ሆሰ 14

ጎዳኮ ስሞይ ኤህያ አንጆ

1እስራኤለ አሳዉ፥ ህንተ ናጋራ ጋሶን በትድ ኩንድዳ ግሾ ሀእ ጎዳ፥ ህንተ ፆሳኮ ስምተ። 2ጎዳኮ ስሚድ፥ ሀይሳዳ ያግድ ዎስተ፤ “ኑ ናጋራ ኡባፈ ኑና ማራ፤ ኑኒ ኑ መተርሻ አይፈ ግድዳ ጋላታ ነዉ ሺሻና መላ ነ ኑና ነ ኬሀተን ሺሻ ኤካ። 3አሶረይ ኑና አሸና፤ ኑ ኦላ ፓራታንካ አማነቶኮ። ኑኒ ኑ ኩሸን መዳ ኤቃ ምስለታ ኡባ፥ ‘ኑ ፆሳታ’ ጎኮ። አዋይ ባይናይሳታስ ቃተይ ነና” ያግተ።

4ጎዳይ፥ “ታ ሀንቆይ ኤንታፈ ስምዳ ግሾ፥ ታኒ ኤንታ ማካላ ሀኑዋፐ ኤንታ ፓዳ፥ ኤንታ ዎዛናፐ ሲቃና። 5ታኒ እስራኤለ አሳስ አካ ግዳና፤ ኤንቲ ጪሻዳ ጭይድ፥ ልባኖሰ ዝጋ መላ ፃጶ የዳና። 6ኤንታ ዶላይ ጭልአና፤ ኤንቲ ሻማሆዳ ሎአና። ኤንታ ሳዎይ ልባኖሰ ዝጋዳ ቶንኩ ጋና። 7አሳይ ስሚድ ታ ኩያ ጋርሳን ሸምፓና፤ ኤንቲ ዶላዳ ጭልአና፤ ኤንቲ ዎይነዳ ጪያና፤ ልባኖሰ ዎይነ ኡሻዳ ኤረትያባ ግዳና። 8ኤፍሬማ አሳዉ፥ ህዛፐ ጉየ ኤቃ ምስለራ ታዉ አይ ጋሄተ ደኢ? ህንተ ዎሳ ስኤይነ ህንተና ናገይ ታና። ታኒ ጭልኦ ዝጋ መላ፤ ህንተ አይፈ አይፋና መላ ኦይ ታና” ያጌስ።

9ጭንጫተ ደእያ ኦንካ ሀይሳ አኬኮ፤ ዎዛን ደእያ ኦንካ ሄሳ ኤሮ። ጎዳ ኦገይ ሱረ፤ ፅሎት ሄ ኦግያራ ሄመቶሶና፤ ሽን ናጋራንቾት እያን በቶሶና።