ሆሰ 12

1ኤፍሬማ አሳይ ዎንታፈ ኦማርስ ጋካናዉ ዶሎሀ ጫርኮ ኦይኬስ ዎይኮ የደስ። ኤንቲ ዎርዶነ ጌላተ ዳርሶሶና፤ አሶረ ቢታራ ጫቅዶሶና፤ ሻማሆ ዛይተ ግብፀ ቢታ የዶሶና።

2ጎዳስ ይሁዳ አሳራ ሞቶይ ደኤስ፤ እ ያይቆባ ናይታ ኤንታ ኦግያዳ ሴራና፤ ኤንታ ኦሱዋዳ ኤንታዉ ዛራና። 3ያይቆብ ባ አየ ኡሎን ደእሸ ባ እሻ ግንድያ ኦይክስ። ድጭ ጋክድ ፆሳራ ቡተትስ፤ 4ኪታንቾራ ባፀትድ ፆንስ። ባና ኬሀ አይፈን ፄላና መላ ባ እሻ ዬክድ ዎስስ። ያይቆብ ፆሳ ቤተለን ደምን ፆሳይ ያን እያራ ሃሳይስ። 5እ ጎዳ፥ ኡባፈ ዎልቃማ ፆሳ። እያ ኤረትዳ ሱንይ ጎዳ ጌተቴስ። 6ሄሳ ግሾ፥ ህንተ ፆሳኮ ስምተ፤ ሲቆነ ሱረ ፕርዳ ምን ኦይክተ፤ ህንተ ፆሳይ ኦና ጋካናዉ ናግተ። 7ዛልአንቾይ ዎርዶ ምዛነን ዛልኤስ፤ እ አሳ ጭማናዉ ዶሴስ። 8ኤፍሬም፥ “ታኒ ዳሮ ዱረ፤ ታኒ ታዉ አቆ ደማስ። ታ አቆ ኡባን ታናን ኤንቲ ባላ ዎይኮ ናጋራ ደሞኮና። 9ሽን ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ፤ ሻቃራ ባኣለ ጋላስ ህንተ ዱንካነን ደእዳይሳዳ ታ ህንተና ዛራ ዱንካነን ዎና። 10ታኒ ናበታስ ኦዳስ፤ ዳሮ ቆንጨ ኤንታዉ እማስ፤ ኤንታ ባጋራ ዳሮ ሌምሶታ ኦዳስ” ያግስ።

11ጋላድ ኢታ ናጋራንቾ፤ ጋላዳ አሳት ፓናይሳታ። ኤንቲ ጋልጋላን ኮርማታ ያርሻና። ኤንታ ያርሾ በሳይ ጎሻን ደእያ ኬላ ሹቻዳ ላለታና።

12ያይቆብ ሶረ ቢታ ባቃትስ፤ እስራኤለይ ማቾ ኤካናዉ ኡነ ኦስ። ኮይታ እማናዉ ያን ዶርሰ ሄምስ። 13ጎዳይ እስራኤለ አሳ ናበታ ባጋራ ግብፀ ቢታፈ ከስድ ሄ ናበታ ባጋራ ኤንታ ናግስ። 14ሽን ኤፍሬም ጎዳ ዳሮ ሀንቀስ፤ እ ሱ ጉስዳ ግሾ እያ ጎዳይ አቻና፤ እያ ጫሻ እያዉ ዛራና።