ጌሻ ማፃፋ
ህዝቄላ 37
መልዳ መቀ ደእያ ዛንጋራ
ጎዳ ኩሸይ ታ ቦላ ደኤስ፤ እያ አያናይ ታና መቀ ኩምዳ ዛንጋራን ዎስ። እ ታና ኤንታ ግዶን ያነ ሃነ ዩሽስ፤ ታ ህንች ግድ መልዳ ዳሮ መቀታ ዛንጋራ ግዶን በአስ። እ፥ “አሳ ናአዉ፥ ሀ መቀት ዛሪድ፥ ሸምፖራ ዳናዉ ዳንዳኦና?” ያግስ።
ታኒ፥ “ኡባ ሃርያ ጎዳዉ፥ ሀይሳ ነ ኤራሳ” ያጋስ።
እ ታኮ፥ “ሀ መቀታስ ሀይሳዳ ያጋዳ ትንብተ ኦዳ፤ ህንተኖ፥ መልዳ መቀቶ፥ ጎዳ ቃላ ስእተ። ኡባ ሃርያ ጎዳይ ሀ መቀታኮ ሀይሳዳ ያጌስ፦ ‘ታኒ ሸምፖ ህንተ ግዶ ገልሳና፤ ዛሪድ ህንተ ደኦን ዳና። ታ ህንተ ቦላ ሻያ ዎና፤ ህንተና አሾ ማይዛና፤ ህንተና ጎጋን ካማና። ህንተ ደኦን ዳና መላ ታ ህንተ ግዶ ሸምፖ ገልሳና። ሄ ዎደ ህንተ ታኒ ጎዳ ግደይሳ ኤራና’ ” ያጌስ።
እ ታና ኪትዳይሳዳ ትንብተ ኦዳስ፤ ታ ትንብተ ኦዶ ዶምያ ዎደ ግርስ ስኤትስ፤ መቀት ሺቅድ፥ ባ በሳን በሳን ኦይከትዶሶና። ታ ፄልያ ዎደ፥ ኤንታ ቦላ ሻይ ደኤስ፤ አሾይ ኤንታ ቦላ በንትስ፤ ጋልባ ማእዶሶና፤ ሽን ሸምፖይ ኤንታ ግዶን ዴና።
እ ታኮ፥ “አሳ ናአዉ፥ ጫርኩዋስ ትንብተ ኦዳ፤ ነኖ፥ ጫርኩዋዉ፥ ኦይዱ ባጋፈ ሃ ያ፤ ኤንቲ ደኦን ዳና መላ ሀ ሀይቅዳይሳታ ቦላ ሸምፖ ፑና” ያግስ። እ ታና ኪትዳይሳዳ ትንብተ ኦዳስ፤ ሸምፖይ ኤንታ ግዶ ገልስ፤ ደኦ ደምዶሶና፤ ኤንቲ ዳሮ ኦላንቾ ግድድ ባንታ ቶሆን ኤቅዶሶና።
እ ታኮ፥ “አሳ ናአዉ፥ ሀ መቀት እስራኤለ አሳ ሌምሶ፤ እስራኤለ አሳይ፥ ‘ኑ መቀት መልዶሶና፤ ኑ ኡፋይሳይ ይስ፤ ኑባይ ኩመ ሀልስ’ ያጎሶና። ሄሳ ግሾ፥ ኤንታዉ ሀይሳዳ ያጋዳ ትንብተ ኦዳ፤ ‘ህንተኖ፥ ታ አሳዉ፥ ታኒ ህንተ ዱፉዋ ዶያና፤ ህንተና ያፐ ከሳና፤ ታ ህንተና ዛራዳ፥ እስራኤለ ቢታ ኤሀና። ታ አሳዉ፥ ታ ህንተ ዱፉዋ ዶይያ ዎደነ ህንተና ከስያ ዎደ፥ ታ ጎዳ ግደይሳ ህንተ ኤራና። ታኒ ታ አያና ህንተ ግዶን ዎና፤ ህንተ ደኦን ዳና። ታኒ ህንተና፥ ህንተ ቢታን ዎና። ሄ ዎደ ታኒ ጎዳይ ኦድዳይሳነ ኦዳይሳ ህንተ ኤራና’ ” ያጌስ ኡባ ሃርያ ጎዳይ።
እስ ዳረነ እስ ካዎ
ዛሪድ ጎዳ ቃላይ ሀይሳዳ ያግሸ ታኮ ይስ፦ “አሳ ናአዉ፥ እስ ም ፃምአ ኤካዳ፥ እያ ቦላ፥ ‘ሀይስ ይሁዳስነ እያራ ደእያ እስራኤለ አሳሳ’ ያጋዳ ፃፋ። ቃስ ሀራ ፃምአ ኤካዳ፥ እያ ቦላ፥ ‘ሀይስ ኤፍሬማ፤ ዮሰፋነ እያራ ደእያ እስራኤለ አሳሳ’ ያጋዳ ፃፋ። ሄሳፈ ጉየ፥ ኤንቲ ነ ኩሸን እስ ፃምአ ግዳና መላ ናምአ እስፈ ጋዳ ኦይካ። ነ ቢታ አሳይ ኔኮ፥ ‘ሀይስ ነ ኦይስ አይቤ? ኑስ ብርሸ ኦዳ’ ያግድ ኦይችኮ፥ ኡባ ሃርያ ጎዳይ ሀይሳዳ ያጌስ ጋዳ ኦዳ፦ ታኒ ኤፍሬማ ኩሸን ደእያ ዮሰፋ ፃምአነ እያራ ደእያ እስራኤለ ኮቻታ ኤካናዉ ሀናይስ፤ ኤንታ ናምኣ እስ ፃምአ ኦናዉ፥ ይሁዳ ፃምአራ ጋና። ኤንቲ ናምአይ ታ ኩሸን እሶ ግዳና” ያጌስ ኡባ ሃርያ ጎዳይ ያጋዳ ኦዳ።
“ሄ ነ ኤንታ ቦላ ፃፍዳ ናምኡ ፃምአታ ኤንታ ስንን ኦይካዳ፥ ኡባ ሃርያ ጎዳይ ሀይሳዳ ያጌስ ጋዳ ኦዳ። ታኒ እስራኤለ አሳ ኤንቲ ላለትዳ ካዎተታ ግዶፈ ከሳና፤ ታ ኤንታ ሺሻዳ፥ ኤንታ ቢታ ዛራዳ ኤሀና። እስራኤለ ደረታ ቦላነ ኤንታ ቢታን ታ ኤንታ እስ ካዎተ ኦና፤ ኤንታ ኡባ ቦላ እስ ካዎ ካዎና። ቃስ ኤንቲ ዛሪድ ናምኡ ቢታ ግዶኮና፤ ናምኡ ካዎተ ግድድ ሻከቶኮና። ህዛፐ ጉየ፥ ኤንቲ ባንታ ኤቃታን፥ ባንታ እፀትዳባታንነ ባንታ ናጋራ ኡባን ባንታና ቱንሶኮና። ታኒ ኤንታ ኩንድዳ በሳፈ ደንዳ ናጋራ ኡባፈ ጌሻና። ኤንቲ ታ አሰ ግዳና፤ ታካ ኤንታዉ ፆሰ ግዳና።
“ታ አይለይ ዳዊቲ ኤንታዉ ካዎ ግዳና፤ ኤንታ ኡባስ እስ ሄንንቾ ፃላል ዳና። ኤንቲ ታ ህግያ ካላና፤ ታ ዎጋ ምንድ ናጋና። ታኒ ታ አይልያ ያይቆባስ እምዳነ ኤንታ ማይዛት ደእዳ ቢታን ኤንቲ ዳና። ሄ ቢታን ኤንቲ፥ ኤንታ ናይትነ ኤንታ ናይታ ናይት መርናዉ ዳና፤ ታ አይለይ ዳዊቲ ኤንታ ቦላ መርናዉ ካዎ ግዳና። ታ ኤንታራ ሳሮተ ጫቆ ጫቃና፤ ሄ ጫቆይ መርና ጫቆ ግዳና። ታኒ ኤንታ ምንዳ ኤሳና፤ ኤንታ ታይቡዋ ዳርሳና፤ ታ ኬ መርናዉ ኤንታ ግዶን ዎና። ታኒ ያን ኤንታራ ዳና፤ ኤንታዉ ፆሰ ግዳና፤ ኤንቲ ታ አሰ ግዳና። ፆሳ ኬይ ኤንታ ግዶን መርናዉ ደእያ ዎደ፥ እስራኤለ ጌሸይ ታን፥ ጎዳ ግደይሳ ካዎተት ኤራና” ያግስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.