ምልክያሳ 1

ያይቆባ ዶሰተ፥ ኤሳዌ እፀተ

1ጎዳይ ምልክያሳ ባጋራ እስራኤለ አሳስ ኦድዳ ትንብተ ቃላይ ሀይሳ።

2ጎዳይ ባ አሳኮ፥ “ታ ህንተና ዶሳስ” ያጌስ።

ሽን ህንተ፥ “ነ ኑና አይብን ዶሳዲ?” ያጌታ።

ጎዳይ ዛሪድ፥ “ኤሳዌይ ያይቆባ እሻ ግደነዬ? ሽን ታኒ ያይቆባ ዶሳስ፤ 3ኤሳዌ እፃስ። ታኒ ደረይ ዳርያ ኤሳዌ ቢታ ባይሳ ኦስ፤ እያ ላታ ዎርካናት ጉፕያ መላ ቢታ ኦስ” ያጌስ።

4ኤሳዌ ኮቸ ግድዳ ኤዶመ አሳይ፥ “ኑ ካታማት ላለትኮካ፥ ኑ ኤንታ ዛሪድ ኬፃና” ያግኮካ፥

ኡባፈ ዎልቃማ ጎዳይ፥ “ኤንቲ ዛሪድ ኬፃና፥ ሽን ታኒ ላላና። አሳይ ኤንታ፥ ‘ሀ ቢታይ ኢታ ቢታ፤ ሀ አሳይካ ጎዳይ መርናዉ ሀንቀትዳ አሰ’ ያጋና” ያጌስ።

5ሄሳ ህንተ፥ ህንተ አይፈን በእድ፥ “ሄኮ፥ ጎዳይ እስራኤለ ቢታፈ ካረንካ ዎልቃማ” ያጋና።

ቦረትዳ ያርሾ

6ኡባፈ ዎልቃማ ጎዳይ ሀይሳዳ ያጌስ፦ “ህንተኖ፥ ታ ሱን ካዉሽያ ካህነቶ፥ ናእ ባ አዋ፥ አይለይ ባ ጎዳ ቦንቼስ። ያትን፥ ታኒ ህንተዉ አዋ ግድኮ፥ ህንተ ታና ቦንችያ ቦንቾይ አዉኔ? ታኒ ህንተዉ ጎዳ ግድኮ፥ ህንተ ታዉ ያይያ ያሻይ አዉኔ? ህንተ ታ ሱን ካዉሽደታ። ህንተ ዛሪድ፥ ‘ኑኒ ነ ሱን ዋትድ ካዉሽዶ?’ ያጌታ።

7“ህንተ ታ ያርሾ በሳን ቱና ካ ዎታ። ቃስ፥ ‘ኑኒ ነና ዋትድ ቱንስዶ?’ ያጌታ። ህንተ፥ ‘ጎዳ ያርሾ በሳይ ካትዳባ’ ያግድ ታና ቱንስደታ። 8ህንተ ቆቀ መሄ ያርሽያ ዎደ ሄስ ቆሆ ግደነዬ? ህንተ ሀርጋንቾ ዎይኮ ዎበ መሄ ያርሽያ ዎደ ሄስ ቆሆ ግደነዬ? ህንተ ሄሳ መላ መሄ ህንተ ሀላቃስ እምያኮ፥ እ ሄሳ ኤካናባነ እያን ኡፋይታናባ ህንተዉ ዳኒ? ያጌስ ኡባፈ ዎልቃማ ጎዳይ።

9“ሀእ ፆሳይ ህንተዉ ቃታና መላ እያ ዎስተ። ዎና ህንተ ሄሳ መላ እሞታ እያዉ እምን፥ እ ህንተና ማዳኔ?” ያጌስ ኡባፈ ዎልቃማ ጎዳይ።

10“ህንተ ታ ያርሾ በሳን ሀዳ ታማ ኤና መላ ፆሳ ኬ ፐንግያ ጎርድያ እስ አስ በንትዳ ግደረነሽን! ታ ህንተናን ኡፋይትከ፤ ህንተ እምያ እሞታካ ኤክከ” ያጌስ ኡባፈ ዎልቃማ ጎዳይ።

11“አው ዶልያሶፐ ዉልያሶ ጋካናዉ ታ ሱንይ ካዎተታ ግዶን ዎልቃማ። ኡባ በሳን ታ ሱንስ እፃነ ጩይሳናነ ጌሻ ያርሾ ያርሻና፤ ታ ሱንይ ካዎተታ ግዶን ዎልቃማ” ያጌስ ኡባፈ ዎልቃማ ጎዳይ።

12“ሽን ህንተ፥ ‘ጎዳ ያርሾ በሳይ ቱና፤ እያን ያርሸትያ ካካ ካትዳባ’ ያግድ እያ ካዉሽደታ። 13ቃስ ህንተ፥ ‘ሀይስ ጮ ዳቡርስ’ ያግድ፥ ቅድ ጩትደታ።

“ህንተ ቦንቅድ ኤህዳባ ዎይኮ ዎበ ዎይኮ ሀርጋንቾ መሄ ያርሼታ፤ ያትን፥ ታኒ ሄሳ ህንተ ኩሸፐ ኤካናዉ በሲ? 14ታኒ ግታ ካዎ፤ ታ ሱንይካ ካዎተታ ግዶን ቦንቸትዳይሳ ግድያ ግሾ፥ ፆሳስ እማና ግድ፥ ዶርዳ ማራዘይ እያ መህያ ግዶን ደእሽን፥ እያ አግድ፥ ቦረትዳ ማራዘ ያርሾ ሽሺያ አስነ ጭምያ አስ ባደትዳባ ግዶ” ያጌስ ጎዳይ።