ህዝቄላ 38

ጎገ ቦላ ኦደትዳ ትንብተ

1ጎዳ ቃላይ ሀይሳዳ ያግሸ ታኮ ይስ። 2“አሳ ናአዉ፥ ማጎገ ቢታን ደእያ ሞሳሀነ ቶቤላ አሳ ቦላ ዋና ሀላቃ ግድዳ ጎገ ቦላ ትንብተ ኦዳ። 3ኡባ ሃርያ ጎዳይ ሀይሳዳ ያጌስ ጋዳ ኦዳ። ሞሳሀነ ቶቤላ ዋና ሀላቃ ግድዳ ጎገ ታ ነ ቦላ ደንዳስ። 4ታ ነና ጉየ ዛራና፤ ነ ስን ዳፎ አዳ፥ ነ ኦላንቾታራ፥ ነ ፓራታራ፥ ኦላ ሚሸ ማእዳ ነ ፓራ አሳታራ፥ ባንታ ማሻ ሌፍዳ፥ ግታነ ጉ ጎንዳለ ኦይክዳ አሳራ ነና ጎቻዳ ከሳና። 5ፋርሰፈ፥ ቶጰፈነ ሊበፐ ይዳ አሳይ ጎንዳለ ኦይክድ፥ ሁጰን ብራታ ባርኔፃ ዎድ፥ ኤንታራ ግዳና። 6ጎመርነ እያ ኦላንቾት ኡባይ፥ ፑደሀ ባጋን ደእያ ቤት-ቶርጋምነ እያ ኦላንቾት ኔራ ግዳና።

7“ነነ ኔኮ ሺቅዳ አሳ ኡባይ ደንድተ፤ ህንተና ጊግስተ፤ ነ ኤንታዉ ሀላቃ ግዳ። 8ዳሮ ዎደፐ ጉየ፥ ነ ኦላስ ኮየታና፤ ስንፈ ያና ላይታን ዳሮ ዎደ ባይሳ ግድድ ደእዳ ቢታ፥ ኦላፐ ሸምፕዳ ቢታነ፥ እያን ደእያ አሳይ ዳሮ ካዎተታፐ እስራኤለ ደረታ ሺቅዳ ቢታ ኦላናዉ ነ ደንዳና። ኤንቲ ዳሮ ካዎተታፐ ሺቅዳይሳታነ ኡባይ ሀእ ሳሮ ደኤይሳታ። 9ኔኒ፥ ነ ኦላንቾትነ ኔራ ደእያ ዳሮ ካዎተት ጎተዳ ደንዳና፤ ህንተ ሻራዳ ቢታ ካማና” ያጌስ።

10ኡባ ሃርያ ጎዳይ ሀይሳዳ ያጌስ፦ “ሄ ዎደ ቆፍ ነ ዎዛና ግዶ ይን፥ ነ ኢታባ ሀልቻና። 11ኔኒ፥ ‘ታኒ ድረትቦና ጉታታ ኦላና፤ ዎፑ ግድ፥ ህርግ ባይና ደእያ አሳታ፥ ድርስ፥ ፐንገይ ዎይኮ ጎርደይ ባይና ካታማታ ታ ኦላና። 12ታኒ ኤንታ ድአናነ ቦንቃና፤ ካሰ ባይሳ ግድዳ ቢታ ይድ ኡትዳ፥ ካዎተታ ግዶፈ ሺቅዳ፥ መሄነ ሚሸ ሃርዳ፥ ቢታስ ጉልአን ኡትዳ አሳ ቦላ ታ ኩሽያ ደንና’ ያጋና። 13ሳባ አሳይነ ድዳና አሳይ ታርሰሳ ዛልአንቾትነ ናአተ ኦላንቾት ኡባይ፥ ‘ነ ቦንቃናዉ ያዲ? ነ ኦላንቾታ ድኦ ቶሳናዉ፥ ብራነ ዎርቃ ጋዝሳናዉ፥ መሄነ ሚሸ ኤካናዉነ ድኡዋ ቦንቃናዉ ዳሮ አስ ሺሻዲ?’ ” ያጋና።

14ሄሳ ግሾ፥ አሳ ናአዉ፥ ጎገ ቦላ ሀይሳዳ ያጋዳ ትንብተ ኦዳ። ኡባ ሃርያ ጎዳይ ሀይሳዳ ያጌስ፦ “ሄ ዎደ፥ ታ አሳይ እስራኤለ ህርግ ባይና ደእያ ዎደ፥ ኔኒ አኬክኪ? 15ኔኒ ደእያ ፑደሀ ባጋ ቢታፈ ያና። ነነ ኔራ ደእያ ዳሮ ካዎተት ፓራ ቶግድ፥ ምኖ ኦላንቾ ግድድ፥ ያና። 16ቢታ ካምያ ሻራዳ፥ ነ ታ አሳ እስራኤለ ቦላ ያና። ጎገ ስንፈ ያና ዎድያን ታ ነና ታ ቢታ ቦላ ደንና። ሄሳ ታ ኦይ ካዎተት ታና ኤራና መላነ ታኒ ነ ባጋራ ኦያባይ ታ ጌሻተ ኤንታ ስንን በሳና መላሳ” ያጌስ።

17ኡባ ሃርያ ጎዳይ ሀይሳዳ ያጌስ፦ “ታኒ ታ አይለ ግድዳ እስራኤለ ናበታ ባጋራ፥ ካሰ ዎደ ዛራ ዛራዳ እስራኤለን ትንብተ ኦዳስ። 18ኡባ ሃርያ ጎዳይ ሀይሳዳ ያጌስ፦ ‘ጎገይ እስራኤለ ቦላ ደንድያ ዎደ ታ ሀንቆይ ሱላና። 19ሄ ዎደ እስራኤለ ቢታን ዎልቃማ ቢታ ቃፆይ ሀናና፤ ታኒ ታ ሸንያንነ ታ ኤፅያ ሀንቁዋን አዋጃስ። 20አባ ሞሎይ፥ ሳሎ ካፎይ፥ ደረን ደእያ መሄይነ ዶአይ፥ ሳአ ቦላ ዎፅ ቃፅያ መተ ኡባይነ ሳአን ደእያ አሳ ኡባይ ታ ስንን ኮኮራና። ደረት ኩንዳና፤ አፎት ዎዳና፤ ድርሳ ግምበ ኡባይ ላለታና። 21ታ ዙማታን ኡባን ጎገ ቦላ ማሽ ደንዳና መላ ኦና፤ ኦላንቾት ባንታ ማሻ ባንታ ቦላ ዛሪድ፥ እሶይ እሱዋ ዎና። ታኒ ኡባ ሃርያ ጎዳይ ሀይሳ ኦዳስ። 22ታኒ ሀርገንነ ሀይቆን እያ ሴራና፤ ዎልቃማ እራ፥ ሻች፥ ፁግያ ዲነ እያ ቦላ፥ እያ ኦላንቾታ ቦላነ እያራ ደእያ ካዎተታ ቦላ ቡክሳና። 23ሄሳዳ ኦዳ፥ ታኒ ታ ግታተነ ታ ጌሻተ በሳና። ዳሮ ካዎተታ ታኒ ታናተ ኤርሳና። ታኒ ጎዳ ግደይሳ ኤንቲ ሄ ዎደ ኤራና’ ” ያግስ።