ምልክያሳ 2

1“ሀእካ ካህነቶ፥ ሀ ኪታይ እመትዳይ ህንተሳ። 2ህንተ ስኦና እፅኮ፤ ታ ሱን ቦንቻናዉ ህንተ ዎዛናን ታ ቃላ ዎና እፅኮ፥ ታ ህንተ ቦላ ባደ የዳና፤ ህንተ አንጁዋ ታኒ ባደን ላማና። ህንተ ህንተ ዎዛና ታና ቦንቻናዉ ጊግስቦና ግሾ፥ ታ ህንተና ባዳስ” ያጌስ ኡባፈ ዎልቃማ ጎዳይ።

3“ታኒ ህንተ ኮቻ ሴራና፤ ህንተ ያርሾ መሄ ኦሻ ህንተ ሶምኦን ላላና፤ ህንተካ እያራ እስፈ ሆለታና። 4ሄ ዎደ ታ ሌወራ ጫቅዳ ጫቆይ፥ ምንድ ዳና መላ ሀ ኪታ ኪትዳይ ታና ግደይሳ ህንተ ኤራና” ያጌስ ኡባፈ ዎልቃማ ጎዳይ።

5“ታ እያራ ጫቅዳ ጫቆይ ደኦነ ሳሮተ ጫቆ፤ እ ታዉ ያያና መላ ደኦነ ሳሮተ እያዉ እማስ፤ እካ ታዉ ያይስ፥ ታ ሱን ቦንችዳ መላ ደእስ። 6ቱማ ትምርተይ እያ ዶናን ደእስ፤ እያ እንፃርሳንካ ዎርዶይ በንትቤና። እ ታራ ሳሮተንነ ሱረተን ሄመትስ፤ ቃስ ዳሮታ ናጋራፐ ዛርስ። 7ካህነይ፥ ኡባፈ ዎልቃማ ጎዳይ ኪትዳይሳ ግድያ ግሾ፥ እያ መተርሻይ ኤራተ ናጋናዉ ኮሼስ፤ አሳይ ኤራተ እያ ዶናፐ ታማራናዉ በሴስ” ያጌስ ኡባፈ ዎልቃማ ጎዳይ።

8“ሽን ህንተ ታ ኦግያፐ ጋፃ ከይደታ፤ ህንተ ትምርትያን ዳሮታ ብደታ፤ ታኒ ሌወራ ጫቅዳ ጫቁዋ መንደታ። 9ሄሳ ግሾ፥ ህንተ ታ ኦግያን ቦና እፅድ፥ ህንተ ትምርትያን አሳ ግዶን ሻሄተ መያ ግሾ፥ ታ ህንተና አሳ ኡባ ስንን ካታናዳነ ካዉያናዳ ኦስ” ያጌስ ኡባፈ ዎልቃማ ጎዳይ።

ይሁድ ጫቆ ቃላ መንስ

10ኑ ኡባስ እስ አው ደኤስ ግደኔ? ኑና እስ ፆሳይ መበነዬ? ያትን፥ ኑ እሶይ እሱዋስ አማነቶና እፅድ፥ ኑ ማይዛታ ጫቁዋ አይስ መንኔ? 11ይሁድ ጭምስ፤ እስራኤለንነ የሩሳላመን ቱናባይ ኦሰትስ፤ ይሁድ አላጋ ፆሳ ማጫ ናይታ ኤክድ፥ ጎዳይ ዶስያ ፆሳ ኬ ቱንስስ። 12ሄሳ ታማርሰይነ ካልያ ኦንካ፥ ኡባፈ ዎልቃማ ጎዳስ ያርሾ ኤህያኮካ፥ ጎዳይ እያ ያይቆባ ዱንካንያፐ ይሶ።

13ቃስ ህንተ ኦያ ሀራባይ አይበ ጊኮ፥ ጎዳይ ህንተ ያርሹዋኮ ፄሎና ግሾ ዎይኮ ኡፋይሳን ኤኮና ግሾ ያርሾ በሳ አፉን፥ ዬሆንነ አዛኖን ኩንታ። 14ህንተ፥ “እ ኑ ያርሹዋ አይስ ኤከኔ?” ያግድ ኦይቼታ። ሄስ ሀንዳይ፥ ህንተ፥ ህንተ ናአተ ማቸራ ጫቅዳ ጫቁዋ መንዳ ግሾነ ጭምዳ ግሾሳ፤ እያ ነ ምየነ ነ ጫቆ ማቾ ግድያ ግሾ ጎዳይ ማርካ። 15ጎዳይ ህንተዉነ ህንተ ማቸታስ እስ አሳተነ እስ አያን ዳና መላ ኦቤኔ? ሄሳ አይስ ኦዴ? ፆሳ ያይያ ኮቸ ዳና መላ ኮይዳ ግሾሳ። ሄሳ ግሾ፥ ህንተ አያና ናግተ፤ ህንተ ናአተ ማቸታ ጭሞፍተ።

16“ታኒ ጎዳይ፥ እስራኤለ ፆሳይ፥ አዝን ባ ማችዉ የዳናይሳ እይስ፤ ባ ማኡዋ ኢታ ኦሶን ካምያ ኦናካ ታ እፃይስ። ሄሳ ግሾ፥ ህንተ አያና ናግተ፤ ህንተ ናአተ ማቸታ ጭሞፍተ” ያጌስ ኡባፈ ዎልቃማ ጎዳይ።

ፕርዳ ጋላሳ

17ህንተ፥ ህንተ ኦዳን ጎዳ ሳለደታ።

ህንተ ዛሪድ፥ “ኑኒ እያ ዋትድ ሳለዶ?” ያጌታ።

ህንተ እያ ሳለዳይ፥ “ኢታ ኦያ ኡባይ ጎዳ ስንን ሎኦ፤ እካ ኤንታን ኡፋይቴስ” ያጉሳና፤ ዎይኮ፥ “ፅሎ ፕርድያ ፆሳይ አዉን ደኢ?” ያጉሳና።