ሆሰ 13

ፆሳ ሀንቆይ እስራኤለ ቦላ

1ኤፍሬም ኦደትዳ ዎደ ስእዳ ኡባይ ያሻን ኮኮርስ፤ እስራኤለ ቢታን ኤንቲ ቦንቸትዳ አስ። ሽን ባኣለ ኤቃ ጎይንዶሶና፤ ሄ ናጋራ ጋሶን ሀይቅዶሶና። 2ሀእካ ናጋራ ቦላ ናጋራ ኦሶና፤ ባንታ ብራ ሼሽድ ባንታዉ ኤቃ መዶሶና፤ ሂላን ኦሰትዳ ምስለታ ጊግስዶሶና፤ ኡባይካ ኩሸ ሂላን መትዶሶና። አሳይ ኤንታባ ኦድሸ፥ “ያርሽያ አሳይ ማራ ኤቃ ምስለታ ዬርተ” ያጎሶና። 3ሄሳ ግሾ፥ ኤንቲ ዎንታ ሻራ መላ ዎይኮ ዎንታ ፃሳ መላ ዎይኮ ጫርኮይ ዉዱማፈ ደንድ ኤፍያ ፑኖ መላ ዎይኮ ማስኮተራ ከያ ጩያ መላ ግዳና።

4ጎዳይ “ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ። ህንተ ታፐ አትሽን፥ ሀራ ፆሲ ኤረከታ፤ አሸይ ታፐ ሀር ባዋ። 5ባዞን፥ መላ ቢታን ታኒ ህንተና ናጋስ። 6ታኒ ህንተና ሙዝን፥ ምድ ካልድ ኦቶርትደታ፤ ሄሳፈ ጉየ ታና ዶግደታ። 7ሄሳ ግሾ፥ ታኒ ህንተ ቦላ ጋሞ ግዳና፤ ማሄ መላ ኦገ ዶናን ዙጋና። 8ማር ኤከትዳ ማሄ መላ ታኒ ህንተራ ጋሄታዳ ታ ህንተና ፑዛና። ታኒ ህንተና ጋሞዳ መንረና፤ ባዞ ዶአዳ ህንተና ፖሻና።

9“እስራኤለ አሳቶ፥ ህንተ ታ ቦላ፥ ህንተና ማደይሳ ቦላ ደንድዳ ግሾ ታ ህንተና ይሳና። 10ህንተ ታና፥ ‘ኑስ ካዎነ ሀላቃ እማ’ ያግድ ኦይችደታ። ህንተና አሽያ ህንተ ካዎይ አኔ? ካታማታን ደእያ ህንተ ሀላቃት አዉን ደኦና? 11ታኒ ታ ሀንቁዋን ህንተዉ ካዎ እማስ፤ ታ ይሉዋን እያ ደንስ። 12ኤፍሬማ ባላይነ ናጋራይ ፃፈትድ ኡትስ። 13እቀ ኦይክዳ ማጫስ ኡንኤተይሳ መላ ኡንእ እያ ቦላ ያና። ሽን እ ኤር ባይና ናአ፤ የለትያ ዎደይ ጋክን፥ ባ አየ ኡሎፐ ዎና እፅያ ናአ መላ። 14ታኒ ኤንታ ዱፎፐ አሻና፤ ሀይቆ ዎልቃፈ ዎዛና። ሀይቆ፥ ነ ጋዶይ አዉኔ? ስኦለ፥ ነ ይሶይ አዉኔ? ታኒ ታ አሳስ ቃትከ። 15ኤፍሬም ባ እሻታ ግዶን ምንኮካ፥ ጎዳይ የድዳ ዶሎሀ ባጋ ጫርኮይ ባዞፈ ጫርክሸ ያና፤ እያ ፑልቶይ ኤቃና፤ እያ ሃይ መላና። እ ምንጅዳ አልኦ ሚሸ ኡባይ ቦንቀታና። 16ሳማረ አሳይ ባንታ ፆሳ ቦላ ጌላትዳ ግሾ፥ ሴራ ኤካናዉ በሴስ። ኤንቲ ማሻን ቡሰታና፤ ኤንታ ናይት ትንቸታና፤ ኤንታ ቃንትዳ ማጫሳታ ኡሎይ ዳከታና” ያጌስ።