሳን ዳንዳእ ኤቃናይ ኦኔ? ቃስ እ ቆንጭያ ዎደ እያ ስንን ኤቃናዉ ዳንዳኤይ ኦኔ? 3እ ብራ ሼሽያነ ጌሽያ አሳዳ ኡታና። እ ሌወ ኮቻታ ብራዳነ ዎርቃዳ ጌሻና። ሄ ዎደ ኤንቲ ጎዳስ ፅሎተን ያርሾ ያርሻና። 4ሄ ዎደ ይሁዳነ የሩሳላመ ያርሾይ በን ዎደታነ አዳ ላይዳ ጎዳ ኡፋይስያባ ግዳና።

5“ሄሳፈ ጉየ፥ ፕርዳስ ታኒ ህንተኮ ያዳ፥ ብታንቾታ፥ ላመይሳታ፥ ዎርዶን ጫቀይሳታ፥ ኦሳንቾታ ዳሞዘ ድገይሳታ፥ አምኤታነ ይኦታ ኡንኤይሳታ፥ በታንቾታስ ፕርዳ ድገይሳታነ ታዉ ያዮናይሳታ ቦላ ኤሶን ማርካታና” ያጌስ ኡባፈ ዎልቃማ ጎዳይ።

ፆሳባ ካይሶቶ

6“ታኒ ጎዳይ ላመትከ፤ ሄሳ ግሾ፥ ህንተኖ ያይቆባ ኮቻቶ፥ ህንተ ይበከታ። 7ህንተ ማይዛታ ዎደፐ ዶምድ፥ ታ ዎጋፐ ካረ ከይደታ፤ እያ ናግበከታ። ሀእ ታኮ ስምተ፤ ታንካ ህንተኮ ስማና” ያጌስ ኡባፈ ዎልቃማ ጎዳይ።

ሽን ህንተ፥ “ኑኒ አይ ኦገን ስምኖ?” ያግድ ኦይቼታ።

8“አስ ፆሰ ካይሶቲ? ሽን ህንተ ታና ካይሶትደታ።”

ቃስካ ህንተ፥ “ኑኒ ነና ዋትድ ካይሶትዶ? ያጌታ።

“ህንተ አስራታንነ እሞታን ታና ካይስደታ። 9እስራኤለ አሳ ኡባይ ታና ካይሶትዳ ግሾ፥ ህንተ ባደትዳይሳታ። 10ታ ኬን ካ ዳና መላ አስራታ ኡባ ሻለን የግተ። ያትድ፥ ታኒ ሳሎ ማስኮትያ ዶያዳ አንጆ ህንተዉ ፓላህሳዳ እሞና እፅኮ ሄሳን ታና ፓጭተ” ያጌስ ኡባፈ ዎልቃማ ጎዳይ።

11“ካ ሞና መላ ታኒ ህንተ ግሾ፥ ጎንዱዋ ሴራና፤ ጋደን ደእያ ዎይነ አይፈይካ ቆቆፈተና። 12ህንተ ቢታይ ዳናዉ እንጀትያ ቢታ ግድያ ግሾ፥ ካዎተት ኡባይ ህንተና አንጀትዳይሳታ ያጋና” ያጌስ ኡባፈ ዎልቃማ ጎዳይ።

13ጎዳይ ሀይሳዳ ያጌስ፦ “ህንተ ታ ቦላ ምኖ ቃላ ኦደትደታ። ያትድ ቃስ፥ ‘ኑኒ ነ ቦላ ዎይግድ ምኖ ቃላ ኦደትዶ?’ ያግድ ኦይቼታ።

14“ህንተ፥ ‘ፆሳስ ኦይስ ሀዳ፤ እያ ኪታ ናግድ፥ ኡባፈ ዎልቃማ ጎዳ ስንን አዛንያ አሳዳ ስመረተ ኑና አይ ማድዴ? 15ሀእካ ኑኒ ኦቶረይሳታ አንጀትዳይሳታ ጎስ፤ ኢታ ኦይሳት ዱረቶሶና፤ ሀር አቶሽን ኤንቲ ፆሳ ፓጭሸካ ከስ ኤኮሶና’ ያጌታ” ያጌስ ፆሳይ።

16ሄ ዎደ ጎዳስ ያየይሳት እሶይ እሱዋራ ኦደትዶሶና፤ ጎዳይካ ሀይዝድ ስእስ። ጎዳስ ያየይሳትነ እያ ሱን ቦንቸይሳት ዶገቶና መላ ኤንታ ሀሳይስያ ማፃፋይ እያ ስንን ፃፈትስ። 17“ኤንቲ ታባ ግዳና፤ ታኒ ኦያ ጋላስ ኤንቲ ታዉ ቡዞ ሚሸ ግዳና፤ አው ባዉ ኦያ ባ ናአ ማረይሳዳ ታኒ ኤንታ ማራና። 18ሄ ዎደ ህንተ ስሚድ ፅሉዋነ ናጋራንቹዋ ግዶን፥ ፆሳስ ኪተተይሳነ ኪተቶናይሳ ግዶን ደእያ ዱማተ በአና” ያጌስ ኡባፈ ዎልቃማ ጎዳይ።