ህዝቄላ 30

ግብፀስ ከስዳ ዘለልስ

1ቃስካ ጎዳ ቃላይ ሀይሳዳ ያግሸ ታኮ ይስ፦ 2“አሳ ናአዉ፥ ኡባ ሃርያ ጎዳይ ሀይሳዳ ያጌስ ጋዳ ትንብተ ኦዳ።

“ ‘ሄ ጋላሳ አየ!

ያጋዳ ዘሌላ።’

3ሄ ጋላሳይ ማትስ!

ጎዳ ጋላሳይ ጋክስ!

ሄ ጋላሳይ ሻር ካምዳ ጋላስ

ካዎተታ ኡባስ መቶ ጋላስ ግዳና።

4ግብፀ ቦላ ኦል ያና፤

ቶጰ ቦላ ኡንእ ያና።

ዳሮት ግብፀ ቢታን ሀይቃና፤

እያ ዱረተይ ቦንቀታና፤ እያ ባሶይ ሾደታና።

5ሄ ኦላይ ቶጰ፥ ሊደ፥ ሊበ፥ አራበነ ጫቆ ደረ ኡባይ ግብፀራ እስፈ ማሻን ዉርሳና” ያጌስ።

6ግብፀ ማደይሳት ኩንዳና፤ እያ ኦቶሩዋ ዎልቃይ ዉራና። ምግዶላፐ ብድ አስዋና ጋካናዉ፥ ኤንቲ ማሻን ሀይቃና። ታኒ ኡባ ሃርያ ጎዳይ ሄሳ ኦዳይስ። 7ግብፀይ ቢታ ኡባፈ አዳ ባይሳ ቢታ ግዳና፤ እያ ካታማት ሀራ ላለትዳ ካታማ ኡባፈ አድ ላለትድ አታና። 8ታኒ ግብፀ ታማን ኦይያ ዎደነ እያ ማደይሳት ኡባይ ሀይቅድ ዉርያ ዎደ፥ ታኒ ጎዳ ግደይሳ ኤንቲ ኤራና።

9“ሄ ዎደ ታኒ ሳሮ ደእያ ቶጰ አሳ ዳጋንናዉ አሳታ ማርካበን ኪታና። ግብፀይ ፕርደትያ ጋላስ ቶጰ አሳ ቦላ ዋየይ ያና። ሄ ጋላሳይ ጋክስ” ያጌስ።

10ኡባ ሃርያ ጎዳይ ሀይሳዳ ያጌስ፦ “ባብሎነ ካዋ ናቡካዳናፆራ ኩሸን ታኒ ግብፀ ዱረተ ይሳና። 11ካዎተታ ኡባፈ አድ፥ ዎዛና ምኖ ኦላንቾታ ካለድ ይድ፥ ቢታ ይሳና፤ ኤንቲ ግብፀ አሳ ቦላ ማሸ ሾድድ፥ ቢታን አሀ ኩንና። 12ናይለ ሻፋ ታኒ መልሳና፤ ታኒ ግብፀ ኢታ አሳታ ኩሸን አዳ እማና፤ ሄ ቢታነ ያን ደእያባ ኡባ አላጋታን ይሳና። ታኒ ጎዳይ ሀይሳ ኦዳስ” ያጌስ።

13ኡባ ሃርያ ጎዳይ ሀይሳዳ ያጌስ፦ “መምፕሳ ካታማን ደእያ ኤቃታነ ምስለታ ኡባ ታ ይሳና፤ ግብፀ ቢታን ዛሪድ ሀላቃይ ዴና፤ ቢታ ኡባ ታኒ ያሽሳና። 14ታኒ ጳትሮሳ ጌተትያ ዱገሀ ባጋ ግብፀ ባይሳ ከሳና፤ ፑደሀ ባጋራ ደእያ ፆኣነ ካታማን ታማ የዳና፤ ተብሳ ካታማ ፕርዳና። 15ግብፀ ሚፃ ግድዳ ፐሉስያማን ታ ሀንቁዋ ጉሳና፤ ተብሳ አሳ ኡባ ዉርሳና። 16ታኒ ግብፀን ታማ ኦይና፤ ፐሉስያም ዳሮ ዋየታና፤ ተብሳ ድርሳ ግምበይ ላለታና፤ መምፕሳ ካታማ ዱፆና መቶይ ጋካና። 17ኦናንነ ቡባስቱ ካታማን ደእያ ናአተት ኡባይ ማሻን ዉራና፤ ማጫሳይ ድኤትድ ባና። 18ግብፀ ዎልቃ ታ መንረያ ዎደ ፃፍናሳን ጋላስ ቃማና፤ እ ኦቶሩዋ ዎልቃይ ዉራና፤ ግብፀ ሻር ካማና፤ ሄ ካታማ ዩሾን ደእያ ጉታቲ ኡባ ድኤትድ ባና። 19ታኒ ግብፀ ሄሳዳ ኦዳ ፕርዳና። ታኒ ጎዳ ግደይሳ ኤንቲ ሄ ዎደ ኤራና” ያጌስ።

20ኑኒ ድኤትዳ ታማነ እስን ላይን፥ ኮይሮ አጌናን፥ ላፑን ጋላሳን፥ ጎዳ ቃላይ ሀይሳዳ ያግሸ ታኮ ይስ። 21“አሳ ናአዉ፥ ታ ግብፀ ካዋ ቀስያ መንስ፤ እያ ዎይሻንነ ጩርቃን ፃፅድ፥ ኮልድ ፓያ ሂል ባዋ፤ ህዛፐ ጉየ እ ምኖተ ደምድ ማሸ ኦይካናዉ ዳንዳኤና። 22ሄሳ ግሾ፥ ኡባ ሃርያ ጎዳይ ሀይሳዳ ያጌስ። ታኒ ግብፀ ካዋስ ሞርከ ግዳና። ካሰ እያዉ መቅዳ ቀስያነ ሎኦ ደእያ ቀስያ ናምኣካ ታ መንና፤ እያ ማሻይ እያ ኩሸፐ ሳአን ዎናዳ ኦና። 23ታኒ ግብፀታ ካዎተታ ግዶንነ ሀራ ቢታታን ላላና። 24ታኒ ባብሎነ ካዋ ናምኡ ቀስያ ምንዳ፥ ታ ማሻ እያ ኦይና። ሽን ግብፀ ካዋ ቀስያ መንና፤ ባ ሞርክያ ስንን እ ሀይቃና ሀንያ አሳዳ ኦላና። 25ታኒ ግብፀ ካዋ ቀስያ ዳቡርሳዳ፥ ባብሎነ ካዋ ቀስያ ምንና። ታኒ ባብሎነ ካዋ ታ ማሻ ኦይያ ዎደነ እ ግብፀ ቦላ ደንያ ዎደ ግብፀት ታኒ ጎዳ ግደይሳ ኤራና። 26ግብፀታ ታኒ ካዎተታ ግዶንነ ቢታ ኡባን ላላና። ታኒ ጎዳ ግደይሳ ኤንቲ ሄ ዎደ ኤራና” ያጌስ።