ጌሻ ማፃፋ
ህዝቄላ 39
ኡባ ሃርያ ጎዳይ ሀይሳዳ ያጌስ፦ “አሳ ናአዉ፥ ጎገ ቦላ ሀይሳዳ ያጋዳ ትንብተ ኦዳ። ሞሳሀነ ቶቤላ አሳስ ዋና ሀላቃ ግድዳ ጎገ፥ ታ ነዉ ሞርከ። ታ ነና ጉየ ዛራና፤ ሃሆ ግድዳ ፑደሀ ባጋ ቢታፈ ጎቻ ከሳዳ፥ እስራኤለ ደረታ ቦላ ነና ኤሀና። ታኒ ነ ሀድርሳ ኩሽያፐ ዶንገታ ባቃ የጋና፥ ነ ኡሻቻ ኩሽያፐ ዶንገ ቶራታ የግሳና። ኔኒ፥ ነ ኦላንቾትነ ኔራ ደእያ ካዎተት ኡባይ እስራኤለ ደርያ ቦላ ኩንድድ አታና። ታኒ ህንተ አሹዋ ካፎታስነ ባዞ ዶአታስ ካ ኦዳ እማና። ታኒ ኡባ ሃርያ ጎዳይ ሄሳ ኦድዳ ግሾ፥ ህንተ ኡባይ ደንባን ኩንድድ አታና። ማጎገ ቢታንነ ዩሾይ አባን ተቀትዳ ቢታታን፥ ህርግ ባይና ኡትዳ አሳ ቦላ ታኒ ኤፅያ ታማ የዳና። ታኒ ጎዳ ግደይሳ ኤንቲ ሄ ዎደ ኤራና። ታ ጌሻ ሱንይ ታ አሳ እስራኤለ ግዶን ኤረታናዳ ኦና። ህዛፐ ጉየ ታ ጌሻ ሱንይ ጫየተና። ካዎተት ታኒ ጎዳ፥ እስራኤለ ጌሻ ግደይሳ ኤራና” ያግስ።
ኡባ ሃርያ ጎዳይ ሀይሳዳ ያጌስ፦ “ሄ ጋላሳይ ያና፤ አተና” ያጋዳ ታ ኦድዳ ጋላሳይ ሀይሳ።
“ሄ ዎደ እስራኤለ ካታማታን ደእያ አሳይ ከይድ፥ ኦላ ሚሸታ ኡባ ታማን ኤና፤ ሄስካ ጉነ ግታ ጎንዳለታ፥ ዶንገታ፥ ዶንገ ቶራ፥ ቶራታነ ፃምአታ ኡባ ፁጋና። ላፑን ላይ ኩመ ኤንቲ ኤሶ ም ኦድ ጎኤታና። ኤንቲ ም ምፃናዉ ዎይኮ ዎራፐ ም ቃንፃናዉ ኮሸና። ኤንቲ ሺሽዳ ኦላ ሚሸታ ኤሶ ም ኦድ ጎኤታና። ባንታና ቦንቅዳይሳታ ዛሪድ ቦንቃና፤ ኤንታባ ኤክዳይሳታፐ ኤንቲ ዛሪድ ኤካና” ያጌስ ኡባ ሃርያ ጎዳይ።
ሄ ጋላስ ጎገ ሞገትያ በሲ ታኒ እያዉ እስራኤለ ቢታን እማና። ሄ በሳይ አባፈ ዶሎሀ ባጋራ ደእያ ኦገ አሳታ ዛንጋራ ጌተትያ ዛንጋራ ግዶን ግዳና። ጎገይነ እያ ኦላንቾት ኡባይ ያን ሞገትያ ግሾ፥ ኤንታ ዱፎይ ያራ ሄመትያ አሳስ ኦገ ጎርዳና። ሄ በሳይ፥ “ጎገ ኦላንቾታ ዛንጋራ” ጌተትድ ፄገታና።
“እስራኤለ አሳይ ቢታ ጌሻናዉ፥ ላፑን አጌና ኩመ አሀ ሞግሸ ጋምአና። ሄ ቢታን ደእያ አሳ ኡባይ አሀ ሞጎን ማደታና፤ ሄሳን፥ ታኒ ታ ቦንቹዋ ቆንጭስያ ዎደ ኤንታዉ ቦንቾ ግዳና” ያጌስ ኡባ ሃርያ ጎዳይ። ላፑን አጌናፐ ጉየ አትዳ አህ ደእኮ፥ ሞጋና መላ አስ ዶረታና፤ ሄ አሳይ ቢታይ ጌያና ጋካናዉ ኡባ ዎደ ቢታ ኡባን ዩይድ አትዳ አሀ ደምድ ሞጎሶና። ኤንቲ ቢታን ዩይሽን፥ አሳ መቀ በንትኮ፥ ሄ መቀ ማታን ማላ ዎድ አና። ሞገይሳት ይድ፥ ጎገ ኦላንቾታ ዛንጋራን ሞጋና። ሄ ካታማ ሱንይ ሀሞና ጌተታና። ኤንቲ ቢታ ዛሪድ ጌሻና። እያ ሄራን፥ “ኦላንቾታ ካታማ” ጌተትድ ፄገትያ ካታም ዳና።
ኡባ ሃርያ ጎዳይ ሀይሳዳ ያጌስ፦ “አሳ ናአዉ፥ ካፎ ኮቸነ ሳአ ዶአታስ ሀይሳዳ ያጋዳ ፄጋ። ታ ህንተዉ እስራኤለ ደረታ ቦላ ጊግስዳ ግታ ያርሾ ባለን አሾ ማናዉነ ሱ ኡያናዉ ኡባ በሳፈ ሺቅድ ሃይተ። ህንተ ምኖ አሳታ አሹዋ ማና፤ ቢታ ሀላቃታ ሱ ኡያና። ኤንቲ ህንተዉ ባሳነ ሞ ኡርገ ዶርሳዳ፥ ማራዘዳ፥ ኮለዳነ ቦራ መላ ግዳና። ታኒ ህንተዉ ጊግስዳ ያርሾ ባለን ህንተ ካላና ጋካናዉ፥ ሞ ማና፤ ማታና ጋካናዉ፥ ሱ ኡያና። ታ ህንተዉ ጊግስያ ግብራፐ ፓራታ፥ ፓራ አሳታ፥ ምኖ ቶራ አሳታነ ሀራ ኦላንቾታ ኡባ አሹዋ ህንተ ካላና ጋካናዉ ማና” ያጌስ ኡባ ሃርያ ጎዳይ።
“ታኒ ካዎተታ ግዶን ታ ቦንቹዋ ቆንጭሳና። ካዎተት ኡባይ ታ ኤንታ ፕርድዳ ፕርዳነ ታ ኤንታ ቦላ ደንዳ ታ ኩሽያ በአና። ሄ ዎድያፐ ዶምድ፥ እስራኤለ አሳይ ታኒ ጎዳ፥ ኤንታ ፆሳ ግደይሳ ኤራና። እስራኤለ አሳይ ድኤትድ ብዳይ ባንታ ናጋራ ጋሶን፥ ግደይሳ ሀራ ካዎተት ኤራና። ኤንቲ ታዉ አማነቶና እፅዳ ግሾ፥ ታኒ ታ ሶምኡዋ ኤንታፈ ደንዳ፥ ኤንታ ሞርከታስ ኤንታ አዳ እምን፥ ኤንቲ ኡባይ ኦላን ሀይቅዶሶና። ኤንታ ቱናተነ ኤንታ ኢታተ መላ ኤንታዉ በሲያ ሴራ ሴራስ፤ ታ ሶምኡዋ ኤንታፈ ገንስ” ያግስ።
ኡባ ሃርያ ጎዳይ ሀይሳዳ ያጌስ። “ሀእ ታኒ ያይቆባ ኮቻታ ድኦፐ ዛራዳ ጋሽትሳና፤ እስራኤለ አሳ ኡባስ ቃታና። ታ ጌሻ ሱንስ ምሸታዳ ጫየቶና መላ ኦና። ኤንታ ያሽያባይ ባይና፥ ባንታ ቢታን ሳሮ ዱሱ ዶምያ ዎደ ካሰ ባንታ ዬላነ ታዉ አማነቶና እፅዳይሳ ዶጋና። ታኒ ኤንታ ካዎተታ ኡባ ግዶፈ ዛራዳ ኤሀና፤ ሞርከታ ቢታፈ ኤንታ ሺሻና። ሄሳዳ ኦዳ፥ ታኒ ጌሽ ግደይሳ ኤንታ ባጋራ ካዎተታ ኡባ በሳና። ኤንቲ ድኤትድ ባና መላ ኦዳይ ታና ግድያ ግሾነ ኤንታ ሺሻዳ፥ ኤንታ ቢታ ዛርዳ ግሾ፥ ታኒ ጎዳ ኤንታ ፆሳ ግደይሳ ኤንቲ ኤራና። ታኒ ኤንታፈ እሱዋካ ካዎተታ ግዶን አግከ። ታኒ ታ አያና እስራኤለ አሳ ቦላ ጉሳና፤ ዛራዳ ታ ሶምኡዋ ኤንታፈ ገንከ” ያጌስ ኡባ ሃርያ ጎዳይ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.