ህዝቄላ 31

ልባኖሰ ዝጋ ሌምሶ

1ኑኒ ድኤትዳ ታማነ እስን ላይን፥ ሄን አጌናን፥ ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ። 2“አሳ ናአዉ፥ ግብፀ ካዋስነ አሳ ኡባስ ሀይሳዳ ያጋዳ ኦዳ፦ ‘ነ ግታተ ታ ኦደራ ጋደዮ?’ ”

3ነ ሎኦ ዳሻ ኩያይ ደእያ ልባኖሰ ዝጋ መላ፤

እ ድጭስ፤ እያ ፄራይ ሻራ ጋክስ።

4ያን እያ ድችያ ሃ ደኤስ፤

ፑልቶ ጪሞት እያ ድችዶሶና።

ሻፋት ጎግድ እያ ዩሹዋ እርፅስዶሶና፤

ፑልቶት ምይ ዶልያ በሳ ኡባ ኡሾሶና።

5ሄ ምይ ዎራን ደእያ ም ኡባፈ አዱቅስ፤

እያ ዳሻይ ዳርስ፤ ታሸይ አዱቅስ፤

ሃ ዳርዳ ግሾ ኦርድስ።

6ሳሎ ካፎት እያ ዳሻን ባንታ ኬ ኬፅዶሶና፤

ባዞ ዶአት እያ ኩያ ጋርሳን ናአ የልዶሶና፤

ግታ ካዎተት ኡባይ እያ ኩያን ሸምፖሶና።

7ባ ፃጱዋ ጪሞ ሃን ዱገ የድዳ ግሾ

ሄ ምይ ባ ዳሻ ታሽያራ ዋንድ ሎእ!

8ሀር አቶሽን ፆሳ ጋናትያን ሄ ዝጋራ ግንያ ዝግ ባዋ፤

እያ መላ ዳሽ ደእያ ፂድካ ባዋ።

ሄሳ መላ ኦቻ ም፥

ፆሳ ጋናትያን ሄሳ መላ ሎኦ ም ባዋ።

9ታኒ እያ ዳሮ ዳሻን ፑላያስ፤

ኤደነ ጌተትያ ፆሳ ጋናትያን

ደእያ ምት ኡባይ እያ ቃናቶሶና።

10ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ሄ ምይ አዱቅድ ድጭዳ ግሾ፥ እያ ፄራይ ሻራ ጋክዳ ግሾነ እ ባ ጌሳን ኦቶርትዳ ግሾ፥ 11ታ እያ የጋ አጋስ፤ ዎልቃማ፥ አላጋ ካዋስ አዳ እማስ። ሄ ካዎይ እያ ኢታተ መላ እያ ቦላ ኦና። 12ዎዛና ምኖ አላጋት ሄ ም ቃንፅድ የጋና፤ ቃንፅዳ ታሸት ደረታን፥ ኦላታንነ ዛንጋራታን የገትድ አታና። እያ ኩያን ሸምፕያ ካዎተት ኡባይ ሄ በሳ አግድ ባና። 13ሳሎ ካፎት ይድ ኩንድዳ ም ቦላ ኡታና፤ ባዞ ዶአት እያ ታሸታ የና። 14ሃ ማታን ድጭያ ምታ ግዶን እያ መላ አዱቅድ፥ ፄራይ ሻራ ጋክያ ም ዴና። ሀይቅያ አሳ ቦላ ጋክያ ሀይቆ ፕርዳይ ሄ ም ቦላ ጋካና፤ እ ዱፎን ደኤይሳታራ ግዳና” ያጌስ።

15ኡባ ሃርያ ጎዳይ ሀይሳዳ ያጌስ፦ “ሄ ምይ ዱፎ ገልያ ጋላስ ጪሞ ፑልቶ ሃት እያዉ ካዮታና መላ ኦና። ሄ ፑልቶ ሃይ ጎጎና መላ ኦና፤ ልባኖሰይ እያ ግሾ አዛናና መላ ኦና፤ ዎራ ም ኡባይ ሹላና። 16ታ ሄ ም ዱፎን ሆልያ ዎደ፥ እያ ኩንደ ግርሳን ካዎተ ኡባይ ቃፃና። ኩንድድ ዱፎን ገልዳ ኤደነ ምትነ ሃ ኡይድ ኦርድዳ ሎኦ ልባኖሰ ምት ኡባይ እያ ኩንደን ምንተና። 17ካዎተታ ግዶን እያራ እስፍዳይሳትነ እያ ኩያን ደእያ ኡባይ ካሰ ማሻን ሀይቅዳይሳታራ ጋሄታናዉ እያራ እስፈ ዱፎ ገላና። 18ኤደነ ጋናትያን ደእያ ምታ ግዶን ሄሳ መላ ግትነ ሎኦይ ባዋ። ሽን ሀእ ኤደነ ምታዳ እካ ሀይቅድ ዱፎን ገሌስ፤ ያን እ ማሻን ሀይቅዳ አማኖናይሳታራ ጋሄታና።

“ሄ ምይ ግብፀ ካዋነ እያ አሳ ሌምሶ” ያጌስ ኡባ ሃርያ ጎዳይ።